Jerusalen shi novu
21
*Zha se amu bë uan ösë novu ku uan tela novu,
pakë pimëlu ösë ku pimëlu tela na tan bi tëf,
a shime ku omali.
2 *Se amu bë palea shi santu,
Jerusalen shi novu,
ku bi ska dësë fo ösë,
fo deenchi Nashiolo.
Ëli bi va öguë dëli shimafan uan namooso fumözhö ku sa bishidu ku bitidu main jazhadu ku ska gada nguë shi ske sa medu dëli.
3 Se amu tëndë uan fala atu ku bi ska së fo van töli,
se bi ska faa:
«¡Iai,
se dantu nna pöjödölö,
sa jamian shi Nashian ja ta.
Se ëli ske ja ta metadji dëneñ,
se ineñ ske sa pövu dëli,
se tuludöguë Nashiolo se ske sa ku ineñ shimafan Nashian dëneñ.
4 Se ëli ske limpa adöiö tudu fo öiö dëneñ,
se ineñ na tan ske ja mölëfa,
ñi sulafa,
ñi ja të dödöfa,
ñi duaduf,
pakë jö ineñ shi pimëlu tudu pasa bebezha».
5 Se nguë shi bi ska tusan liba töli faa:
«¡Amu tan ske vlame fë ja tudu novu!».
Se ëli ten faa:
«Skëvë,
pakë fala ineñ se sa fala sa jonfadu ku shishizhu».
6 Zha se ëli ten faa amu:
«Ja tudu sa bebezha.
Amu se sa Alfa ku Omega,
jomesadu ku jabamentu.
Ja sa nguë shi të fomu daua amu ske da ëli pa ëli bëbë aua dödji fo lubela shi ku aua dëli ja da nguë vida.
7 Nguë shi ja ngana amu ske da ëli jö ineñ sai,
se amu ske sa Nashian dëli,
se ëli ske sa mina amu.
8 »Mandji se nna nguë mendu kuzhu,
nna nguë na ja këlë Nashianf,
nna nguë nozho nozhodu,
nna nguë chila nguë vida folo,
nna nguë fë ja nda ölöluia,
nna nguë fë öfia,
nna nguë ja adola nna nashian balu ku nna nguë ja da fanchila,
ineñ tudu ske të pachi dëneñ dantu poso daua ngandji fögö ku asufre.
I sai se sa ope mölë shi ja fë dösu».
9 Se iabi lome amu uan nna anzhu seta seta ineñ shi bi sa ku pukulu seta shia ku djisgalasa seta ineñ shiki.
Se ëli faa ku amu shi:
«Bi,
se amu ske msa bo namooso sai,
ku se sa miela Jabala».
10 Se anzhu se ma amu dantu Spitu Nashiolo ba uan van iki ngandji,
se ëli msa amu palea santu,
Jerusalen,
ku bi ska dësë fo ösë,
fo Nashiolo.
11 Se palea se bi ska chila blin ku gloria Nashiolo,
se blin dëli bi sa shimafan dji uan budu ngola,
ku sa fidu uan budu jaspe ku a ja bë benda sala.
12 Ludjadu palea sai bi sa uan ögö budu atu ngandji,
ku bi sa ku uan deshi poto ku dösu,
se uan deshi anzhu ku dösu se bi ska ludja ineñ,
se poto ineñ se tudu bi sa skividu namu nna zhenchi uan deshi ku dösu nna mina Israel.
13 Poto tëishi bi ska da benda dëtu,
se tëishi bi ska da benda dji libai,
se tëishi bi ska da benda basu se tëishi bi ska da benda skedji.
14 Se ögö budu palea se bi sa liba uan deshi budu ku dösu shimafan fundamentu dëli,
se liba dëneñ se bi sa skividu namu uan deshi ku dösu apostol dji Jabala.
15 Se anzhu shi bi ska faa ku amu,
bi sa ku uan öpa budan anjana oro pa ma mindji palea sai,
ku poto dëli ku ögö budu dëli.
16 Se palea se bi sa ku bodo jatulu,
löngö dëli ku batela dëli tudu bi sa uan soso.
Se anzhu mindji palea se ku öpa budan anjana oro dëli,
se bi sa ku milidji dösu ku sentu dösu kilometro;
löngö dëli,
batela dëli ku atu dëli tudu bi sa uan soso.
17 Zha se ëli ten mindji ögö budu,
se bi ska mindji deshi sëishi ku metro shinku,
amea mindjida nna pöjödölö ku se sa i shi anzhu bi ska usa.
18 Se ögö budu sai bi sa fidu ku budu jaspe ku a ja bë benda sala,
se palea se bi sa fidu ku oro shishizhu,
shimafan kristali limpi.
19 Budu ineñ shi a ma fë fundamentu ögö budu palea sai bi sa kubidu ku klase budu ngola ngola tudu:
pimëlu bi sa fidu ku jaspe,
i shi fë dösu bi sa ku safiro,
i shi fë tëishi bi sa fidu ku agata,
se i shi fë jatulu bi sa ku esmeralda,
20 i shi fë shinku,
onise,
i shi fë sëishi ku kornalina,
i shi seta ku krisolito,
i shi fë ötu ku beliro,
i shi fë novu ku topasio;
i shi fë deshi ku krisoprasa;
i shi fë deshi ku unian ku jasinto;
i shi fë deshi ku dösu amatista.
21 Se uan deshi ku dösu poto ineñ se bi sa uan deshi ku dösu budu ngola domali.
Se unian unian poto bi sa fidu ku ponodu budu ngola domali.
Se mete döluia palea sai bi sa dji oro shishizhu,
shimafan uan kristali ku a ja bë benda sala.
22 Amu na bë zhugan jadji Nashian dantu palea sef,
pakë Shiölö Nashian shi sa Pödë Tudu iai ku Jabala ineñ se sa jadji Nashiolo.
23 Palea sai na fë fata ñi solofa ñi önuian pa dëdë pë ëlif,
pakë gloria Nashian se ja dëdë pë ëli,
se Jabala se sa lapanta dëli.
24 Nna tela tela ske ja nda dantu jamian ku fögö djidjidu dantu palea,
se nna alë tela se ske da ineñ gagavu fumözhö dëneñ.
25 Se zhugan djia se poto dëli na ske ja sa suadufa,
pakë ala na ske ja të nöchif.
26 Se a ske ma gloria tudu ba da ëli ku ondolo tela tela.
27 Se zhugan ja sunzhu na ske lantela alaf,
ñi zhugan ja nozho nozhodu fëfëiuf,
ñi nna nguë ku ja da fanchilaf,
shina nna nguë ineñ shi moso ku ja sa ku namu dëneñ skividu dantu lavulu vida ku sa dji Jabala.