Jonfa shi ja ngana mundu sai
5
Ja sa nguë shi tudu ku ja këlë fa Djisu se sa Kilitu,
se a ja pali ëli fo Nashiolo;
se nguë shi ja ngongo ku pai,
se ten ske ngongo ku nna mina dëli.
2 Amea sai se no ja sëbë fa no ten ngongo ku nna mina Nashiolo,
ta no ja ngongo ku Nashiolo ku no ja gada mandamentu dëli.
3 *Se ngongo Nashian sa öshi no ja gada mandamentu dëli,
se mandamentu dëli tudu na sa zhugan jalgaf.
4 Pakë ja sa nguë shi a ja pali ëli fo Nashiolo ëli ja ngana mundu.
Se jö shi ja ngana mundu sai,
sa jonfa no.
5 Se ja sa nguë shi ja këlë fa Djisu se sa Mina Nashiolo,
ëli ja ngana mundu se ku ja fëfëiu dëli tudu.
Lazhan Spitu Santu
6 Djia shi Djisukilitu bi mundu sai,
ëli bi amea aua ku sangui,
na sa amea aua mosofa,
shina amea aua ku sangui.
Se Spitu Santu se sa nguë shi da lazhan,
se Spitu Santu se ja da vedadji.
7 Pakë ineñ tëishi se ja da lazhan gavu ösë:
Pai,
Palavulu ku Spitu Santu;
se ineñ tëishi tëishi tudu sa unian.*+
8 Se Spitu Santu,
aua ku sangui;
se ineñ tëishi tëishi se ja da lazhan gavu jö shime liba tela.
9 No ja tëndë lazhan ineñ shi nna pöjödölö ja da no,
mandji se lazhan shi Nashian ja da no se ja sa ngandji mashi,
pakë se sa lazhan shi Nashiolo ja da tëjantu ku Mina dëli.
10 Nguë shi ja këlë Mina Nashiolo,
se ja këlë jö shi Nashian ja fala.
Se nguë shi na ja këlë Nashianf,
ja fë ëli shimafan nguë ja da fanchila,
pakë ëli na ja këlë lazhan shi Nashian ja da tëjantu ku Mina dëlif.
11 *Se lazhan gavu sa i sai:
fa Nashian da no vida chindadji,
se vida sai sa dantu Mina dëli.
12 Se nguë shi ja sa ku Mina Nashiolo,
se sa nguë shi ten sa ku vida sai,
se nguë shi na ja sa ku Mina Nashianfa,
na ja të vidaf.
Tëndëmentu vida chindadji
13 Amu ska skëvë jö ineñ se da namsëdji,
pa namsëdji këlë namu Mina Nashiolo,
valadji pa namsëdji sëbë fa namsëdji sa ku vida chindadji.
14 Se sa jonfa shi no të ku Nashiolo,
pakë no sëbë fa ja sa jö shi ku no ja pindji ëli ku ja sa vintadji dëli,
ëli ja tëndë no.
15 Se shi no ja sëbë fa ëli ska tëndë no ja sa jö shi no ja pindji ëli iai,
no ja sëbë fa no të jö shi no pindji ëli bebezha.
16 Se shi uan nguë ja bë namain dëli ska fë uan pekadu ku na sa dji mölëf,
ske ta pa ëli lezha da ëli,
se Nashian ske da namain dëli vida,
ja sa dji nna nguë ineñ shi na ja fë pekadu ku na ja sa dji mölëf.
Të pekadu ku ja ma nguë ba mölë,
da pekadu ineñ sai amu na faa pa ja lezha da ëlif.
17 Ja fëfëiu tudu sa pekadu,
mandji se të pekadu ku na ja ma nguë ba mölëf.
18 No sëbë fa ja sa nguë shi a ja pali ëli fo Nashiolo,
se ëli na fo ja be ja fë pekaduf,
pakë Nguë shi a pali fo Nashiolo se ja fë lazhan dëli,
se nguë shi fëiu na ja fala ëlif.
19 No sëbë fa no sa nna mina Nashiolo se mundu nguintëlu nguintëlu sa öma nguë shi fëiu.
20 No ten sëbë fa Mina Nashian bi se ëli da no tëndëmentu valadji pa no jönsë Nashian shishizhu.
Se no ja ta zhuntadu ku nguë shi shishizhu,
ku se sa Mina dëli Djisukilitu.
Nguë sai se sa Nashian shi shishizhu,
ku ja da nguë vida chindadji.
21 Nna mina kilidu amu,
namsëdji pinchidu nna nashian balu.
Amen.