Milidji danu
20
Zha se amu bë uan anzhu ku bi ska dësë fo ösë ku sevu jamian fundu shi ku a na ja bë basuf ku uan guian ngandji öma.
2 Se anzhu se fala jandömatu ku foshi dëli,
ku se sa jobolomatu shi veiu ku se sa djiabu ku Satanas,
se ëli mala ëli ku guian da uan milidji danu.
3 Se ëli zhuga ëli ba jamian fundu shi ku a na ja bë basuf,
se ëli sua ëli pë ala,
se ëli pë uan sëiu liba poto valadji pa ëli na tan ngaña nna nguë tela telaf,
fa ba toja ta ëli ja kumpli milidji danu,
zha pa tan lega ëli dantu uan fi tempu.
4 Tadashi se amu bë töli töli,
se liba dëneñ se bi ska tusan nna nguë ineñ shi bi sa ku pödë pa juzhga nguë.
Se amu ten bë nna alma nna nguë ineñ shi a bi pota ineñ gochi dajantu lazhan gavu Djisu ku tëjantu Fa Nashiolo.
Ineñ na bi adola zhiganchi ñi fesan dëlifa,
ñi ineñ na ten bi lega pa pë ineñ malka ötesa ö öma dëneñf.
Se amu bë fa ineñ tan vlame tan bi vida se ineñ ku Kilitu tan vlame sa gövöndölö liba dëneñ milidji danu.
5 Mandji se utu nna nguë ineñ shi ten bi mölë bebezha iai na tan lanta bi vidaf ba toja ta milidji danu ja kumpli.
I sai se sa pimëlu nna nguë ineñ shi tan lanta bi vida.
6 Besa ku santu se ske sa ku nna nguë ineñ shi bi sa ku pachi dantu pimëlu nna nguë ineñ shi tan lanta bi vida.
Ope mölë shi ja fë dösu na tan ske sa ku zhugan pödë liba dëneñf,
shina ineñ tudu ske sa padjil da Nashiolo ku Kilitu,
se ineñ ku ëli ske sa gövöndölö milidji danu.
Jabamentu juisio Satanas
7 Se ta ku ske kumpli milidji danu,
se a ske sota Satanas fo djili dëli,
8 se ëli ske së ba ngaña tela tela ineñ shi ja ta ponto ponto jatulu tela tela.
Sa shimafan Gog ku Magog,
dajantu pa ineñ zhunta pa ineñ pa ba pezha;
se namolo dëneñ bi ske sa shimafan alea domali.
9 Se ineñ subili liba tela amea löngö ku batela dëli,
se ineñ ludja jamian shi pövu santu ja ta,
ku palea shi ku ëli ngongo ku ëli.
Mandji se fo ösë se Nashian zhuga fögö bi liba dëneñ se ineñ tudu kama piepie.
10 Se a zhuga djiabu,
ku bi ska ngaña ineñ,
ba poso daua ngandji fögö ku asufre,
jamian shime ku a bi zhuga zhiganchi ku pantafala fanchila bai.
Se ala se a ske ja fë ineñ machi djia ku nöchi pa sempele ku pa sempele.
Jabamentu juisio nna nguë ineñ mölë bebezha
11 Se amu bë uan töli ngandji banku ku uan nguë ska tusan liba dëli.
Se fo deenchi dëli se ösë ku tela jölë,
se a na tan bë san dope dëneñf.
12 Se amu bë nna mochi,
ngangandji ku kichi kichi,
tudu mdjadu deenchi töli.
Se a bla zhugan lavulu,
se a tan bla utu lavulu,
ku se sa lavulu vida.
Se a juzhga nna mochi tudu amea jö ineñ shi ineñ fë ku jö ineñ shi sa skividu dantu lavulu ineñ sai.
13 Se omali ten da nna mochi ineñ shi bi sa ku ëli,
se mölë ku Ades ten da mochi ineñ shi ten bi sa ku ineñ,
se a juzhga ineñ tudu amea jö ineñ shi ku ineñ fë.
14 Zha se a zhuga mölë ku Ades ba dantu uan poso daua ngandji fögö.
Se poso daua ngandji sai se sa mölë shi ja fë ope shi fë dösu.
15 Se nna nguë ineñ shi namu dëneñ na sa skividu pë dantu lavulu vidaf ai,
se a zhuga ineñ ba dantu poso daua ngandji fögö.