Monova ba da guëzha Sardis
3
»Se ten skëvë ba da anzhu guëzha dji Sardis:
Nguë shi sa ku spitu seta seta Nashiolo,
ku ten sa ku ntëla seta seta,
se faa jö sai:
»Amu jönsë fidu ja bo tudu,
ku bo sa ku namu fa bo sa vivu,
mandji se bo sa mölidu.
2 ¡Bla öiö!
Pa bo ma foshi da jö ineñ shi ske mölë goleme;
pakë amu na bë fa fidu ja bo tudu kumpli deenchi Nashian amuf.
3 *Ja lambela,
jö ineñ shi a shina bo ku bo tëndë;
gada ineñ pa bo tan vla ku ope tashi.
Se shi bo na ja sa jodadufa amu ske bi toja bo shimafan futadölö,
ta bo na ja ska gadaf.
4 »Mandji se dantu Sardis ontolo të zhugan ponodu pöjödölö ku bitidu dëneñ na sa ku nodaf,
ineñ ske ja nda ku amu ku bitidu banku,
pakë ineñ se mësë.
5 *Nguë shi ja ngana ske sa bishidu ku bitidu banku banku,
se amu na ske bolo namu dëli fo dantu lavulu vidaf,
se amu ske jonfesa namu dëli deenchi Pai amu ku deenchi nna anzhu anzhu dëli.
6 »Nguë shi ja sa ku olea,
pa ëli ja tëndë jö shi Spitu ska faa nna guëzha guëzha.
Monova ba da guëzha Filadelfia
7 »Se ten skëvë ba da anzhu guëzha dji Filadelfia:
Se sa jö shi nguë shi sa Santu,
nguë shi sa Vedadji iai,
nguë shi të sevu alë David iai.
Nguë shi ja bla ku zhugan nguë na ja paadji suaf;
ku ta ëli ja sua ku zhugan nguë na ja paadji blaf:
8 »Amu jönsë fidu ja bo tudu,
ja pia,
deenchi bo amu pë uan poto betu ku zhugan nguë na fo suaf,
pakë benga pa bo sa ku uan fi foshi,
bo tëndë fala amu se bo na naga namu amuf.
9 Ja pia,
amu ska da jadji Satanas nna nguë ineñ shi faa ineñ sa judio mandji ku ineñ na ja saf,
shina ineñ ja da fanchila;
ja pia,
amu ske fë pa ineñ bi ku pa ineñ dajözhöiö ope bo,
pa ineñ ba jönsë fa amu ngongo ku bo.
10 »Se bo kumpli mandamentu amu tudu dajantu pashiensa bo,
se dajantu shi se amu ske fë lazhan bo ta ske da tempu puva nguë ku ske bi liba mundu nguintëlu nguintëlu valadji pa ëli bi puva nna nguë ineñ shi ja ta tela tela.
11 Goleme amu ska bi,
fala jö shi sa ku bo,
valadji pa zhugan nguë na chila bo jölöiö bof.
12 *Nguë shi ja ngana,
amu ske da ëli pa ëli se sa finkian dantu jadji Nashian amu,
se ëli na tan ske së fo ala zhugan djiaf.
Se amu ske skëvë pë liba dëli namu Nashian amu,
ku namu palea Nashian amu,
ku se sa Jerusalen shi novu ku ska dësë fo ösë,
se fo pachi Nashian amu,
se amu ten ske skëvë namu novu amu pë liba dëli.
13 »Nguë shi ja sa ku olea,
pa ëli ja tëndë jö shi Spitu ska faa nna guëzha guëzha.
Monova ba da guëzha Laodisea
14 »Se ten skëvë ba da anzhu guëzha dji Laodisea:
Iai se Amen sa,
nguë shi ja da lazhan jonfadu ku shishizhu,
alë jö ineñ shi Nashian mindji,
faa jö sai:
15 »Amu jönsë fidu ja bo tudu,
se amu sëbë fa bo na sa fiiufa ñi kenchif.
¡Bi ske sa gavu pa bo sa fiiu ö pa bo sa kenchi!
16 Mandji se sa fa bo sa monadu,
se bo na sa fiiufa ñi kenchif,
se amu ske luzha bo fo böjö amu.
17 Pakë bo faa:
“Amu sa liku,
se ja tudu be amu gavu,
¡se amu na fë amu fata zhugan jaf!”.
Mandji se na ska da bo ötëndë fa bo sa nguë mbasadufa,
pa ja të dölö bofa,
puvilifa,
sebufa se bo sa gödödjif.
18 Dajantu shi se amu ska da bo shizhu pa bo kumpa oro ku a ma pasa dantu fögö,
valadji pa bo sa liku döme liku,
kumpa bitidu banku pa bo ja bishi,
pa na ja bë govan gödödji bofa,
ku pa bo kumpa uan mindjian pa fega pë öiö bo,
valadji pa bo tan ja paadji bë kuzhu.
19 *Amu ja panta nguë se amu ten ja jatiga nna nguë ineñ shi amu ja ngongo ku ineñ.
Dajantu shi.
Mandji,
sa valëntë pa bo tan vla ku ope tashi.
20 »Ja pia,
amu sa böjö poto se amu ska sama,
shi uan nguë ja tëndë fala amu se ëli ja bla poto,
amu ske lantela jadji dëli se amu ku ëli ske kumu liba mezha,
se ëli ske kumu ku amu.
21 Nguë shi ja ngana,
amu ske lega ëli pa ëli tusan ku amu liba töli amu,
ku se sa amea shime ku amu ngana se amu tusan ku Pai amu liba töli dëli.
22 »Nguë shi ja sa ku olea,
pa ëli ja tëndë jö shi Spitu ska faa nna guëzha guëzha».