Anzhu ku mina lavulu
10
Ta bi se amu bë utu anzhu ödu ku bi ska dësë fo ösë bozhadu dantu uan növu.
Se uan gonvela bi sa liba jasa dëli,
se fesan dëli bi sa shimafan solo,
se pena pena dëli bi sa shimafan finkian finkian fögö.
2 Se ëli bi të uan mina lavulu ku bi sa betu öma dëli.
Se ëli pë ope dëtu dëli liba domali se ëli pë i shi skedji liba san tela.
3 Se ëli ta uan kidëlë ku fala atu,
amea shi uan lian ja lonja,
se ta ëli ta kidëlë sai.
Tadashi se lonjadaua seta ineñ sai ten lanta fala dëneñ.
4 Ta fala lonjadaua seta seta chama faa fala jaba,
se amu bi ska ngongo skëvë;
mandji se amu tëndë uan fala fo ösë ku bi ska faa amu:
«Gada pë kusan bo jö ineñ shi lonjadaua seta seta ineñ se ja fala,
pa bo na skëvëf».
5 Tadashi se anzhu shi amu bi bë mdjadu liba domali ku san tela ai,
lanta öma dëtu ba ösë,
6 se ëli da bechi da nguë shi sa vivu pa sempele ku pa sempele ai,
ku se fë ösë,
ku san tela,
ku omali ku jö ineñ shi sa ku ëli tudu.
Se ëli faa:
«¡Tempu jaba bebezha!
7 Ta ske da djia shi anzhu shi ja fë seta ja faa fala ku ëli ja jomesa ja da pitu dëli,
se kumi ja jöndjidu Nashiolo ske kumpli,
amea shi ku ëli da nna shividölö dëli nna pantafala lazhan».
8 Se fala shi amu bi tëndë bebezha iai,
ku bi ska së fo ösë iai,
tan vlame faa ku amu,
se ëli faa amu:
«Ba ma mina lavulu se sa bladu ku sa öma anzhu se ku sa mdjadu liba domali ku liba san tela ai».
9 Se amu ba toja anzhu sai se amu pindji ëli pa ëli da amu mina lavulu sai,
se ëli kundji amu:
«Ma pa bo kumu,
se ske menemene dantu böjö bo,
shimafan meli,
mandji se dantu chipa bo se bo ske ja sinchi manga».
10 Se amu ten ma mina lavulu se fo öma anzhu sai,
se amu ten kumu;
se bi sa menemene dantu böjö amu,
shimafan meli,
mandji se öshi amu kumu bebezha,
se vla fë manga pë dantu chipa amu.
11 Tadashi se a faa amu:
«Bo ske ta pa bo tan pantafala da uan sapa pövu,
tela tela,
fala fala ku nna alë».