Zhiganchi subili fo dantu domali
13
Se jandömatu ta mdjadu bodo domali.
*Tadashi se amu bë amea shi zhiganchi ku bi sa ku jasa seta ku uan deshi jonjo bi ska subili fo dantu domali.
Se bi sa ku uan jölöiö liba deshi jonjo ineñ sai,
se liba jonjo tudu bi sa ku uan jölöiö,
se liba jasa tudu se bi sa skividu uan namu zhogoveadu tëjantu ku Nashiolo.
2 Se zhiganchi shi amu bi bë iai,
bi sa fidu uan ngatu djiga ngandji;
se ope dëli bi sa shimafan dji özhu,
se böjö dëli bi sa shimafan dji uan lian.
Se jandömatu da zhiganchi pödë dëli ku töli dëli,
ku odji ngandji dëli.
3 Se uan jasa zhiganchi se bi sa ku uan bagadu mölë,
mandji se a kula fida sai,
se mundu nguintëlu nguintëlu gua ku böjö betu se nguë tudu sa fa ja lë zhiganchi.
4 Se nguë tudu sa fa sa shivi jandömatu,
pakë ëli bi da zhiganchi odji dëli,
se a ten shivi zhiganchi,
ja faa:
«¿Kë nguë sa shimafan zhiganchi,
se kë nguë ske paadji pezha ku ëli?».
5 A shime a ten lega zhiganchi pa ëli faa fala ngangandji zhogoveadu,
ku pa ëli ten të pödë dantu deshi jatulu ku dösu mëdji.
6 Se ëli faa fala zhogoveadu tëjantu ku Nashiolo,
ku pa ëli ten ta namu dëli masan ku jadji dëli ku nna nguë ineñ shi ja ta ösë.
7 Se a ten lega pa ëli pezha tëjantu ku nna santu santu,
se ëli ngana ineñ;
se a da ëli pödë liba zhenchi tudu,
ku pövu tudu,
ku fala tudu ku tela tela tudu.
8 Se nna nguë ineñ shi ja ta tela tudu adola zhiganchi ku namu dëneñ na sa skividu pë dantu lavulu vidaf,
lavulu Jabala shi a ma fë saklifisu fo djia shi a mindji mundu.
9 Nguë shi ja sa ku olea,
pa ëli tëndë.
10 Se shi a ja ma uan nguë ba djili,
djili se ëli ska bai;
se shi uan nguë ja chila ëli vida folo ku jatana,
ku jatana jotadu se ëli ten ja mölë.
Se jö sai se sa pashiensa ku jonfa nna santu santu.
Zhiganchi subili fo basu dösan
11 Zha se amu bë utu zhiganchi,
ku bi ska subili fo san tela.
Ëli bi sa ku jonjo dösu ku bi sa shimafan dji uan jabala,
mandji se ëli bi ska faa fala shimafan jandömatu.
12 Se ëli bi sa ku pödë shi bi sa ku zhiganchi shi bi sa pimëlu iai,
se ëli bi sa deenchi dëli.
Se ëli bi ska fë pa tela tela ku nna nguë tela tudu ja shivi pimëlu zhiganchi,
i shi a bi kula fida mölë dëli iai.
13 A shime ëli ten bi ska fë zhugan shinali ngangandji,
ba toja ku ëli bi ska fë pa fögö ja pono fo ösë bi tela,
deenchi öiö nguë tudu.
14 Se ku shinali ineñ sai se a lega ëli pa ëli fë deenchi pimëlu zhiganchi ai,
se ëli ngaña nna nguë ineñ shi bi ja ta tela tudu,
se ëli da ineñ odji pa ineñ fë uan fesan pa ja da zhiganchi ondolo,
pakë benga zha pa ëli bi sa ku uan fida jatana,
se ëli tan vlame të vida.
15 Se a bi da zhiganchi shi fë dösu iai fiezha valadji pa ëli da fesan pimëlu zhiganchi vida,
valadji pa fesan se faa fala ku pa ëli ten chila nna nguë ineñ shi na ja shivi fesan dëlifa vida folo.
16 A shime se ëli ten fë pa nguë tudu,
nna nguë ngangandji ku nna nguë kichi kichi,
nna liku ku nna puvili nna nguë legadu ku nna sëlëva,
pa pë ineñ uan malka liba döma dëtu ö ötesa.
17 Valadji pa zhugan nguë na paadji kumpafa ñi vëndëf,
shi ëli na ja sa ku malka sai ö namu zhiganchi sef,
ö namolo ineñ shi zhunta fë namu dëlif.
18 Se jö sai se sa sëbëdölö;
se nguë shi ja sa ku tëndëmentu,
pa ëli ja jonta namolo zhiganchi,
ku sa namolo uan pöjödölö.
Se namolo sai sa sentu sëishi ku deshi sëshi ku sëshi.