Nna nguë dösu ineñ shi bi sa ala
11
Tadashi se a da amu uan vala anjana ku tan kë uan öpa anjana ineñ shi a ja ma mindji;
se a da amu odji:
«Lanta pa bo ma mindjida jadji Nashian ku dji datali,
ku pa bo jonta jantu nguë ku ja fo adola ala.
2 *Mandji bo na ja mindji balandia pachi döluia dantu jadji Nashianf,
pakë sa ja a da nna nguë ineñ shi na sa judiof,
ku sa nna nguë ineñ shi ske ja pope palea santu dantu deshi jatulu ku dösu mëdji.
3 Se amu ske da nna nguë dösu amu lazhan,
pa ineñ pantafala dantu uan milidji ku sentu dösu ku deshi sëishi djia,
bishidu ku bitidu luto».
4 Se pantafala dösu ineñ se bi sa ala iai se sa nna öpa olivo dösu,
se nna öpa jandjia ineñ shi ku ja ta deenchi Shiölö tela.
5 Shi uan nguë ja ngongo fë ineñ mali,
ineñ ja zhuga fögö fo böjö dëneñ ku ja kama nna namigu dëneñ ntëlelele.
Se sa amea shi nna nguë ineñ shi ja fë ineñ mali tudu ja mölë.
6 Se ineñ sa ku pödë pa ineñ sua ösë,
valadji pa aua na daf dantu djia ineñ shi ineñ ska da nova pantafala;
a shime ineñ ten sa ku pödë pa ineñ tuka aua ba sangui pa amea se pa ineñ fë pa tela padësë klase djisgalasa tudu,
amea shi ineñ ja të vintadji.
7 *Mandji se ta ineñ ja chama da lazhan jö ineñ shi shiga ineñ iai,
se zhiganchi shi subili fo jamian fundu shi ku a na ja bë basuf ske pezha ku ineñ,
se ëli ske ngana ineñ,
se ëli ske chila ineñ vida folo.
8 Se mochi dëneñ ske sëndë sëndë pë mete döluia palea shi ngandji amea spitu dantu jamian shi a bi da Shiölö pë kusu iai,
ku a ja sama Sodoma ku Ejipto amea shi a ja da öiö tëndë.
9 Se zhugan nna pövu,
ku nna zhenchi,
ku nna fala ku nna tela ske bë mochi dëneñ.
Se dantu tëishi djia ku mëiu se a na ske lega pa da ineñ spitulaf.
10 Se nna nguë ineñ shi ja ta tela tudu ske sa ku liguilia dajantu mölë dëneñ.
Ineñ ske fë fesa se ineñ ske ja da ineñ ineñ me ja gagavu,
pakë nna pantafala dösu ineñ se bi ska fë ineñ vida ödu.
11 Mandji se pasa tëishi djia ku mëiu,
se Nashian föfö fiezha vida se lantela ineñ,
se ineñ tan lanta mdjadu,
se mendu ngandji tan ma nna nguë ineñ shi bë ineñ iai.
12 Tadashi se nna nguë faa fala dösu ineñ se tëndë uan taba faa gosu fo ösë,
ku bi ska faa ineñ:
«Subili bi iai».
Se ineñ subili ba ösë dantu uan növu,
se nna namigu dëneñ bë ineñ.
13 *Se ola shime se bi të uan san vlamëtë ngandji,
se dajantu shi se uan pachi shi fë deshi shi dantu palea se tudu lolo,
se milidji seta pöjödölö se tudu mölë.
Se nna nguë ineñ shi mdja ku vida ai,
se mendu ma ineñ,
se ineñ da Nashian shi dösë ilö.
14 Se djisgalasa shi fë dösu pasa,
mandji se puluntu se tan ske bi i shi fë tëishi.
Pitu shi seta
15 Se anzhu shi fë seta da pitu dëli,
se a bi ja tëndë fala atu liba ösë,
ku bi ska faa:
«Öseshi se mundu nguintëlu nguintëlu
se sa gövöndölö dji Shiölö no ku Kilitu dëli,
se ëli ske sa gövöndölö pa sempele ku pa sempele».
16 Se vinta jatulu nna pai veveiu ineñ sai tudu tusan liba töli deenchi Nashiolo,
se ineñ dajözhöiö san se ineñ adola Nashiolo,
17 ja faa:
«No da bo dezhupaga,
Shiölö Nashian shi sa Pödë Tudu,
bo se sa,
ku bo se bi sa,
bo se tan ske vlame bi
pakë bo se ma pödë ngandji bo
se bo bi sa gövöndölö.
18 Se nna nguë na ja këlë Nashianf ja ma pashian,
pakë djia jatigu bo ten da bebezha.
Tempu shi ten ske da pa bo juzhga nna nguë mölë bebezha,
se bo ske da nna pantafala shividölö bo,
ja gagavu,
ku nna pövu santu bo
ku nna nguë ineñ shi ja mendu namu bo,
ja sa nna nguë ngangandji ö ku nna kichi kichi,
se bo ten ske fea fea nna nguë ineñ shi ska tela të fea fea».
19 *Tadashi se jadji Nashian shi sa ösë ten bla,
se dantu jadji Nashian sai se a bi ska bë alka shi ëli ma fë bechi.
Se bi të lali,
ku santababla,
lonjadaua,
uan san vlamëtë ku uan fadaua iku budu fiiu.