LAVULU APOKALIPSIS
Djisukilitu msa öguë dëli
1
Se sa amea shi Nashiolo msa Djisukilitu,
valadji pa ëli msa nna shividölö dëli jö ineñ shi goleme bi ske bi shiga nguë.
Djisukilitu manda anzhu dëli pa ba msa shividölö dëli Zhuan,
2 ku se sa nguë shi da lazhan gavu vedadji,
ku pa ëli ten skëvë jö ineñ shi ku ëli bë,
ku sa Fa Nashiolo ku lazhan gavu Djisukilitu.
3 Besa se ske sa ku nguë shi ja lëë,
se besa ngandji ten ja sa ku nna nguë ineñ shi ku ten ja tëndë fala nova ineñ shi fo nna pantafala,
ku a shime ku ten ja gada jö ineñ shi sa skividu;
pakë tempu kumplimentu dëli sa peetu.
Manten a ba da guëzha seta seta
4 *Amu,
Zhuan,
amu ska da guëzha seta seta ineñ shi ja ta loso loso Asia,
manten.
Pa galasa ku padji sa ku namsëdji,
fo pachi nguë shi se sa,
ku se bi sa,
ku se tan ske vlame bi,
ku fo spitu seta seta ineñ shi ku sa deenchi töli dëli,
5 ku ten sa fo Djisukilitu.
Ku se sa nguë shi ja da lazhan jonfadu da jö ineñ se tudu,
ku se sa pimëlu nguë ku tan lanta bi vida fo mölë,
gövöndölö shi moso ku ja sa liba nna alë tela tela.
¡Ilö se ja sa da ëli nguë shi ngongo ku no,
ku se fë pa no sa legadu fo pekadu no ta ëli jölë sangui dëli dajantu no!
6 *Ku se ëli fë no uan gövöndölö,
se ëli fë no nna padjil da Nashiolo,
Pai dëli.
¡Ilö ku gloria ku pödë pa sempele ku pa sempele!
Amen.
7 *Namsëdji pia ëli ska bi ku növu,
se öiö tudu ske bë ëli,
ba toja nna nguë ineñ shi duma ëli ku kuzhu iai.
Se nna zhenchi mundu nguintëlu nguintëlu tudu
ske fë dödö da ëli.
Shiën.
Amen.
8 *Se Shiölö Nashian faa:
«Amu se sa Alfa ku Omega.
Nguë shi se sa,
ku se bi sa,
ku se tan ske vlame bi,
nguë shi se sa Pödë Tudu».
Suian Mina Napai Dösë
9 Amu,
Zhuan,
namain namsëdji ku a shime jamada dantu padësë namsëdji,
dantu gövöndölö ku dantu pashiensa Djisukilitu,
amu bi sa liba ië shi a ja sama Patmos,
dajantu Fa Nashiolo ku tëjantu lazhan gavu Djisukilitu.
10 Bi sa djia Shiölö se Spitu Santu bi liba amu,
se amu tëndë uan falagochi atu tashi amu shimafan dji uan fala pitu.
11 Ku bi ska faa amu:
«Skëvë pë uan lavulu jö ineñ shi bo ska bë pa bo da ba da guëzha seta seta ineñ shi ku ja ta loso loso Asia:
dji Efeso,
Esmirna,
Pergamo,
Tiatira,
Sardis,
Filadelfia ku Laodisea».
12 Se ta amu vla öiö pia valadji pa amu bë fala shi ska faa ku amu;
se amu bë öpa jandjia oro seta,
13 se metadji öpa jandjia seta ineñ sai se amu bë uan nguë ku sa shimafan Mina Napai Dösë,
ëli bi sa bishidu ku uan bitidu löngö ku bi ska da ëli budope,
bishidu ku shinta oro ba toja böjö kusan.
14 Se jabelu jasa dëli bi sa fidu öjözhë banku pepepe,
se öiö dëli bi sa fidu bazha fögö.
15 Se ope dëli bi sa fidu jubil ku ja chila blin ku sa dantu uan fugan,
se faa dëli bi sa atu shimafan ta uan sapa aua ja pono fo van jasada.
16 Se ëli bi sa ku ntëla seta öma dëtu dëli,
se bi ska së fo böjö dëli uan jatana öiö dösu jotadu banda banda.
Se fesan dëli bi ska dëdë ngan ngan ngan shimafan ta solo ja dëdë ku foshi dëli.
17 *Se ta amu ba bë ëli,
se amu pono da san ope dëli shimafan nguë mölidu.
Mandji se ëli pë öma dëtu dëli liba amu,
se ëli faa amu:
«¡Na menduf!
Amu se sa nguë shi Pimëlu se amu se sa Jabamentu,
18 nguë shi sa vivu.
Amu bi sa mölidu,
mandji se öseshi se amu sa vivu pa sempele ku pa sempele.
Se amu sa ku sevu sevu mölë ku dji Ades.
19 »Skëvë jö ineñ shi bo ska bë,
jö ineñ ska shiga öseshi,
ku jö ineñ shi tan ske bi bi shiga.
20 Se jö ineñ sai se sa ja kumi ja dantu ntëla seta seta ineñ se bo bë öma dëtu amu iai,
ku öpa jandjia oro seta seta ineñ sai:
ntëla seta seta ineñ se,
se sa nna anzhu guëzha seta seta ineñ sai,
se ope jandjia seta seta ineñ se,
se sa guëzha seta seta ineñ sai.