Jabala moso se ja bla lavulu skividu
5
Se amu bë öma dëtu nguë shi ska tusan liba töli ku uan lavulu skividu dantu dëli ku öluia,
ku sëiu seta ku bi sa dadu pë.
2 Se amu bë uan anzhu ödu se bi ska pongota ku fala atu:
«¿Kë nguë sa ku ondolo pa bla lavulu ku pa ten sota jodo fo sëiu ineñ sai?».
3 Mandji se zhugan nguë,
ñi fo ösë ñi fo san tela ñi basu dösan tela,
na bi paadji bla lavulu sefa ñi pa piaf.
4 Tadashi se amu jomesa ja sula monchi pakë na bi të zhugan nguë ku ondolo pa bla lavulu sef,
ñi pa piaf,
5 mandji se uan nna pai veveiu ineñ se faa amu:
«Na tan sula mashif;
pakë Lian zhenchi Juda,
leezha David,
ëli se ngana se ëli paadji bla lavulu sai ku pa ëli ten sota sëiu seta seta ineñ sai».
6 Tadashi se amu pia,
se amu bë metadji töli ku dji nna ja vivu jatulu ineñ sai,
se metadji nna pai veveiu,
bi sa mdjadu uan Jabala,
mandji se ëli bi sa shimafan ja a fë ëli saklifisu.
Ëli bi sa jonjo seta ku öiö seta,
ku se sa spitu seta seta Nashian ineñ shi ku a da bi tela tela tudu.
7 Se Jabala se bai se ëli ma lavulu fo öma dëtu nguë shi bi ska tusan liba töli iai.
8 Se ta ëli ma lavulu moso,
se nna ja vivu jatulu ineñ se ku nna vinta jatulu pai veveiu ineñ se tudu dajözhöiö deenchi Jabala sai;
se ineñ tudu bi sa ku pandë,
se pukulu oro dëneñ tudu bi sa shia insienso ku se bi sa lezha pövu santu Nashiolo.
9 Se ineñ bi ska janta uan janta novu,
ja faa:
«Bo moso se mësë pa bo ma lavulu
pa bo bla sëiu ineñ sai.
Pakë bo se a ma fë saklifisu,
se ku sangui bo se a ma sava nguë da Nashiolo,
ku zhenchi tudu,
ku fala tudu,
ku pövu tudu ku tela tela tudu.
10 *Se bo fë no uan gövöndölö,
se bo fë no nna padjil da Nashian no,
se no ske bi sa gövöndölö liba san tela».
11 Zha se amu pia,
se amu tëndë faa uan sapa nna anzhu ku ku bi ludja töli pë metadji,
dji nna ja vivu ku dji nna pai veveiu;
se namolo dëneñ bi sa milidji liba milidji ku mamian liba mamian.
12 Se ineñ bi ska faa ku fala atu:
«¡Jabala shi a fë saklifisu
ku se ja mësë pa ëli ma pödë,
ku gagavu ku sëbë kuzhu,
ku foshi ku ondolo,
ku gloria ku besa!».
13 Se amu tëndë ja vivu ineñ shi a mindji ösë,
ku tela,
basu dösan tela ku liba domali,
se amu tëndë ineñ ja faa:
«¡Da nguë shi ku ska tusan liba töli,
ku Jabala,
pa ilö,
ondolo,
gloria ku pödë,
pa sempele ku pa sempele!».
14 Se nna ja vivu jatulu ineñ sai bi ska faa:
«¡Amen!».
Se nna pai veveiu ineñ se dajözhöiö se ineñ adola.