3 Se fo dantu igögö sai,

se së möi padjintena tudu pë liba tela,

se a da ineñ pödë shimafan i shi a bi da nna sentumachi liba tela.

4 Se a manda ineñ pa ineñ na fë zhugan mali liba alba telafa,

ñi ja vëdjifa ñi zhugan ope döpaf,

shina nna pöjödölö ineñ shi moso ku na ja sa ku sëiu Nashian ötesa dëneñf.

5 Mandji se a na lega ineñ pa ineñ chila nguë vida folof,

shina pa ineñ fë nguë machi dantu shinku mëdji,

se machi shi ineñ bi ska fë nguë bi sa fidu ta sentumachi ja munda nguë.

6 Se djia ineñ sai se nna pöjödölö ske jua amea pa mölë bi ma ineñ,

mandji se mölë na ske ngongo ma ineñf.

Se ineñ ske dishia pa ineñ mölë,

mandji se mölë ske ja jölë da ineñ.

7 Se padjintena ineñ se tudu bi sa fidu javalu ineñ shi ja sa vadu pa a ma ba pezha.

Se jasa dëneñ bi sa ku uan ja shimafan jölöiö oro,

se jala dëneñ bi ska kë fesan pöjödölö.

8 Ineñ bi sa ku jabelu shimafan dji naamain,

se deenchi dëneñ bi sa fidu denchi nna lian.

9 Öguë dëneñ bi sa kubidu ku uan ja panu donfelu,

se tomenta azha dëneñ bi sa fidu dji uan sapa ja jölësan javalu ta ineñ ja ska lantela dantu pezha.

10 Ineñ bi sa ku labu ku pian shimafan dji nna sentumachi,

se ineñ bi sa pödë labu dëneñ valadji pa ineñ ja fë pa nna pöjödölö ja të duadu ödu ba toja shinku mëdji.

11 Se alë shi bi ska ma ineñ bai,

bi sa anzhu shi fo jamian fundu shi ku a na ja bë basuf,

se namu dëli ku fala tela ebreo sa Abadon se ku fala nna griego se sa Apolion.

12 Se pimëlu djisgalasa pasa bebezha,

mandji se ontolo bi ske bi utu dösu mashi.

13 Se anzhu shi fë sëishi da pitu dëli,

se amu tëndë uan fala ku bi ska së fo dantu jonjo jatulu ineñ shi ja ta datali oro ku sa deenchi Nashiolo.

14 Se fala bi faa anzhu shi fë sëishi iai,

ku bi sa ku pitu ai:

«Sota nna anzhu jatulu ineñ se ku sa maladu lome taba lubela Eufrates».

15 Tadashi se a sota nna anzhu jatulu ineñ sai,

valadji pa ineñ chila pachi shi fë tëishi pövu vida folo,

pakë ineñ bi sa vadu da tempu sai,

djia sai,

mëdji sai ku anu sai.

16 Se amu tëndë fa namolo nna sodadji javalu se bi sa sentu dösu mamian.

17 Se sa amea shi ku amu ten bë javalu ineñ se ku nna nguë ineñ shi sa liba javalu ineñ sai dantu suian,

se nna nguë ineñ shi bi ska vada liba dëneñ bi ska kubili böjö kusan dëneñ ku uan bitidu donfelu böbö shimafan fögö,

asulu kulu ku kololi fa shimafan asufre.

Se jasa nna javalu bi sa fidu jasa lian,

se fögö,

ku igögö ku asufre bi ska së fo böjö dëneñ.

18 Se nna nguë pachi mundu shi fë tëishi tudu bi mölë dajantu djisgalasa fögö,

igögö ku asufre ku bi ska së fo böjö nna javalu.

19 Pakë pödë nna javalu bi sa böjö dëneñ ku labu dëneñ,

pakë labu dëneñ bi sa fidu jobolomatu,

se ineñ bi sa ku jasa jasa ku ineñ ja ma fë nguë mali.

20 Mandji se ponodu nna nguë ineñ shi fuga iai,

nna nguë ineñ shi na mölëf dajantu jatigu tëishi ineñ sef ai,

ineñ na tan vla ku ope tashi fo ja fëfëiufa,

ñi ineñ na ten chama shivi nna damonofa,

ñi nna nashian balu orofa,

ñi dji platafa,

jubilfa,

ñi dji budufa,

ñi dji taabafa,

ineñ shi a na ja paadji bë jafa,

ñi tëndë jafa,

ñi ndaf.

21 Se ineñ na tan vla ku ope tashi chila nguë vida folofa,

ñi fo öfiafa,

ñi fë ja nda ölöluiafa ñi chama futaf.