Jabala ku möi pöjödölö ku na të nodaf
14
*Se amu pia,
ja pia,
se Jabala bi së shi ku supichi,
se ëli bi sa mdjadu liba iki shi a ja sama Sion.
Se ku ëli bi sa uan sentu milidji ku deshi jatulu ku jatulu pöjödölö ku bi sa ku namu Jabala ku dji Pai dëli skividu pë ötesa dëneñ.
2 Se amu tëndë uan fala ku bi ska fo ösë,
se bi sa shimafan ta aua ja pono fo van lapa ku shimafan dji uan fala lonjadaua,
se fala bi sa shimafan dji uan sapa nna nguë ska da pandë.
3 Se ineñ tudu bi ska janta uan janta novu deenchi töli nna ja vivu jatulu ineñ sai ku nna pai veveiu.
Se zhugan nguë na paadji shina janta sef,
shina nna sentu milidji ku deshi jatulu ku jatulu pöjödölö ineñ sala moso ku se a sava fo dantu nna nguë ineñ shi bi sa dantu tela.
4 Nna nguë ineñ sai se pë öguë dëneñ shin noda,
ineñ na matea jönsë naamainf.
Ineñ se sa nna nguë ineñ shi se ja lë Jabala ja sa jamian shi ku ëli ja ska ba iai.
Se ineñ se a sava fo dantu nna napai tudu shimafan pimëlu fuluta nna pöjödölö da Nashiolo ku a da Jabala.
5 Se a na dajonta ku zhugan fanchila böjö dëneñf,
pakë ineñ bi sa shin noda deenchi töli Nashiolo.
Pali döpa san tela sa bibidu
6 Zha se amu bë utu anzhu,
ku bi ska vaa metadji ösë se ëli bi sa ku evanjelio chindadji valadji pa ëli pegua da nna nguë ineñ shi ja ta mundu,
dantu tela tela tudu,
zhenchi tudu ku fala tudu ku pövu tudu.
7 Se ëli bi ska faa ku fala atu:
«Namsëdji mendu Nashiolo,
pa namsëdji ja da ëli gloria,
pakë da tempu shi ëli ske juzhga nguë bebezha.
Namsëdji adola nguë shi fë ösë ku tela,
omali ku lubela tudu».
8 *Se bi ska lë ëli anzhu shi fë dösu,
ku bi ska faa:
«¡Ëli pono!
Ëli pono Babilonia shi ngandji,
pakë ëli se fë se tela tela tudu bëbë vian ku ja fë ja nda ölöluia dëli».
9 Zha se tan lë ëli utu anzhu shi fë tëishi,
ku bi ska faa ku fala atu:
«Shi uan nguë ja adola zhiganchi ku fesan dëli,
se ëli ja lega se a ja pë ëli shinali dëli ötesa ö öma dëli,
10 ëli ske ta pa ëli ten bëbë vian pashian Nashiolo,
ku sa ja a fë vadu dantu pukulu ku pashian,
se ske sa jatigu dëli ku fögö ku asufre deenchi nna anzhu santu ku Jabala.
11 Se igögö jatigu dëli ske subili pa sempele ku pa sempele.
Se ëli na ske djiskansa djiafa ñi nöchif ja adola nna nguë ineñ shi ja da zhiganchi ku fesan dëli ku nguë ineñ ten ja lega pa pë ineñ malka ku namu dëli».
12 Se sa jö sai ku pashiensa nna santu dëli,
ku ineñ se ja tëndë mandamentu Nashiolo ku pa ineñ ja ska jonfa Djisu.
13 Tadashi se amu tëndë uan fala fo ösë ku bi ska faa:
«Skëvë jö sai:
Besa se ske sa fo ödjai be deenchi da nna nguë ineñ shi ja mölë zhuntadu ku Shiölö».
Se Spitu Santu faa:
«Shiën,
ineñ ske djiskansa da tabaia dëneñ,
pakë fidu tabaia dëneñ ske ja lë ineñ».
Totolo pali döpa dantu tela
14 Se amu pia,
ja pia,
se bi sa ku uan növu banku,
se liba növu banku se bi ska tusan uan masebu ku bi sa «shimafan Mina Napai Dösë».
Se ëli bi sa ku uan jölöiö oro,
se ëli bi sa ku öma dëli faladu uan faja joki.
15 Se tan së utu anzhu fo dantu jadji Nashiolo,
ja ta kidëlë ku fala atu da nguë shi bi ska tusan liba növu iai:
«Mëtë faja joki pa bo lanja jö shi ku bo shimian iai;
pakë tempu da zha,
se pali döpa san tela sa bibidu bebezha».
16 Se nguë shi ska tusan liba növu mëtë faja joki pë liba tela,
se ëli totolo ja fo tela.
17 Se utu anzhu tan së fo jadji Nashian shi ku sa ösë,
ku a shime ten bi sa ku uan faja joki.
18 Se fo datali se tan së utu anzhu,
ku bi sa ku pödë liba fögö,
se ëli ta kidëlë da nguë shi bi sa ku faja joki iai:
«Mëtë faja joki bo,
pa bo pota ope döpa matu uva san tela sai,
pakë uva dëli tudu sa bibidu bebezha».
19 Se anzhu ma faja joki dëli se ëli pasa liba tela,
se ëli pota pali döpa uva tela tudu,
zha se ëli totolo se ta ba dantu taba jamian pema pashian Nashiolo.
20 *Se a pema pali döpa uva fo ölöla palea,
se fo jamian shi a pema se së sangui,
ba toja jö shi a ja ma da topu javalu dantu uan jamian batela sentu tëishi kilometro.