Nna anzhu seta ku djisgalasa seta
15
Se amu bë ösë utu shinali ngandji ku ten fumözhö:
anzhu seta ku djisgalasa seta,
ku ineñ se sa jabamentu,
pakë ku ineñ se pashian Nashian ske jaba.
2 Se a shime se amu ten bë uan ja ku bi sa shimafan uan omali kristali zhuntadu ku fögö,
se bodo domali kristali sai.
Se bi sa mdjadu,
bi sa ku nna nguë ineñ shi se ngana zhiganchi,
ku fesan dëli,
ku namolo namu dëli.
Se ineñ bi sa ku pandë shi Nashiolo bi da ineñ ai.
3 Se ineñ bi ska janta janta Moises,
shividölö Nashiolo,
ku janta dji Jabala:
«Ja ngangandji ku ja fumözhö fumözhö se sa fidu ja bo,
Shiölö Nashian shi sa Pödë Tudu.
Dëtu ku shishizhu se ja sa jamangandji bo tudu,
Alë tela tela.
4 ¿Kë nguë na ske mendu bof,
ö Shiölö?
¿Kë nguë na ske adola namu bof?
Pakë bo moso se sa santu;
tela tela tudu ske bi bi
pa bi adola bo,
pakë a bi msa juisio bo tudu
fidu ja djustishi bo».
5 Ta jö ineñ se tudu pasa,
se amu pia,
se a bla ösë jadji Nashiolo,
ku se sa limada dji lazhan gavu.
6 Se fo jadji Nashiolo se së anzhu seta seta ku bi sa ku djisgalasa seta ineñ sai.
Ineñ bi sa bishidu ku öjözhë limpi ku ja chila blin,
se ineñ bi sa ku shinta oro ba toja böjö kusan.
7 Se uan ja vivu jatulu ineñ sai da uan nna anzhu seta seta ineñ se uan pukulu oro ku bi sa shia pashian ödu Nashiolo,
ku se ja sa vivu pa sempele ku pa sempele.
8 Se jadji Nashiolo bi sa shia igögö ku bi ska së fo gloria Nashiolo ku pödë dëli,
se zhugan nguë na bi paadji lantelaf ba toja ta kumpli djisgalasa seta ineñ shi nna anzhu seta seta ineñ sai.