Babilonia pono da san
18
Ta ku jö ineñ se tudu pasa,
se amu bë utu anzhu ku bi ska dësë fo ösë ku uan pödë ngandji,
se tela vla djidjidu ku gloria dëli.
2 *Se ëli ta kidëlë ku uan falagochi atu:
«¡Ëli pono!
¡Ëli pono Babilonia shi ngandji!
Se ëli vla fë jochian nna damono,
iöjö klase spitu fëiu tudu,
iöjö klase paatu sunzhu sunzhu tudu,
ku iöjö nna limaia sunzhu sunzhu ku nozhodu.
3 Pakë nna tela tela tudu bëbë
fo vian pa ja fë ja nda ölöluia dëli,
se nna alë tela ja fë ja nda ölöluia ku ëli,
se nna nguë fë nongosu mundu se tudu
vla fë liku dajantu ja lanlan dëli ineñ shi ëli ja patanta iai».
4 Se amu tan tëndë uan fala fo ösë,
ku bi ska faa:
«Namsëdji tudu së fo palea sai,
pövu amu,
valadji pa namsëdji na ja sa zhunta ku pekadu dëneñf,
ñi pa djisgalasa dëneñ na bi liba namsëdjif;
5 pakë pekadu dëneñ tudu fë mampuna ba toja van ösë,
se Nashian lambela ja fëfëiu dëneñ.
6 Namsëdji ten da ëli pagu djiëlu shime ku ëli ten ja da nguë;
da ëli pagu dösu jö ineñ shi ku ëli fë.
Zhunta uan bëbë ödu dösu mashi
ku i shi ëli bi zhunta da nna dji utu nguë.
7 Ku mindjida shime se ëli ja da këlëdöguë
ku vida ja lanlan.
Pa da ëli tomenta ku modoia.
Pakë fo dantu kusan dëli se ëli ja fëntë:
“Amu ja ska tusan shimafan uan miela dalë.
Amu na sa mainvivafa ñi amu jabötu na ske ma mavidaf”.
8 Dajantu shi,
se uan ponodu djia se ske bi djisgalasa dëli tudu:
mölë,
modoia ku fomu.
Se a ske kama ëli ku fögö.
Pakë ëli se sa Shiölö Nashian shi ja juzhga ëli».
9 Ta nna alë tela tela ja fë ja nda ölöluia ku mooso sai se ineñ da öguë dëneñ ku vida lanlan dëli,
se sa öshi ku ineñ ske ja bë igögö fögö shi ku ske ja kama ëli,
se ineñ ske ja sula ku duadu da ëli.
10 Se ineñ mdja löndji dajantu ineñ ska mendu jatigu sai,
se ineñ ske ta kidëlë:
«¡Ëlë lë!
¡Ëlë lë lë da bo,
palea shi ngandji,
Babilonia,
taba palea shi ödu mashi!
¡Pakë dantu uan ola soso se bi jatigu se ske bi juisio!».
11 Se nna nguë nongosu mundu sai tudu ten ske ja sula se ineñ ske ja fë dödö dajantu dëli,
pakë na tan ske të nguë pa ja kumpa jalga dëneñf:
12 jalgamentu oro,
ku plata,
ku budu fumözhö fumözhö ku budu ngola domali;
panu öjözhë lanlan degadu ku böbö kulu ku dji seda,
ku dji böbö;
ku klase taaba ope döpa sedro ku uan sapa ja fidu ku marfil,
ku uan sapa ja ku a fë ku taaba fumözhö fumözhö ku dji jubil,
ku onfelu ku budu banku;
13 jalgamentu joja döpa shi a ja sama kanela ku ja fadöpa ineñ ja sa ku sëlu gavu;
ku insienso,
mirra ku adjimiolo,
ku vian,
ku zhëitë,
tulugu menme ku dji öpa tulugu,
limaia gaga jalga ku dji jabala;
javalu,
ja jölësan javalu ba toja vida nna pöjödölö ku a ja vëndë shimafan sëlëva.
14 Se ineñ ske faa:
«Bo na tan sa ku fuluta gödö gödö ineñ shi
bo ku alma bo tudu bi dishia a shi ief;
se bo pëndë ja gagavu ku ja fëntë fëntë bo tudu
se zhugan djia se bo na tan ske bëf».
15 Se nna nguë ineñ shi bi ska fë nongosu ku jö ineñ se tudu ineñ vla fë liku dajantu ëli,
se ineñ tudu mdja löndji da mendu shi ineñ ska të dajantu jatigu.
Ineñ ske sula ku ja fë dödö,
16 se ineñ ske faa:
«¡Ëlë lë!
¡Ëlë lë lë da bo,
palea shi ngandji
bishidu ku öjözhë degadu,
ku kololi böbö kulu ku böbö,
ku ja fëntë fëntë ku oro,
ku budu fumözhö fumözhö ku budu ngola domali.
17 Pakë se dantu uan ola soso se gagavu tudu vla fea feadu!».
Se nna jatan navian tudu ku nna nguë ineñ shi ja ska fë vadji dantu navian,
nna maliëlu ku nna nguë ineñ shi ja ngana vida ku omali,
se ineñ mdja löndji.
18 Se ta ineñ ba bë igögö kamadu palea,
se ineñ ta kidëlë:
«¿Kë utu palea shi paadji sa shimafan taba palea sai?».
19 Se ineñ ske fë dödö,
ja sula ku ja të dölö ku kidëlë:
«¡Ëlë lë!
¡Ëlë lë lë da bo,
palea shi ngandji,
ku gagavu dëneñ se ineñ tudu vla fë liku
da nna shiölö navian ineñ shi liba domali!
¡Se dantu uan ola soso se ja tudu vla fea feadu!».
20 ¡Të liguilia,
bo ösë,
dajantu jö shi shiga iai!,
pa namsëdji ten të liguilia,
nna pövu santu,
pa namsëdji ten të liguilia,
nna apostol ku nna pantafala,
pakë Nashian,
ta ske juzhga ëli,
se sa öshi ëli fë djustishi da namsëdji.
21 Tadashi se uan anzhu ku sa pödë lanta uan budu,
ku sa fidu uan budu mla kuzhu,
se ta ëli zhuga ba omali se ëli faa:
«Se sa amea shi ëli,
Babilonia,
palea shi ngandji,
se sa amea shi a ten ske të ëli të lolo ku foshi ödu shime,
se jabötu se a na tan ske bë ëli mashif.
22 Se jabötu se a na tan ske tëndë ja tëjantu ku bof,
ñi falagochi nna nguë jantaf,
ñi fala pandëfa,
ñi fala pandë batelafa ku fala pituf.
Se zhugan djia se a na tan ske bë,
zhugan nguë ku sa ku fisuf.
Se zhugan djia se a na tan ske tëndë bof,
ñi tomenta budu mla jaf.
23 Se zhugan djia se fögö na tan ska chila blin,
fo zhugan fögö lapantaf.
Se zhugan djia se a na ske tëndë fo bo
liguilia fo fesa jazhaf.
Pakë nna nguë fë nongosu bo
ineñ sa nna nguë liku liku ngandji mundu.
Pakë ku öfia ineñ shi sa ku bo,
se bo ngaña tela tela tudu.
24 Pakë dantu bo se a bë sangui nna pantafala ku dji nna santu santu,
ku dji nna nguë ineñ shi tudu a chila vida folo dantu tela sai».