Nna 144 milidji nguë ku sëiu
7
Se ta jö ineñ se tudu pasa,
se amu bë anzhu jatulu ku bi sa mdjadu liba ponto ponto jatulu san tela,
se ineñ bi ska fala oventu jatulu ineñ sai valadji pa na föfö pë liba telafa ñi liba domalifa ñi liba zhugan öpaf.
2 Se a shime amu ta bë utu anzhu ku bi ska së fo libai,
ku ëli se bi sa ku sëiu Nashian shi sa vivu.
Se anzhu se ta kidëlë ku fala atu da utu anzhu jatulu ineñ shi a bi da ineñ pödë pa ineñ fë san tela ku omali mali:
3 «Namsëdji na fë san tela ñi omali ñi öpa öpa malif,
ba toja pa no da sëiu pë ötesa nna shividölö Nashian no».
4 Se amu tëndë ëli namolo nna nguë ineñ shi a da sëiu pë:
uan sentu milidji ku deshi jatulu ku jatulu dantu nna zhenchi Israel tudu.
5 Fo zhenchi Juda nna deshi ku dösu milidji se a da sëiu pë;
fo zhenchi Ruben,
deshi ku dösu milidji;
fo zhenchi Gad,
deshi ku dösu milidji;
6 fo zhenchi Aser,
deshi ku dösu milidji;
fo zhenchi Neftali,
deshi ku dösu milidji;
fo zhenchi Manases,
deshi ku dösu milidji;
7 fo zhenchi Shiman,
deshi ku dösu milidji;
fo zhenchi Levi,
deshi ku dösu milidji;
fo zhenchi Isakar,
deshi ku dösu milidji;
8 fo zhenchi Sabulon,
deshi ku dösu milidji;
fo zhenchi Sandzhe,
deshi ku dösu milidji;
fo zhenchi Benjamin,
deshi ku dösu milidji ku a da sëiu pë.
Nna möi pöjödölö ku bitidu banku
9 Ta jö sai pasa,
se amu pia,
ja pia,
se bi sa ku uan möi pöjödölö,
ku zhugan nguë na paadji jontaf,
fo tela tela tudu,
ku zhenchi zhenchi tudu,
ku pövu pövu tudu,
ku fala fala tudu.
Ineñ tudu bi sa mdjadu deenchi töli ku deenchi Jabala.
Se ineñ tudu bi sa bishidu ku bitidu banku löngö,
ku papalima öma dëneñ.
10 Se ineñ tudu bi ska ta kidëlë ku fala atu:
«¡Savasan sa ja ku ja bi fo Nashian no
ku ska tusan liba töli,
ku dji Jabala!».
11 Se nna anzhu tudu bi sa mdjadu ludjadu pë töli,
ku nna pai veveiu ku nna ja vivu jatulu ineñ sai.
Se ineñ tudu dajözhöiö deenchi töli ba toja ku ineñ ja da san ku ötesa dëneñ,
ja adola Nashian
12 ja faa:
«¡Amen!
Ilö,
ku gloria,
ku tëndëmentu,
ku fidu ja dezhupaga,
ku ondolo,
ku pödë ku foshi
tudu sa ja Nashian no pa sempele ku pa sempele.
¡Amen!».
13 Tadashi se uan nna pai veveiu ineñ sai pongota amu:
—Nna nguë ineñ se sa bishidu ku bitidu banku löngö iai,
¿kë nna nguë ineñ se sa,
a kë jamian ineñ se pë folo?
14 *Se amu kundji ëli:
—Bo se sëbë,
shiölö amu.
Se ëli faa amu:
—Nna nguë ineñ sai se sa nna nguë ineñ shi ma padësë monchi dantu tela,
se ineñ laba bobolonda dëneñ,
se ineñ të vla banku ku sangui Jabala.
15 Dajantu shi se ineñ sa deenchi töli Nashiolo,
djia ku nöchi se ineñ ja shivi ëli dantu jadji dëli.
Se nguë shi ska tusan liba töli
ske kubili liba dëneñ ku limada dëli.
16 Se ineñ na tan ske të faku ñi fomu dauafa,
ñi solo na tan ske kama ineñfa
ñi kenchi na tan ske ja fë ineñf.
17 Pakë Jabala shi,
ku sa liba töli
se ske sa Ludjadölö dëneñ.
Se ske ma ineñ ba lubela shi ku aua dëli ja da nguë vida.
Se Nashian ske soja ineñ adöiö dëneñ tudu».