Namu lavulu sai sa ku sinchidu «msa kuzhu». Nguë shi skëvë lavulu sai sa San Zhuan, shividölö Djisukilitu ku namain nna nguë ineñ shi ja jonfa ëli. Zhuan ja da lazhan fa ëli sa djili liba uan ië ku ja sama Patmos ku sa dajantu ku ëli skëvë jö ineñ shi tuludöguë Djisukilitu msa ëli (1:1-2, 9-10).

Jaata sai sa ja a skëvë jabamentu tempu nna kitan, tempu Sesar Roma Domisiano, ku bi ska pëtëpë nna kitan djia ineñ sala ku pözhölu. Zhuan skëvë lavulu sai dajantu amea shi a ska pëtëpë nna kitan amea jöndjidu. Se fala dëli bi sa shia simbolo, ku bi sa uan pachi vedadji shi ja tëjantu ja fëfëiu gövöndölö nna nguë roma.

Lavulu sai a ja pachi pachi fë uachi tëishi (1:1–3:22; 4:1–20:15; 21:1–22:21). Pimëlu kapitulo dantu kapitulo tëishi ineñ sai ja msa uan nova Djisukilitu da ba da guëzha seta seta ineñ shi ja ta loso loso roma ineñ shi ja ta Asia (1:11). Ku se sa amea shi a ja limian «guëzha tudu, ja sa jamian shi ja sa». Se pachi metadji lavulu sai (4:1–20:15) ja faa fala tëjantu ku Jabala shi ku se a ma fë saklifisu, «ku se ja mësë pa ëli ma pödë, ku gagavu ku sëbë kuzhu, ku foshi ku ondolo, ku gloria ku besa» (5:12).

Jabamentu kapitulo dösu ineñ sai ja faa fala tëjantu ku ta a tan ske mindji uan ösë novu ku uan tela novu, ku uan palea Jerusalen novu, jamian shi tuludöguë Nashiolo ske ta ku pövu dëli (21:3).

Nova gavu shi a ja paadji faa ntëlelele ku a ja bë mashi dantu lavulu sai sa fa Djisukilitu se sa tuludöguë Nova Nashiolo (19:13), «nguë shi se sa, ku se bi sa, ku se tan ske vlame bi» (1:8), ku se ten sa alë shi të pödë mashi ku mundu nguintëlu nguintëlu (19:16). Dajantu shi se ëli ja sama guëzha dëli pa ja të jonfa, benga pa ja ska të pezha ku pödë mundu sai, pakë ta ske da jabamentu ja tudu se Kilitu ku guëzha dëli se ske ngana.