I
Iëva — (2Kor 11:3; 1Tim 2:13-14). Iëva se bi miela Adan. Ta Nashian bi mindji mundu, Adan se Ëli bi fë pimëlu, tadashi se ëli chila uan mbasa Adan, ku se sa i shi a ma fë Iëva. Zha se Satanas iaba lome Iëva se ëli faa ëli ku fala gödö gödö pa ëli kumu fuluta shi Nashian bi faa ineñ pa ineñ na kumuf ai. A shime se ëli ten da Adan fuluta sai se ëli kumu. Se fo djia shi Adan ku Iëva na tëndë mandamentu Nashianf, se nna pöjödölö ja ska be ja fë pekadu. Kain ku Abel ku Set se bi sa nna mina Adan ku Iëva.
insienso — (Luk 1:9-11; Apo 5:8; 8:3-4). Insienso ja të uan sëlu ku ja saa gavu monchi. A ja fë fo aua uan öpa ö fo fala dëli ku leezha dëli. Dantu Jadji Nashiolo se a ja kama insienso valadji pa da uan sëlu gavu ta nna nguë tudu ja ska lezha da Nashiolo.
Uan klase insienso patadu ku ja kuta monchi se nna sëbëdölö ma ba da Djisu ta ëli bi sa namina dantu Belen. (Mat 2:11; Apo 18:13). Insienso sa ja a ja fë ku zhëitë/aua uan öpa ku ja këësë tela Arabia. Ta a ja kama, se ja da uan sëlu gavu. Se dajantu ku nna judio bi ta pa ja ma bi fo jamian löndji, se fë ku ja kuta monchi.
Isaak — (Fidk 7:8; Rom 9:7-10; Ebr 11:9-12; etc.). Isaak se bi sa mina Abraam ku Sara. Namu sai sinchidu dëli sa «böjö li». Se sa namu shi a da ëli pakë Sara bi li ta ëli tëndë plomesa shi Nashian faa ëli pimëlu fa ëli ske pali uan mina benga pa ëli veiu bebezha. Lëë Abraam.
Isai — (Mat 1:5-6; Luk 3:32; Fidk 13:22; Rom 15:12). Isai se bi sa pai alë David, ku se bi sa uan paipai Djisukilitu. Dantu Antigu Testamentu pantafala Isaias bi skëvë fa Kilitu bi ske sa minadjimina Isai ku dji David. Lëë David.
Isaias — (Mat 3:3; Fidk 8:28-30; Rom 9:27-29; etc.). Isaias bi sa uan taba pantafala ngandji Nashiolo. Anta pa Djisukilitu bi mundu, se Isaias fala uan sapa pantafala nova tëjantu ku ëli.
isopo — (Zhn 19:29; Ebr 9:19). Isopo sa uan klase öpa. Nna padjil bi sa ku kutumu mala uan fadöpa isopo ku sangui se ëli ja bolo nguë ö nna limaia ku sangui valadji pa fë ineñ santu deenchi öiö Nashiolo.
Israel — Israel se bi sa uan namu patadu ku Nashian da Jakob, uan nna mina dösu Isaak ku miela dëli Rebeka. Israel bi sa ku deshi ku dösu mina, ku se vla fë nna paipai deshi ku dösu zhenchi Israel. Lëë Abraam.
Nna minadjimina Israel a bi ja sama ineñ ku uan sapa namu. A ja sama ineñ «nna nguë Israel» zha se a ja sama ineñ «nna judio», a shime a ten ja sama ineñ «nna ebreo». Lëë judio.
Tela shi nna Israel ja ta a ten ja sama Israel. Tempu antigu a bi ska sama Kanan. Utu namu tela sai sa Palestina.