Mooso dölöluia subidu liba zhiganchi
17
Uan nna anzhu seta seta ineñ shi bi sa ku pukulu seta ineñ sai,
iabi lome amu se ëli faa amu:
«Bi,
pa amu msa bo jatigu mooso dölöluia shi ngandji ku ska tusan liba uan sapa daua.
2 Se nna alë mundu sai tudu ja fë ja nda ölöluia ku mooso sai,
se nna nguë tela tudu beda ku vian ja fë ja nda ölöluia».
3 *Zha,
se anzhu ma amu dantu Spitu Nashiolo ba jamian sölö sölö.
Se ala bi sa ku uan mooso subidu liba uan zhiganchi böbö,
ku se sa nguë shi bi sa bishidu ku namu zhogoveadu tëjantu ku Nashiolo se ëli bi sa ku jasa seta ku uan deshi jonjo.
4 Se mooso se bi sa bishidu ku uan bitidu ku kololi böbö kulu ku böbö,
se ëli bi ska fëntë ku oro,
ku budu fumözhö fumözhö ku budu ngola domali,
se öma dëli bi sa ku uan pukulu oro ku sa shia ku ja nozho nozhodu ku ja sunzhu sunzhu ku ja fë ja nda ölöluia faladu.
5 Se ëli bi sa ku uan namu skividu ötesa dëli:
BABILONIA SHI NGANDJI
MAIN NNA NAAMAIN DÖLÖLUIA TUDU
KU JA NOZHO NOZHODU INEÑ SHI SA MUNDU SE TUDU.
6 Zha se ba da amu ötëndë fa mooso sai bi sa bedadu da sangui nna santu santu,
ku dji sangui nna nguë ineñ shi mölë dajantu jö ineñ shi ja da lazhan gavu tëjantu ku Djisu.
Ta amu ba ku öiö ba bë ëli se amu gua ku böjö betu.
7 Tadashi se anzhu se faa amu:
«¿Jama fë bo gua ku böjö betu?
Amu ske da bo lazhan vedadji kumi jö shi sa ku mooso sai ku dji zhiganchi jasa seta ku uan deshi jonjo.
8 *Se zhiganchi se ku bo ska bë iai sa unian ku bi ska ta tudjia,
mandji ëli na tan saf,
se goleme se ëli tan ske subili fo jamian fundu shi ku a na ja bë basuf,
mandji se ëli ska të öguë dëli të fea fea.
Se nna nguë ineñ shi ska ta mundu ku namu dëneñ na sa skividu pë dantu lavulu vidaf,
se ineñ ske sombela ta ineñ ske bë zhiganchi shi bi sa bebezha iai,
pakë tudjia ëli bi sa,
se ëli na tan saf,
mandji se ëli tan ske vlame bi.
9 »Jö sai,
se sa jö shi sa tëndëmentu sëbëdölö.
Jasa seta seta ineñ sai se sa iki seta seta ineñ shi ku mooso sai ja sa liba dëli ja tusan.
Ku a shime ten sa shimafan alë seta seta ineñ sai,
10 se alë shinku dantu alë ineñ sai tudu pono bebezha,
uan ineñ se sa gövöndölö öseshi,
se ëli shiki ontolo na sa bif.
Mandji se ta ëli ja bi,
ëli tan ske ta uan tempu kutu.
11 »Se zhiganchi shi se ku tudjia bi sa iai ku öseshi ku ëli na tan sa ief ai,
se sa alë shi fë ötu,
benga zha pa ëli sa dantu nna alë seta ineñ sai,
se ëli ten ska të öguë dëli të fea fea.
12 Se uan deshi jonjo ineñ shi bo bë iai,
sa uan deshi alë ineñ sai ku ontolo ineñ na sa jomesa sa gövöndölöf,
mandji se dantu uan ola,
se ineñ ske të pödë pa ineñ jomesa ja sa gövöndölö shimafan alë,
zhuntadu ku zhiganchi.
13 Se uan deshi alë ineñ se tudu ku uan fala soso,
se ineñ ske da zhiganchi sai,
pödë ku odji dëneñ.
14 Ineñ tudu ske pezha ku Jabala,
mandji se Jabala ske ngana ineñ,
pakë ëli se sa Shiölö nna shiölö,
ku Alë nna alë,
se nna nguë ineñ shi ku ëli ja ta,
sa nna nguë ineñ shi ku a sama,
nna nguë ineñ shi ku a ma ku nna nguë ineñ shi ja jonfa ëli».
15 Se a shime anzhu se tan faa amu:
«Aua ineñ se bo bë iai,
jamian shi mooso dölöluia ja ska tusan,
se sa nna pövu,
nna möi pöjödölö,
tela tela ku fala fala.
16 Se nna uan deshi jonjo ineñ shi bo bë iai ku zhiganchi ske të pashian mooso dölöluia,
se ineñ ske lega ëli pa ëli sa ëli moso ku gödödji,
se ineñ ske nguli öguë dëli,
se ineñ ske të öguë dëli të fea fea ku fögö.
17 Pakë Nashian se pë dantu kusan dëneñ jö shi ëli ngongo pa ineñ fë:
pa ineñ sa ku uan fala soso,
valadji pa ineñ da zhiganchi pödë alë dëneñ,
ba toja pa fala ineñ shi Nashian fala iai tudu kumpli.
18 Se mooso shi bo bë iai se sa palea ngandji shi ku sa liba nna alë tela».