EPISTOLA SHI FË TËISHI KU
SAN ZHUAN
SKËVË
A ska da gavu Gaio
1
*Amu,
jasa jasa guëzha da jamada kilidu amu Gaio manten,
ku sa uan nguë ku amu ngongo ku ëli ku vedadji.
2 Jamada kilidu amu,
dishamentu amu sa pa ja tudu ja be ku bo gavu,
pa bo ja ska sinchi gavu,
pa amea se me pa ja tudu ten ska be gavu ku alma bo.
3 Amu bi sa ku liguilia monchi ta nna namain no bi ku ska da amu lazhan gavu bo amea shi ku bo ska bibe tëjantu ku vedadji.
4 Zhugan ja na tan ja da amu liguilia mashif ku ta amu ja tëndë fa nna mina amu ska nda jamangandji ja lë vedadji.
Fë lazhan nna shividölö Shiölö
5 Namain kilidu amu,
ja fë ja ku jonfadu ta bo ja zhuda ku sulvisu bo da utu nna namain ku tudu ja sa nna nguë së fo utu jamian iai.
6 Ineñ tudu ja da lazhan gavu bo deenchi guëzha tëjantu ku ngongo bo.
Anta pulusensa se amu pindji bo,
pa bo zhuda ineñ pa ineñ paadji ba vadji dëneñ,
amea shi pa ja da Nashiolo ondolo da sulvisu.
7 Pakë ineñ ska vadji sai dajantu namu Djisukilitu,
se ineñ na ma zhugan zhudaf fo öma nna nguë ku na ja këlë Nashianf.
8 Dajantu shi se ta pa no fë lazhan dëneñ,
valadji pa no zhuda ineñ pa ineñ be dantu vedadji.
9 Amu bi skëvë uan jaata da nna nguë guëzha,
mandji se Diotrefes,
ku olatuvëdji ëli ja ngongo sa pimëlu dantu ineñ,
na ngongo ma nof.
10 Dajantu shi se ta amu ske bai iai,
amu ske faa ku ëli da fidu ja dëli,
ëli ja be ja da lazhan ku fala fëfëiu tëjantu ku no moso.
Se na sa jö ineñ se mosofa,
a shime ëli na ten ja ma nna namain ineñ shi ja batë alaf,
se ëli na ten ja lega nna nguë ineñ shi ja ngongo ma ineñf,
se ëli ja jölë ineñ fo dantu guëzha.
11 Namain kilidu amu,
na ja lë zhampulu fëfëiuf,
shina ineñ shi gagavu.
Nguë shi ja ska fë ja gagavu ëli sa nguë Nashiolo,
mandji se nguë shi ja ska fë ja fëfëiu ëli na sa bë Nashianf.
12 Se tëjantu ku Demetrio,
nguë tudu ja da lazhan gavu dëli,
ba toja tuludöguë vedadji.
A shime no ten ja da gavu dëli,
se bo sëbë fa no ja da vedadji.
Jabamentu manten
13 Amu sa ku uan sapa ja pa amu faa bo,
mandji se amu na ngongo skëvë da bo ku puluma ku chinchaf,
14 pakë goleme amu ska gada pa amu bi bë bo,
pa no paadji faa fala jala jala.
15 Bo ja sa ku padji.
Nna jamada bo ineñ shi sa ku bo iai da manten bi da bo.
Da nna jamada amu tudu manten,
unian unian da amu.