3
*Namsëdji pia amea ngongo ngandji shi Pai da no,
ku pa ja sama no nna mina Nashiolo,
se no sa.
Dajantu shi se nna nguë mundu se na ja jönsë nof,
pakë ineñ na ja jönsë ëlif.
2 Nna namain kilidu amu,
öseshi no tudu sa nna mina Nashiolo.
Mandji se ontolo na sa msa jö shi ske ta pa no saf.
Jö shi moso no sëbë sa fa,
ta Djisu tan ske bi msa tuludöguë dëli,
se no tudu ske sa shimafan ëli,
pakë no ske ja bë ëli amea shi ëli sa.
3 Se nna nguë ineñ shi ja sa ku alagada ku Kilitu,
se ten ja limpa tuludöguë dëli me,
amea shi ëli me sa limpi.
4 Se nna nguë ineñ shi ja fë pekadu,
se sa nna nguë ineñ shi ten ja sa ku tavadji ku alë,
pakë pekadu sa ja fëiu tëjantu ku alë Nashiolo.
5 *Se namsëdji tudu sëbë fa Djisukilitu bi mundu sai valadji pa ëli bi chila pekadu no tudu fo no,
mandji se ëli na sa ku pekaduf.
6 Se ja sa nguë shi ja sa zhuntadu ku ëli,
na tan ske ja fë pekaduf,
pakë ja sa nguë shi ja fë pekadu tudu,
ëli na bë ëlifa ñi ëli na jönsëf.
7 Nna mina kilidu amu,
pa zhugan nguë na ja ngaña namsëdjif,
nguë shi ja këlë Nashiolo se ja sa nguë dëtu,
amea shi Kilitu ten sa.
8 Mandji se nguë shi ja fë pekadu ëli sa nguë djiabu,
pakë djiabu se ja fë pekadu fo jomesadu.
Se dajantu shi se Mina Nashian bi,
valadji pa ëli bi të tabaia djiabu tudu të fea fea.
9 Se zhugan nguë ku sa mina Nashiolo na ja fë pekaduf,
pakë shimenchi Nashian sa dantu dëli;
se ëli na tan ja fo ja be ja fë pekaduf,
pakë a ja pali ëli fo Nashiolo.
10 Se dajantu jö sai se a ja jönsë nna nguë ineñ shi sa nna mina Nashiolo ku nna nguë ineñ shi sa nna mina djiabu,
pakë ja sa nguë shi na ja fë ja djustishifa ñi na ja ngongo ku nna namain dëlif,
ëli na sa mina Nashianf.
Mandamentu ngongo
11 *Pakë i sai se sa monova shi namsëdji tëndë fo jomesadu:
Pa no ja ngongo ku no no me.
12 No na ja sa shimafan Kainf,
ku bi sa uan nguë nguë shi fëiu dajantu shi se ëli chila namain dëli vida folo.
¿A kë ja fë ku ëli chila ëli vida folo?
Dajantu ku fidu ja dëli tudu bi sa ja fëiu;
se dji namain dëli se tudu bi sa ja dëtu.
13 Nna namain amu iai,
namsëdji na ja gua ku böjö betuf,
ta nna nguë mundu se ja ska të pashian namsëdjif.
14 *No sëbë fa no pasa fo mölë bi vida,
pakë no ja ngongo ku nna namain no.
Nguë shi na ja ngongo ku namain dëlifa,
ontolo ëli sa mölidu.
15 Ja sa nguë shi ja ska të pashian namain dëli ëli sa nguë chila nguë vida folo,
se no sëbë fa zhugan nguë ku ja chila nguë vida folo na ske të vida chindadjif.
16 Se da jö sai se no sëbë ja sa ngongo,
pakë Djisukilitu da vida dëli dajantu no;
valadji pa amea se pa no ten da vida no dajantu nna namain no.
17 Se shi uan nguë ja sa ku gagavu mundu sai se ëli bë uan namain dëli ku sa ku dishamentu,
mandji se ëli na ja të dölö dëli ku zhugan jaf,
¿kë amea shi ëli ja fo faa ngongo Nashiolo ja ta dantu dëli?
18 Nna mina kilidu amu,
pa ngongo no na ja sa dji böjö mosofa,
shina pa ten ja msa ku fidu kuzhu ku vedadji.
19 Se ku jö sai se no ske sëbë fa no sa nguë vedadji,
se no ske paadji sa suguladu dantu kusan no deenchi Nashiolo,
20 benga zha pa kusan no ja kondena no,
Nashian se ngandji mashi ku kusan no,
se ëli ja sëbë ja tudu.
21 Nna namain kilidu amu,
shi kusan no na ja ska kondena nof,
no ja paadji sa ku jonfa deenchi Nashiolo,
22 se ja sa jö shi no ja pindji ëli tudu ëli ske da no,
pakë no ja gada mandamentu dëli tudu,
se no ja fë jö ineñ shi ja fë gavu da ëli.
23 *Se mandamentu dëli sa pa no këlë namu ponodu Mina dëli Djisukilitu,
ku pa no ten ja ngongo ku no no me amea shi ëli manda no.
24 Se nguë shi ja gada mandamentu dëli,
ja sa ku Nashiolo,
se Nashian ja sa ku ëli.
Se jö sai se no ja sëbë fa ëli sa dantu no:
dajantu Spitu Santu shi ku ëli bi da no.