Monova ba da guëzha Efeso
2
»Skëvë ba da anzhu guëzha dji Efeso:
Nguë shi të ntëla seta seta öma dëtu dëli ku ëli ja nda metadji öpa jandjia oro iai,
faa jö sai:
2 »Amu jönsë fidu ja bo tudu,
ku tabaia ödu ku pashiensa bo.
Se amu sëbë fa bo na ja gaga nna malvaduf.
Se bo puva nna nguë ineñ shi ja faa ineñ sa nna apostol,
mandji se ineñ na ja saf,
se bo msa fa ineñ sa nguë da fanchila.
3 Bo ma pashiensa se bo ma mavida monchi dajantu namu amu,
se bo na ja jansaf.
4 »Mandji se amu të uan ja tëjantu ku bo,
fa bo lega pimëlu ngongo bo.
5 Dajantu shi,
se ta pa bo ba lambela jamian shi bo bi pono da,
pa bo tan vla ku ope tashi pa bo tan fë jö ineñ shi bo bi ska fë fo jomesadu.
Shina,
amu ske bi toja bo se amu ske chila öpa jandjia fo metadji bo,
shi bo na tan vla ku ope tashif.
6 Mandji se bo të uan ja a föböli bo,
amea shi bo ja të pashian öma tabaia nna nikolaita,
ku amu ten ja të pashian dëneñ.
7 *»Nguë shi ja sa ku olea,
pa ëli ja tëndë jö shi Spitu ska faa nna guëzha guëzha.
Se nguë shi ja ngana,
amu ske da ëli kumu fo öpa shi të vida,
ku se sa i shi ja ta dantu paraiso Nashiolo.
Monova ba da guëzha Esmirna
8 *»Se ten skëvë ba da anzhu guëzha dji Esmirna:
Nguë shi se sa pimëlu ku se sa jabamentu iai,
nguë shi se bi sa mölidu ku tan vlame lanta bi vida iai,
faa jö sai:
9 »Amu jönsë padësë bo ku puvili shi bo sa,
benga zha pa bo sa liku.
Se amu sëbë amea shi a ja faa fala zhogoveadu fo nna nguë ineñ shi ja faa ineñ sa judio,
mandji ku ineñ na ja saf,
shina jadji Satanas.
10 Bo na ja ska mendu da mavida shi bo ske maf.
Sa fa djiabu ske mëtë zhugan namsëdji pë djili,
valadji pa puva namsëdji,
se namsëdji ske ma mavida se uan deshi djia.
Fala jonfa bo ba toja mölë,
se amu ske da bo jölöiö vida.
11 *»Nguë shi ja sa ku olea,
pa ëli ja tëndë jö shi Spitu ska faa nna guëzha guëzha.
Se nguë shi ja ngana na ske të duadu mölë shi ske fë dösuf.
Monova ba da guëzha Pergamo
12 »Se ten skëvë ba da anzhu guëzha dji Pergamo:
Nguë shi të jatana öiö dösu jotadu iai,
faa jö sai:
13 »Amu sëbë jamian shi bo ja ta:
jamian shi Satanas sa ku töli dëli.
Mandji ontolo bo ja jonfa namu amu,
se bo na ja naga jonfa shi bo të ku amuf,
ñi ba toja tempu shi ku a chila Antipas ku ja da lazhan gavu amu,
vida folo dantu tela shi Satanas ja ta iai.
14 »Mandji se amu të zhugan ja tëjantu ku bo:
fa bo sa ku nna nguë ineñ shi ja lë jö ineñ shi Balam ja shina nguë,
nguë shi shina Balak kuzhu pa ja pë pövu Israel pa ja da topu,
ja shina ineñ kumu manchimentu ineñ shi a ja fë saklifisu da nna nashian balu ku pa ineñ ten fë ja nda ölöluia.
15 A shime ala bo ten sa ku nna nguë ineñ shi ja gada jö ineñ shi nna nikolaita ja shina nguë.
16 Dajantu jö sai,
se ta pa bo tan vla ku ope tashi,
shina,
amu ske bi toja bo dandjian valadji pa amu bi pezha ku ineñ ku jatana shi ja së fo böjö amu.
17 *»Nguë shi ja sa ku olea,
pa ëli ja tëndë jö shi Spitu ska faa nna guëzha guëzha.
Se nguë shi ja ngana,
se amu ske da ëli mana shi sa jöndjidu iai pa ëli kumu,
se amu ten ske da ëli uan mina budu banku,
ku sa skividu uan namu novu ku zhugan nguë na jönsëf shina nguë shi ja ma iai.
Monova ba da guëzha Tiatira
18 »Se ten skëvë ba da anzhu guëzha dji Tiatira:
Mina Nashiolo,
nguë shi të öiö dëli shimafan bazha fögö,
ku ope dëli sa shimafan jubil fögö djidjidu iai,
faa jö sai:
19 »Amu jönsë fidu ja bo tudu,
ku ngongo,
ku jonfa,
ku sulvisu ku pashiensa,
se amu sëbë fa fidu jabamentu ja bo tudu ske sa mashi ku ineñ shi pimëlu pimëlu.
20 »Mandji se amu sa ku uan ja tëjantu ku bo,
ku sa fa bo lega se mooso sai Jesabel,
ku ja faa ëli sa pantafala,
se ëli ja shina nguë kuzhu se ëli ja ngaña nna shividölö amu pa ineñ ja fë ja nda ölöluia ku pa ineñ ten ja kumu manchimentu ineñ shi a ja ma fë saklifisu da nna nashian balu.
21 Amu da ëli tempu valadji pa ëli tan vla ku ope tashi,
mandji se ëli na ngongo fëfa ñi pa ëli lega ja nda ölöluia dëli pëf.
22 »Dajantu shi se amu ske zhuga ëli ba liba uan jaama danchi ödu,
ba da nna nguë ineñ shi ku ëli ja kabajölöiö se amu ske fë ëli ma mavida monchi,
shi ineñ tudu na tan vla ku ope tashi da fidu ja fëfëiu dëlif.
23 Se nna mina mooso sai se amu ske da ineñ ku ja pa ineñ paadji mölë.
Tadashi se guëzha tudu ske sëbë fa amu se sa nguë shi ja golo golo dantu miolo ku kusan,
se amu ske da nguë tudu jatigu shi ineñ mësë amea ja fëfëiu ineñ shi ineñ ja ska fë.
24 »Mandji dajantu namsëdji ku utu nna nguë ineñ shi ku ja ta Tiatira,
namsëdji na ja lë shina kuzhu fanchila ineñ sef (“vedadji ineñ shi fundu fundu mashi”,
amea shi ineñ ja sama,
mandji ku fala shishizhu ja sa kumi ja fundu fundu Satanas).
Amu ska faa namsëdji fa amu na tan ske ligui utu jalga mashi pë liba namsëdjif.
25 Mandji jö ineñ shi sa ku namsëdji,
fala pë ba toja ta amu ja bi.
26 Se nguë shi ja ngana ku ja gada fidu ja amu ba toja jabamentu:
Amu ske da ëli pödë liba tela tela.
27 Se ineñ ske sa gövöndölö liba dëneñ ku budan donfelu
se ëli ske ja të ineñ të fea fea shimafan ögögö balu.
28 »Amea shi ku amu ten ma fo öma Pai amu.
Se amu ten ske da ineñ ntëla shi ja së pamasedu.
29 »Nguë shi ja sa ku olea,
pa ëli ja tëndë jö shi Spitu ska faa nna guëzha guëzha.