Spitu Nashian ku spitu namigu Kilitu
4
Nna namain kilidu amu,
namsëdji na ja këlë nna nguë ineñ shi tudu ja faa ineñ sa ku Spitu Nashianf,
shina pa namsëdji ja puva ineñ,
valadji pa namsëdji ja sëbë shime ineñ sa ku Spitu Nashiolo ö ineñ na tëf.
Pakë uan sapa nna pantafala fanchila se së ba mundu.
2 Pa amea se pa namsëdji ja sëbë nna nguë ineñ shi sa ku Spitu Nashiolo:
Ja sa nguë shi ja jönsë fa Djisukilitu bi mundu shimafan uan pöjödölö ku öguë shishizhu,
nguë se sa ku Spitu Nashiolo.
3 Se ja sa nguë shi na ja jönsë fa Djisu bi mundu amea sef ai,
ëli na sa ku Spitu Nashianf,
mandji se ëli sa ku spitu namigu Kilitu.
Namsëdji tudu bi tëndë fa spitu se bi ske bi,
se öseshi,
se ëli sa dantu mundu bebezha.
4 Nna mina kilidu amu,
namsëdji tudu sa nna mina Nashiolo se namsëdji ngana nna pantafala ineñ shi ja da fanchila iai,
pakë nguë shi sa ku namsëdji se sa ku pödë mashi ku nguë shi sa mundu.
5 Ineñ sa nguë mundu;
dajantu shi se ineñ ja faa jö ineñ shi sa ja mundu,
se nna nguë mundu ja tëndë ineñ.
6 Mandji se no sa nguë Nashiolo.
Nguë shi ja jönsë Nashiolo ja tëndë no;
mandji se nguë shi na ja sa nguë Nashianf,
na ja tëndë nof.
Se amea sai se no ja fo jönsë nguë shi sa ku spitu vedadji ku nguë shi sa ku spitu ngaña nguë.
Ngongo ku namsëdji me
7 Nna namain kilidu,
no ja ngongo ku no no me,
pakë ngongo sa ja ku ja fo Nashiolo.
Nguë shi ja sa ku ngongo,
se a ja pali ëli fo Nashiolo,
se ëli ja jönsë Nashiolo.
8 Se nguë shi na ja ngongo ku nguëf,
ëli na jönsë Nashianf,
pakë Nashian sa ngongo.
9 Se amea sai se Nashian msa ngongo dëli ku no ta ëli da Djisu,
ponodu Mina dëli bi mundu,
valadji pa no të vida dajantu dëli.
10 Jö sai se ja sa ngongo:
na sa dajantu no ngongo ku Nashianfa,
shina sa fa ëli se ngongo ku no se ëli da Mina dëli bi,
valadji pa ëli da öguë dëli shimafan saklifisu dajantu pa ëli pada pekadu no tudu.
11 Nna namain kilidu amu,
shi amea sai se Nashian ja ngongo ku no,
se ten sa amea shi ta pa no ten ja ngongo ku no no me.
12 *Zhugan nguë na sa bë Nashian ku öiö ie zhaf,
mandji se shi no ja ngongo ku no no me,
Nashian ske bibe ku no se ngongo dëli ske sa ku no.
13 Se sa amea shi no ja sëbë fa no sa ku ëli,
se ëli ja sa ku no,
pakë ëli da no Spitu dëli.
14 Se no no me se bë se no ja da lazhan fa Pai da Mina dëli bi valadji pa bi sa Savadölö mundu.
15 Se ja sa nguë shi ku ja jonfesa fa Djisu se sa Mina Nashiolo;
Nashian ja sa ku ëli,
se ëli ten ja sa ku Nashiolo.
16 Amea sai se no ba sëbë se no këlë fa Nashian ngongo ku no.
Nashian sa ngongo,
se ja sa nguë shi ja ta ku ngongo,
ëli ja ta ku Nashiolo,
se Nashiolo ten ja ta ku ëli.
17 Se amea sai se ja msa ngongo shishizhu shi sa ku no,
valadji pa no sa jonfadu ta ske da djia juzhga nguë,
pakë no sa mundu sai amea shi Djisu ten bi sa mundu sai.
18 Jamian shi ja të ngongo na ja të menduf.
Pakë sa fa,
ngongo shishizhu ja chila mendu ba öluia,
pakë mendu ja sa ku jatigu dëli.
Dajantu shi,
se nguë shi ja mendu,
sa fa ontolo ëli na sa jönsë ngongo shishizhuf.
19 No ngongo ku ëli,
pakë ëli se ngongo ku no pimëlu.
20 Shi uan nguë ja faa:
«Amu ngongo ku Nashiolo»,
mandji se öshime se ëli ten ja të pashian namain dëli,
nguë se ja da fanchila.
Pakë shi uan nguë na ja ngongo ku namain dëlif,
ku se sa nguë shi ëli ja bëf,
ëli na ten fo ngongo ku Nashiolo,
ku sa uan nguë ëli na ja bëf.
21 Djisukilitu da no mandamentu sai:
Nguë shi ja ngongo ku Nashiolo,
pa ëli ten ja ngongo ku namain dëli.