D
datali — Nna judio bi sa ku kutumu pa ineñ ja da Nashiolo ku saklifisu. Ineñ ja mata uan limaia shimafan jabala, jabala kutu ö kau valadji pa ineñ ja da shimafan saklifisu. Ineñ ja fë datali ku budu se liba dëli se sa jamian shi a ja fë saklifisu.
Fo tempu Moises nna padjil moso se bi ja kama saklifisu liba datali dantu Limada dantu Jadji Nashiolo. Ten bi ja të uan datali ö mezha kichi mashi ku ja sa kubidu ku oro, ku se bi sa jamian shi nna padjil bi ja kama insienso.
David — David se bi sa alë shi fumözhö mashi dantu nna alë pövu Israel tudu. Ëli bi sa mina napai shi kichi fo pai dëli Isai. Anta pa bolo ëli zhëitë shimafan alë ö jasa jasa, ëli bi ludjadölö jabala pai dëli. Uan djia, djia shi ontolo ëli bi sa namasebu këtë këtë, se ëli pezha ku uan siganchi ngandji se ëli mata ëli.
David bi ngongo ku Nashiolo monchi. Se ëli skëvë uan sapa janta ilö da Nashiolo. Janta ineñ sai a ja sama ineñ «salmos».
Djisukilitu bi sa minadjimina alë David (Rom 1:3; Apo 22:16). Uan sapa tempu anta pa pali Djisukilitu, se nna pantafala bi bi skëvë fala nna pantafala tëjantu ku Kilitu, Savadölö shi Nashian bi ske da bi, bi sa minadjimina alë David.
denario — Denario bi sa uan djiëlu ku se a bi ska usa dantu tela ineñ nna nguë roma se bi ska domina tudu. Tempu Djisu dantu Israel se bi sa djiëlu shi a bi ska usa. Uan tabaiadölö matu uan shiölö a bi ske ja da ëli pagu uan denario da djia tabaiadu.
disipulo — Disipulo se namu shi a ja sama nna balë ineñ shi bi ska lë Djisu tudu, ku ten bi ska jonfa ëli ku ten bi ska tëndë fala dëli ku a shime ten ja fë jö ineñ ku ëli ja fala, a bi ska sama ineñ amea sai. Dantu lavulu Fidu Kuzhu a ten bi ja ma pa sama nna nguë ineñ shi ja lë Djisu ku utu fala shimafan «nna nguë ineñ shi ja këlë Djisu» ku «nna namain».
Dantu lavulu Matë, Marko, Lukas ku Zhuan, a ja limian uan sapa ope «nna deshi ku dösu disipulo». Nna nguë ineñ sai se bi sa nna nguë deshi ku dösu ineñ shi bi ska lë Djisu valadji pa ineñ ja mdja ku ëli. A ten bi ska sama ineñ nna apostol ö nna nguë ma nova bai (Mat 10:1-4). Lëë apostol.
djasubudu — Djasubudu sa uan djia valadji pa ja djiskansa. Dantu lavulu Jenesis, sa skividu fa Nashian mindji mundu dantu sëishi djia zha se ëli djiskansa ta da djia shi fë seta pakë ëli bi jaba tabaia dëli bebezha. Nashian bi faa ske ta nna nguë tudu ja fë jalëla tabaia sëishi djia, valadji pa djia shi ja fë seta pa ja djiskansa pa ja adola Nashiolo.
Nna judio bi sa ku uan sapa alë tëjantu ku djasubudu. Ineñ bi ska faa pa zhugan nguë na ta pa fë zhugan klase tabaia dantu djia sef, se bi mëtë ineñ pashian monchi ta zhugan nguë na ja tëndë alë sef. Se fë dajantu jö sai ku ineñ bi sa ku pashian ta Djisu bi kula uan nguë ku bi ska danchi uan djia djasubudu; ku ta nna balë Djisu bi ska kabela milu valadji pa ineñ kumu uan djia djasubudu, se ineñ faa ëli kuzhu fa ëli bi ska tabaia uan djia djasubudu.
Djisu — Namu Djisu ja da öiö tëndë fa «Savadölö» ö «Nashian no se sa Savadölö no». Se sa namu shi Nashiolo da mina kichi Malia, pakë ëli se bi ske sava nguë fo pekadu dëneñ (Mat 1:21). Utu namu ku a bi da Djisu sa: Djisukilitu, Mina Nashiolo, Mina Napai Dösë, Mina David.