Sëiu shi fë seta ku bandamaskua oro
8
Se ta ëli kabela sëiu shi fë seta,
se bi da uan filili ösë dantu uan metadji ola.
2 Se amu bë nna anzhu seta seta ineñ shi sa mdjadu deenchi Nashiolo;
se a da ineñ pitu seta.
3 Tadashi se utu anzhu tan bi se ta mdjadu deenchi datali,
ku uan bandamaskua oro,
se da ëli uan sapa insienso pë zhunta ku lezha nna santu santu,
liba datali oro shi sa deenchi töli.
4 Se fo öma anzhu sai se subili ba deenchi Nashian igögö insienso ku lezha nna santu santu tudu.
5 *Tadashi se anzhu se ma bandamaskua se,
se ëli shia ku fögö datali,
se ëli zhuga ba san tela,
se jamian tudu se jomesa ku lonjadaua,
ku santababla,
ku lali ku san vlamëtë.
Fala pitu ska da
6 Se nna anzhu seta seta ineñ sai ku bi sa ku pitu seta,
se ineñ fë vadu pa ineñ jomesa ja da.
7 Se pimëlu anzhu da pitu dëli,
se a zhuga iku budu daua fiiu ku fögö zhuntadu ku sangui ba liba tela.
Se kama pachi shi fë tëishi liba tela zhuntadu ku pachi fë tëishi öpa ku alba vëdji tudu.
8 Se anzhu shi fë dösu da pitu dëli,
se a zhuga uan ja ku bi sa fidu uan taba iki djidjidu ku fögö ba liba domali.
Se pachi shi fë tëishi domali vla fë sangui.
9 Se pachi shi fë tëishi se nna ja vivu ineñ shi bi ska ta dantu domali tudu mölë,
se pachi fë tëishi navian navian tudu ten fea fea.
10 Se anzhu shi fë tëishi da pitu dëli,
se uan taba ntëla,
djidjidu ku fögö pono fo ösë ba liba pachi shi fë tëishi lubela lubela tudu ku mina mina lubela.
11 Se namu ntëla sai a bi ska sama ëli Mangadu,
se pachi pachi shi fë tëishi daua tudu vla manga,
se dajantu aua mangadu sai se uan sapa dji nguë mölë.
12 Se anzhu shi fë jatulu da pitu dëli,
se pachi shi fë tëishi solo,
ku i shi fë tëishi önuian ku pachi fë tëishi ntëla tudu.
Se amea sai se uan pachi shi fë tëishi djia vla kulu,
ku pachi shi fë tëishi nöchi.
13 Zha se amu pia,
se amu tëndë ëli faa paatu ngandji ku bi ska vaa metadji dösë se ëli bi ska ta kidëlë ja faa:
«¡Ëlë lë lë da nna nguë ineñ shi ja ta tela,
ta jabamentu anzhu tëishi ineñ se,
ske sa plesteñi pa ineñ da pitu dëneñ!».