Töli dösë
4
Se ta amu pia,
ja pia,
se bi të uan poto betu liba dösë,
se fala shi ku amu bi tëndë pimëlu ai,
shimafan dji uan pitu,
ku bi ska faa ku amu,
se faa amu:
«Subili bi iai,
se amu ske msa bo jö ineñ shi ske shiga ta jö ineñ se tudu ja pasa».
2 Se öshime se Spitu Nashiolo bi liba amu,
se amu bë uan töli ösë,
se uan nguë bi sa liba ja tusan.
3 Se nguë shi bi ska tusan liba töli se bi sa ku fesan shimafan jaspe ku kornalina ku ja ska chila blin.
Se ludjadu töli se bi sa ku uan gonvela,
ku ten bi ska chila blin shimafan esmeralda.
4 A shime ludjadu töli,
se amu ten bë utu vinta jatulu töli,
ku liba dëneñ bi ska tusan nna pai veveiu vinta jatulu,
se ineñ bi sa bishidu ku bitidu banku ku jölöiö oro liba jasa dëneñ.
5 *Se fo töli se bi ska së lali,
ku santababla,
ku lonjadaua,
se deenchi töli bi ska dëdë öpa fögö seta ku se sa spitu seta Nashiolo.
6 Se deenchi töli bi sa ku uan ja ku bi sa shimafan uan omali limpi kristali.
Se metadji töli,
ludjadu,
bi sa ku nna ja vivu jatulu ku bi sa shia öiö deenchi ku tashi.
7 Pimëlu ja vivu se bi sa shimafan uan lian,
se i shi fë dösu bi sa shimafan uan mina kau,
se i shi fë tëishi bi sa shimafan fesan uan napai;
se i shi fë jatulu bi sa shimafan uan paatu ngandji ku ska vaa.
8 Se nna ja vivu jatulu jatulu ineñ sai tudu bi sa ku azha sëishi,
se ineñ bi sa shia öiö liba ku basu azha.
Se na të solofa ku nöchif ineñ na ja chama faa:
«Santu,
santu,
santu
se sa Shiölö Nashian shi sa Pödë Tudu,
nguë shi se bi sa,
ku se sa,
ku se tan ske vlame bi».
9 Se olatuvëdji se nna ja vivu jatulu ineñ se ja da ilö,
ondolo ku dezhupaga da nguë shi ska tusan liba töli,
nguë shi ja ta pa sempele ku pa sempele.
10 Se nna vinta jatulu pai veveiu ineñ se ja dajözhöiö deenchi nguë shi ska tusan liba töli,
se ineñ ja da nguë shi ska bibe ondolo,
pa sempele ku pa sempele.
Se ineñ ja zhuga jölöiö ba deenchi töli,
ja faa:
11 «Bo se sa ku ondolo,
Shiölö ku Nashian no,
pa ma ilö,
ondolo,
ku pödë,
pakë bo se mindji ja tudu,
se ku vintadji bo se ja tudu sa
se a mindji ineñ tudu».