Lubela vida dantu Jerusalen shi novu
22
Zha se anzhu se msa amu uan lubela ku aua vida,
limpi shimafan kristali,
ku bi së fo van töli Nashiolo ku dji Jabala.
2 Se ineñ bi ska jölë mete döluia san palea,
fo benda benda lubela bi sa ku ope döpa vida,
ku ja pali uan deshi ku dösu fuluta dantu anu,
unian dantu uan mëdji,
se fadöpa öpa sai se ja shivi pa kula danchi tela tela.
3 Se ala na tan ske sa ku zhugan masanf.
Töli Nashian ku dji Jabala ske sa dantu palea sai.
Se nna shividölö dëli ske ja adola ëli,
4 se ineñ ske bë ëli jala ku jala,
se ineñ ske sa ku namu dëli skividu pë ötesa dëneñ.
5 Ala na tan ske sa ku nöchif,
se na tan ske fë fata ineñ fögö lapantafa ñi dji solof,
pakë Shiölö Nashian ske ja dëdë pë ineñ.
Se ineñ ske sa gövöndölö pa sempele ku pa sempele.
6 Se anzhu faa amu:
«Fala ineñ sai sa jonfadu ku shishizhu.
Se Shiölö,
Nashian shi se da nna pantafala spitu,
se ëli da anzhu dëli bi,
valadji pa msa nna shividölö dëli jö ineñ shi ske shiga goleme».
Djisu ske bi öshi öshi
7 «¡Ja pia,
amu ske bi puluntu!
Besa se ske sa ku nguë shi ja kumpli nova nna pantafala ineñ se sa skividu dantu lavulu sai».
8 Amu,
Zhuan,
amu se sa nguë shi bë ku tëndë jö ineñ sai.
Se ta amu bë ku amu tëndë,
se amu dajözhöiö pa amu adola anzhu sai ku bi ska msa amu jö ineñ se tudu ai.
9 Mandji se ëli faa amu:
«¡Na,
na fë jö sef!
Amu sa shividölö shimafan bo ku nna namain bo nna pantafala ku a shime nna nguë ineñ shi ja kumpli fala ineñ shi sa skividu pë dantu lavulu sai.
Adola Nashian moso!».
10 Se ëli tan vlame faa amu:
«Na gada nova nna pantafala ineñ se sa skividu pë dantu lavulu sai pë kusan bof,
pakë goleme ske da tempu pa tudu kumpli.
11 Lega pa nguë fëiu ja be ja fë ja fëfëiu dëli,
pa nguë sunzhu ja be ja fë ja sunzhu dëli,
mandji pa lega pa nguë dëtu ja be ja fë shi ja djustishi pa nguë shi sa santu ja ske be ja fë ja santu santu».
12 «¡Ja pia,
amu ske bi puluntu!
Se amu ska ma ja gavu amu bi,
se amu ske da nguë tudu pagu shi ku amea fidu ja dëli mësë.
13 *Amu se sa Alfa ku Omega,
se amu se sa pimëlu ku jabamentu,
se sa jomesadu ku jabamentu».
14 Besa se ske sa ku nna nguë ineñ shi ja laba bobolonda dëneñ valadji pa ineñ të dëtu ope döpa shi ja da nguë vida,
ku pa ineñ paadji lantela dantu poto poto palea.
15 Mandji se nna jösölö ske mdja öluia,
nna nguë ineñ shi ja fë öfia,
nna nguë ineñ shi ja fë ja nda ölöluia,
nna nguë chila nguë vida folo,
nna nguë adola nashian balu,
ku nna nguë ineñ shi ja ngongo ku fanchila ku ja ska da fanchila.
16 «Amu,
Djisu,
amu da anzhu amu bi pa ëli bi da namsëdji lazhan jö ineñ shi tëjantu ku guëzha guëzha.
Amu se sa leezha shi së fo nna minadjimina alë David.
Amu se sa ntëla shi ja chila blin ta pamasedu ja bla».
17 Se Spitu Nashiolo ku mooso sai faa:
«¡Bi!».
Se nguë shi ja tëndë,
ja faa:
«¡Bi!».
Se ja sa nguë shi të fomu daua,
pa ëli bi,
se nguë shi ja ngongo ku ëli,
pa ëli bëbë aua vida dödji.
18 Se faa nna nguë ineñ shi ja tëndë nova pantafala ineñ se ku sa skividu dantu lavulu sai,
se amu da namsëdji lazhan jö sai:
Shi uan nguë ja ia uan ja pë liba,
Nashian ske ligui djisgalasa ineñ sai pë liba nguë ja chila jö ineñ shi sa skividu pë dantu lavulu sai.
19 Se shi uan nguë ja chila fala folo dantu lavulu nna pantafala,
Nashian ske chila pachi dëli fo dantu ope döpa vida ku dji palea santu,
ku sa skividu pë dantu lavulu sai.
20 Nguë shi ska da lazhan jö sai,
ja faa:
«¡Shiën,
amu ske bi öshi öshi!».
Amen.
¡Bi,
Shiölö Djisu!
21 Pa galasa Shiölö Djisu sa ku namsëdji tudu.
Amen.