Uan möi pöjödölö ja faa Aleluia
19
Ta jö ineñ se tudu pasa,
se amu tëndë uan fala atu fo dantu uan sapa möi pöjödölö ösë,
ku bi ska faa:
«¡Aleluia!
Savasan ku ilö ku pödë tudu sa ja Nashian no,
2 pakë juisio dëli sa vedadji ku dëtu.
Se ëli kondena mooso dölöluia shi ngandji,
ku ja fë ja nda ölöluia dëli se ëli ja të tela të vla fë ja fëiu.
Se bo ten ske fë djustishi sangui nna shividölö Nashiolo ku jölë fo öma dëli».
3 Zha se ineñ tan vlame faa:
«¡Aleluia!
Se igögö dëli ja subili pa sempele ku pa sempele».
4 Tadashi se vinta jatulu nna pai veveiu ku nna ja vivu jatulu ineñ sai tudu dajözhöiö ba toja san se ineñ adola Nashiolo,
ku bi ska tusan liba töli.
Se ineñ bi ska faa:
«¡Amen,
Aleluia!».
5 Se fo van töli se a tëndë uan fala ku bi ska faa:
«¡Namsëdji tudu alaba Nashian no,
nna shividölö dëli tudu,
nna nguë ngangandji ku nna nguë kichi kichi,
ku mendu dondolo ngandji se namsëdji ja shivi ëli!».
6 Se amu tëndë fala shimafan dji uan möi pöjödölö,
shimafan ta aua ja pono fo van lapa shimafan dji uan fala lonjadaua.
Se ineñ bi ska faa:
«¡Aleluia!,
pakë Shiölö jomesa ja sa gövöndölö bebezha,
Nashian no shi sa Pödë Tudu.
7 No të liguilia,
ku fëntë
pa no ten da ëli gloria,
pakë tempu la da zha djia jazha Jabala.
Se miela dëli jözhë öguë pë bebezha.
8 Se a lega ëli pa ëli bishi bitidu
ku öjözhë lanlan,
limpi ku ja chila blin».
(Öjözhë lanlan degadu sai se ja msa fidu ja dëtu nna santu santu).
9 *Se anzhu se faa amu:
«Skëvë:
¡Besa sa ku nna nguë ineñ shi a sama bi bankëtë jazha Jabala!».
Se ëli tan vlame faa:
«Ineñ sai se sa fala vedadji Nashiolo».
10 Tadashi se amu dajözhöiö ope anzhu sai pa amu adola ëli.
Mandji se ëli faa amu:
«¡Na,
na fë jö sef!
Amu sa shividölö shimafan bo ku nna namain bo ineñ shi ska lë jö ineñ shi Djisu da nguë lazhan.
¡Adola Nashian moso!,
pakë lazhan gavu Djisu se sa spitu shi ja da fala pantafala shizhu».
Nguë shi sa liba javalu banku
11 Se amu bë ösë bi sa bladu,
ja pia,
se bi sa ku uan javalu banku,
se nguë shi bi sa liba dëli a bi ska sama ëli Jonfadu ku Vedadji,
pakë ëli bi ska juzhga nguë ku dëtu se ëli ja pezha ku djustishi.
12 Se öiö dëli bi sa fidu bazha fögö,
se ëli bi sa ku uan sapa jölöiö jasa dëli.
Se ëli bi sa ku uan namu skividu ku zhuga nguë na bi jönsëfa shina ëli moso.
13 Ëli bi sa bishidu ku bitidu maladu ku sangui,
se namu dëli se sa «Fa Nashiolo».
14 Se nna sodadji dösë,
bi ska lë ëli ku javalu tudu banku,
bishidu ku bitidu öjözhë lanlan degadu,
banku ku sa limpi.
15 *Se fo böjö dëli se ja së uan jatana jotadu,
valadji pa ëli fë tela tela mali,
se ëli ske sa gövöndölö ku budan donfelu.
Se ëli me,
se ja pope pali döpa uva valadji pa ëli chila vian shi ku a ska pema se sa pashian ngandji sa ku Nashian shi sa Pödë Tudu.
16 Se bitidu dëli ku liba pena dëli bi sa skividu namu sai:
ALË NNA ALË KU
SHIÖLÖ NNA SHIÖLÖ.
Nguë shi sa liba javalu banku ngana zhiganchi
17 Se amu bë uan anzhu ku bi sa mdjadu liba solo,
se ta kidëlë ku foshi da paatu ineñ shi ja ska vaa mete dösë ja faa ineñ:
«Namsëdji bi,
pa zhunta da taba bankëtë Nashiolo,
18 valadji pa namsëdji kumu jañi nna alë,
ku dji nna jatan jatan ku dji nna liku;
ku dji nna javalu ku dji nna nguë ineñ shi ja sa liba dëneñ,
jañi nna klase nguë tudu;
nna nguë legadu ku sëlëva,
fo nna nguë ngangandji ba toja nna nguë kichi kichi».
19 Tadashi se amu bë zhiganchi ku alë mundu sai ku nna sodadji dëneñ tudu,
ku se ineñ tudu zhunta valadji pa ineñ pezha ku nguë shi bi sa liba javalu banku a shime ku nna sodadji dëli.
20 *Se öma kë zhiganchi zhuntadu ku pantafala fanchila shi bi ska fë shinali ngangandji deenchi dëli iai.
Ku se sa ineñ shi ëli ma ngaña nna nguë ineñ shi tudu bi lega pa ineñ fë shinali zhiganchi se ineñ ja adola fesan dëli.
Tadashi se a zhuga zhiganchi ku pantafala fanchila vivu ba poso daua ngandji fögö ku asufre.
21 Se utu nna nguë ineñ shiki tudu a chila ineñ vida folo ku jatana shi bi ska së fo böjö nguë shi bi sa liba javalu banku iai,
se paatu tudu jansa da kumu jañi dëneñ.