Pukulu seta pashian Nashiolo
16
Se amu tëndë uan fala atu,
ku bi ska së fo dantu jadji Nashian ku bi ska ta kidëlë pë nna anzhu seta seta ineñ sai:
«Namsëdji bai pa ba buka pukulu seta ineñ se sa shia pashian Nashiolo iai pë liba tela».
2 Se anzhu shi pimëlu bai se buka pukulu dëli pë liba tela;
se nna nguë ineñ shi sa ku shinali zhiganchi ku ja adola fesan dëli tudu,
se së ineñ uan fida fëiu ku nozhodu.
3 Se anzhu shi fë dösu buka pukulu dëli pë liba domali,
se asaga vla fë sangui,
shimafan ta a ja chila nguë vida folo;
se jö ineñ shi bi sa vivu dantu domali tudu mölë.
4 Se anzhu fë tëishi buka pukulu dëli pë liba lubela ku mina lubela tudu,
se tudu vla fë sangui.
5 Zha se amu tëndë anzhu shi sa ku pödë liba daua ska faa:
«Bo se sa dëtu,
bo se sa Santu,
bo se sa se bo se bi sa,
pakë bo se ja juzhga shi.
6 Pakë ineñ se jölë sangui pövu santu ku dji nna pantafala,
se bo ten da ineñ sangui pa ineñ bëbë,
pakë se sa jö shi ku ineñ mësë».
7 Se amu ten tëndë datali ska kundji:
«Shiën,
Shiölö Nashian shi sa Pödë Tudu,
se shishizhu ku dëtu se sa juisio bo tudu».
8 Se anzhu shi fë jatulu buka pukulu dëli pë liba solo,
se a da ëli pödë pa ëli kama nguë tudu ku fögö.
9 Se nguë tudu vla kama kamadu fëiu,
se ineñ faa namu Nashiolo ku fala zhogoveadu,
ku se të pödë liba djisgalasa ineñ sai,
mandji se ineñ na tan vla ku ope tashifa ñi pa ineñ da ëli gloriaf.
10 Se anzhu shi fë shinku buka pukulu dëli pë liba töli zhiganchi,
se gövöndölö zhiganchi vla fë jamian kulu.
Se nna nguë tudu bi ska munda lunga dëneñ da duadu,
11 mandji,
se ineñ na chama fë ja fëfëiuf,
shina dajantu duadu dëneñ ku fida dëneñ se ineñ bi ska ta fala zhogoveadu da Nashian dösë,
mandji se ineñ na tan vla ku ope tashi fo fidu ja fëfëiu dëneñf.
12 Se anzhu shi fë sëishi buka pukulu dëli pë liba taba lubela Eufrates,
se aua lubela se soja valadji pa nna alë bosai paadji pasa.
13 Se amu bë amea shi fo böjö jandömatu,
ku fo böjö zhiganchi ku fo böjö pantafala fanchila,
ska së spitu fëfëiu tëishi ku bi sa shimafan lajachisa kutu daua.
14 Ineñ bi sa spitu nna damono,
ku bi ska fë shinali ngangandji se ineñ bi ska zhunta nna alë mundu nguintëlu nguintëlu tudu valadji pa ineñ ba pezha ta ske da djia ngandji Nashian shi sa Pödë Tudu.
15 *«Pinchidu,
amu ske bi shimafan uan futadölö.
Besa se ske sa ku nguë shi ja sa jodadu ku ja sa ku bitidu dëli öma,
valadji pa ëli na nda gödödjifa,
ku pa ëli na ma govan dajantu gödödji dëlif».
16 Se spitu nna damono zhunta nna alë pë uan jamian ku fala tela ebreo a ja sama Armagedon.
17 Se anzhu shi fë seta buka pukulu dëli pë fiezha,
se fo van töli jadji Nashiolo se së uan fala atu ku bi ska faa:
«¡Jaba bebezha!».
18 *Tadashi se fë lali,
ku santababla,
lonjadaua ku uan san vlamëtë ödu.
Se na sa të zhugan djia shi ie zhaf anta ku mundu bi të nna pöjödölö iai.
19 Se taba palea se pachi fë tëishi,
se palea palea mundu tudu lolo;
se Nashian lambela taba palea shi a ja sama Babilonia,
valadji pa da ëli bëbë fo pukulu vian pashian ödu jatigu dëli.
20 *Se ië tudu jölë se iki tudu së folo ku supichi.
21 *Se fo ösë se pono da liba nna pöjödölö uan taba iku budu daua fiiu ku bi ska pizha mashi ku deshi jatulu kilo,
se nna pöjödölö sa fa ja faa fala zhogoveadu tëjantu ku Nashiolo dajantu djisgalasa ngandji sai.