EPISTOLA KU
SAN JUDAS
SKËVË
Manten
1
*Judas,
shividölö Djisukilitu,
namain Sanchagu,
da nna nguë ineñ shi ku Nashian shi sa Pai se ngongo ku ineñ,
se ineñ sa gadadu amea Djisukilitu.
2 Pa namsëdji të mindjikodji,
ku padji ku ngongo pa ja këësë monchi mashi.
Pekadu ku kondena da nna nguë ineñ shi na ja këlëf
3 Nna namain kilidu amu,
amu bi sa ku uan dishamentu ngandji pa amu skëvë da namsëdji tëjantu ku savasan shi sa ku namsëdji ku no ten të iai.
Mandji se amu bë gavu mashi fa,
öseshi se amu sa ku dishamentu pa amu fë valadji pa amu fo luga namsëdji pa pezha da jonfa shi tempu baezha a bi da nna pövu santu iai.
4 Pakë amea sai se zhugan nguë lantela dantu namsëdji ja ngaña nguë ku sa nna nguë ku Fa Nashian bi bi msa tempu baezha da amea shi ineñ sa kondenadu.
Ineñ sa nna nguë fëfëiu,
ku ja ma galasa Nashian no shimafan ja pa ineñ ma fë vida fëiu dëneñ,
se ineñ ja naga fa Nashian se sa ponodu Shiölö ja tudu ku Shiölö no Djisukilitu.
A da ineñ jatigu dösë
5 Se benga zha pa namsëdji bi sëbë bebezha,
amu tan ske lambela namsëdji fa Shiölö,
ta ëli chila nna pövu Israel fo tela Ejipto,
se ëli chila nna nguë ineñ shi na këlëf ai vida folo.
6 Se nna anzhu ineñ shi ku na gada pödë dëneñf,
shina ineñ ja lega tuludöguë jadji dëneñ pë,
se a mala ineñ ku guian pë djili chindadji dantu jamian ineñ shi kulu kulu da juisio dji Djia shi ngandji.
7 Se ten sa amea shime ku Sodoma ku Gomora ku palea ineñ shi bi sa djividjili dëneñ,
a ske fë pa ineñ ma menda,
ta ineñ ske padësë jatigu uan fögö chindadji,
dajantu fidu jö ineñ shi ku ineñ tudu bi ska fë,
ja nda ölöluia,
ja fë ja fëfëiu napai ku naamain ku visio fëfëiu tëjantu ku nna pöjödölö.
8 Se ten sa amea shime se nna nguë ineñ sai,
dantu suian dëneñ,
se ineñ ja ska fë ja fëfëiu ku öguë dëneñ me,
se ineñ ja ska naga pödë se ja nozho nna pödë dösë.
9 *Pakë ñi anzhu shi se sa jasa jasa ku a ja sama ëli Miguel,
ta ëli bi ska të djisputa ku djiabu dajantu öguë Moises sai,
ëli na bi tividu faa ëli fala juisio masanfa,
shina ëli faa:
«¡Shiölö ske jatiga bo!».
10 Dajantu shi se nna nguë ineñ se ja faa fala zhogoveadu da jö ineñ shi ineñ na ja jönsëf,
ku jö ineñ shi ineñ ja jönsë shimafan nna limaia shin tëndëmentu,
se jö ineñ sai se ja të ineñ të fea fea.
11 ¡Puvili ineñ!,
pakë ineñ lë jamangandji Kain,
se dajantu pa ineñ ngana djiëlu se ineñ ba lë jamangandji fëiu Balam,
se ineñ tudu mölë dantu pedji Kore.
12 Se ineñ sa uan govan dantu fesa ngongo shi namsëdji ja ska fë iai.
Ineñ ja sa tave döguë dëneñ moso.
Ineñ sa növu shin aua,
ku se oventu ja ska ma ineñ bai.
Ineñ sa ope döpa ku na ja da pali döpa tempu dëneñf,
se ope dösu se ineñ ja sa mölidu,
lanjadu fo lezha.
13 Ineñ sa pukulu domali babu,
ku ja zhuga kumba shimafan fidu ja govan dëneñ.
Ineñ sa ntëla ku ja pëndë jamangandji dëneñ ku ineñ sa gadadu pë dantu donfenu ku se sa gövöndölö ja fëfëiu pa sempele.
14 Se ten sa jö shime ku Enok,
ku se bi sa nguë shi ja fë ope seta fo Adan,
ëli bi bi faa amea pantafala,
ta ëli faa:
«Ja pia,
amu bi bë Shiölö,
ku bi ska bi ku milidji milidji nna anzhu santu dëli,
15 valadji pa ineñ bi juzhga nna nguë tudu ku pa ëli bi kondena nna pekadölö ku ja fëfëiu ineñ shi ineñ ja ska fë,
ku suta ineñ shi ja faa ja tëjantu ku ëli».
16 Ineñ ja sa nna nguë lo nguë mali,
se ineñ sa nna nguë faa nguë kuzhu,
se ineñ ja ska nda amea tuludöguë dishamentu fëfëiu dëneñ.
Ineñ ja ska faa fala ja këlëdöguë dëneñ,
ja da gavu nna pöjödölö valadji pa ja be ineñ nna nguë gavu.
Shina nna nguë kuzhu
17 Mandji se namsëdji,
nna namain kilidu,
ja lambela fa fo nna apostol Shiölö no Djisukilitu,
18 *ineñ bi bi faa namsëdji:
«Ta ske da jabamentu djia ske të nna nguë li nguë,
ku ineñ ske bibe amea mazhnamentu fëfëiu dëneñ».
19 Se ineñ se sa nna nguë ineñ shi ja baga nguë fë uachi;
se ineñ ja ska lë mazhnamentu mundu se ineñ na ja sa ku Spitu Nashianf.
20 Mandji se namsëdji,
nna namain kilidu,
ja ska fë ja pë liba jonfa santu namsëdji mashi,
ja ska lezha amea Spitu Santu.
21 Ja gada öguë namsëdji ku ngongo Nashiolo,
pa namsëdji ja ska gada djia shi Shiölö no Djisukilitu ku mindjikodji dëli,
ske da no vida chindadji.
22 Namsëdji ja të mindjikodji nna nguë ineñ shi ja ska të butanja.
23 Ja sava utu nguë,
ja chila ineñ fo dantu fögö,
ten ja të mindjikodji ku mendu da utu ineñ,
pa bo ten ja ska nozho ba toja noda bitidu dajantu öguë dëneñ.
Jabamentu janta da Nashiolo
24-25 ¡Se ponodu Nashian no,
ku se sa Savadölö,
ku se paadji gada no valadji pa no na ponof,
ku pa ëli ja msa ineñ shin noda deenchi gloria dëli ku liguilia ngandji.
Da ponodu Nashian shi ku se sa Djisukilitu Shiölö no pa gloria,
ku pödë dalë,
ku ngandji dëli,
ku odji,
öseshi ku pa sempele!
Amen.