EPISTOLA SHI FË DÖSU KU
SAN ZHUAN
SKËVË
Manten
1
Amu,
jasa jasa guëzha,
da nna nguë jadji shi ku Nashian se ma iai,
ku nna nguë ineñ shi tudu sa nna nguë dëli iai,
manten.
Amu ngongo ku ineñ shishizhu,
se na sa amu mosofa,
shina nna nguë ineñ shi tudu ten ba jönsë vedadji iai.
2 Amu ngongo ku namsëdji dajantu vedadji shi,
ku sa ku no dantu kusan ku ske sa ku no pa sempele.
3 Pa galasa,
ku mindjikodji ku padji shi fo Nashian shi sa Pai ku Djisukilitu,
Mina Pai,
sa ku namsëdji ku vedadji ku ngongo.
Mandamentu ngongo
4 Amu sa ku liguilia monchi ta amu dajonta ku zhugan nna mina bo ku tudu ska nda ja be ku vedadji,
amea mandamentu shi Nashian ku se sa Pai da no.
5 *Se öseshi,
nna namain amu,
amu luga namsëdji pa no ja ngongo ku uan nguë ku utu nguë.
Pa na sa fa amu ska skëvë uan mandamentu novuf,
shina i shime ku se bi sa ku no fo jomesadu.
6 Se sa amea shi ngongo ja sa,
pa no ja nda ja be amea mandamentu dëli.
Se jö sai se sa mandamentu:
pa namsëdji ja bibe ku ngongo sai,
amea shi namsëdji tëndë fo jomesadu.
Jonfa Djisu shishizhu
7 Pakë uan sapa nna nguë ngaña nguë se së ba mundu ku na ja këlë fa Djisukilitu bi mundu ku öguë pöjödölöf.
Se nna nguë shi ja fë shi se sa nna nguë ngaña nguë ku nna namigu Kilitu.
8 Namsëdji ja ska pinchidu pa namsëdji na pëndë fuluta tabaia shi namsëdji fë iai,
shina pa namsëdji ma ja gavu shi a ske da namsëdji ntëlelele.
9 Nna nguë ineñ shi tudu ja pëndë ku na ja gada shina ja Kilituf ëli na ja sa ku Nashianf.
Mandji se nguë shi ja gada shina ja sai se ja sa ku Pai ku Mina.
10 Shi uan nguë ja toja namsëdji,
se ëli na ja bi ku shina ja sef,
namsëdji na ja ma ëli jadjifa,
ñi a na ja dëli bendezhuf.
11 Pakë ja sa nguë shi ja da ëli bendezhu ske sa uan nguë ku ëli ten ja zhunta fë fidu ja fëfëiu ineñ shime.
Be ku dezhu
12 Amu të uan sapa ja pa amu faa namsëdji,
mandji amu na ngongo fë amea fejaata ku chinchaf,
pakë amu ska gada pa amu ba bë namsëdji pa amu faa ku namsëdji jala jala,
valadji pa liguilia no sa ntëlelele.
13 Nna mina naamain bo shi,
ku se ma iai,
da bo manten.