L
lepla — (Mat 8:1-4; Mar 1:40-44; Luk 5:12-13; 7:22; etc.). Lepla bi sa uan danchi. Dantu Biblia, palavulu lepla a ja ska faa ja tëjantu ku uan danchi peli döguë ku bi sa patadu ku danchi shi ödjai a ja sama lepla. Nna nguë ineñ shi bi sa ku danchi sai a bi ja fë ineñ afoshi pa ineñ ja ta safadu apachi fo nna utu nguë. Nna nguë ineñ shi ja sa lizhu na ja të zhugan ja ku nna nguë ineñ sa ku danchi sef.
levadura — (Mat 13:33; 16:12; 1Kor 5:6-8; Gal 5:9; etc.). A ja usa levadura pa ma fë ampan. Sa uan ja ku ja fë ku masa tulugu madu ta ja fuma se a ja ma fë ampan. Mandji se ku uan fi levadura se a ja paadji fë uan sapa ampan.
Levi — (Ebr 7:5, 9-10; Apo 7:7). Levi se bi sa uan nna mina deshi ku dösu Jakob, ëli sa nna nguë tompu tompu deshi ku dösu zhenchi Israel. Nna minadjimina Levi a bi pë ineñ apachi valadji pa ineñ ja fë sulvisu Nashian dantu Jadji Nashiolo. Nna padjil ja sa nna nguë a bi ja ma fo dantu nna minadjimina Levi, fo dantu jadji Aaron. Lëë Aaron.
Levi ten bi sa namu uan nna deshi ku dösu balë. Zhugan vëdji a bi ja sama ëli Matë (Mat 9:9; Mar 2:14-15; Luk 5:27-29). Ëli se bi skëvë Evanjelio San Matë.
Limada Nashiolo — Tempu antigu ta pövu Nashiolo bi ska danda uali dantu jamian sölö sölö, se Nashian shina Moises pa ëli fë uan limada patadu. Ëli msa ëli gavu amea shi pa ëli fë, ku panu menme ku peli limaia. Ku a bi ske ja paadji sota ku pa ja ma ku ineñ bai ta pövu ja ska vadji. Pa tadashi öshi ineñ tan ja da jamian shi pa tan paadji djiskansa, pa tan ja lanta pë mdjadu.
Bakisi Bechi a bi ja gada pë Jamian shi Santu mashi dantu Limada Nashiolo. Gachi budu dödösu ineñ shi ku Nashian bi skëvë uan deshi mandamentu dëli pë bi sa dantu Bakisi ku utu ja Nashiolo mashi. Lëë Bakisi Bechi.
Nna judio ineñ shi antigu bi ska adola Nashiolo dantu Limada, se ineñ ten bi sa kutumadu pa ineñ ja fë saklifisu da Nashiolo ala ba toja tempu shi ku alë Salomon manda pa fë Jadji Nashiolo.
limpi — Pa ja sa «limpi» ja da ötëndë fa pöjödölö sai bi limpi valadji pa ëli paadji ma pachi dantu sulvisu. Dajantu ku ëli ja kumu ja ku a ja faa sa «nozhodu» da Nashiolo, pa sa fa a fala uan ja nozhodu, se ten ja fë pa pöjödölö se vla nozhodu ku ëli na tan ja paadji lantela dantu uan jamian santuf. Dantu Antigu Testamentu uan sapa kuzhu se a bi ja faa sa ja nozhodu, ku ja sa ku sinchidu fa Nashian se faa ineñ ja sa nozhodu.
Lot — (Luk 17:28-32; 2Pud 2:7-8). Lot bi sa mina Aran, namain Abraam shi kichi. Dajantu shi se fë ku Lot ku bi sa mina namain Abraam. Lëë Abraam. Ta Abraam së pa ëli ba jua tela novu shi Nashian bi plomëtë pa da ëli, se Lot bi bai ku ëli. Se ta ëli lantela dantu tela sai, se Lot ba ta dantu palea Sodoma. Nna nguë sodoma bi ska fë zhugan ja fëfëiu. Se dajantu jö ineñ sai, se Nashian manda uan anzhu dëli pa ba panta Lot pa ëli jölë anta pa ëli të ala të fea fea. Se fë ku Lot ku jadji dëli së fo ala; tadashi se Nashian të Sodoma të fea fea ku fögö. Anzhu Nashian bi faa Lot pa ëli na pia tashi öshi ineñ ja ska së fo palea sef, mandji se miela Lot vla öiö pia tashi; se öshi öshi se ëli vla fë uan estatua fidu ku salu.