Kilitu, djustishi no
2
Nna mina kilidu amu,
jö ineñ se amu ska skëvë da namsëdji iai sa dajantu pa namsëdji na ja fë pekaduf.
Mandji se shi uan nguë ja fë pekadu,
no sa ku nguë fë djustishi da no deenchi Pai,
ku se sa Djisukilitu,
se ëli se sa Dëtu.
2 Se Djisukilitu se sa nguë shi da öguë dëli shimafan saklifisu valadji pa pada pekadu no tudu,
se na sa dji no mosofa,
shina dji mundu nguintëlu nguintëlu.
3 Se jö sai se no sëbë fa no jönsë ëli,
shi no ja gada mandamentu dëli.
4 Nguë shi ja faa:
«Amu jönsë ëli»,
se ëli na ja gada mandamentu dëli tuduf,
tili nguë sai sa nguë da fanchila,
se ëli na ja sa ku vedadjif.
5 Mandji se,
ja sa nguë shi ja tëndë fala dëli,
se ku nguë sai se ntëlelele se ngongo Nashiolo ske paadji msa shishizhu.
Se amea sai se no ja sëbë fa no sa pakadu ku ëli.
6 Se ja sa nguë shi ja sa zhuntadu ku Nashiolo,
ske ta pa ëli ten bibe amea shi Djisu ten bibe.
Uan mandamentu novu
7 *Nna namain kilidu amu,
mandamentu se amu ska skëvë da namsëdji iai na sa ja novuf:
Se sa i shime ku namsëdji bi të fo jomesadu.
Se mandamentu tudjia sai se sa nova shi namsëdji bi tëndë fo jomesadu iai.
8 Mandji se,
amu ska skëvë uan mandamentu novu da namsëdji,
ku se sa vedadji ku se ja msa vida Kilitu ku dantu dji namsëdji,
pakë jamian kulu ska be ja paka se fögö shi vedadji ja be ja chila blin.
9 Se nguë shi ja faa ëli sa jamian fögö djidjidu,
mandji se ëli ja ska të pashian namain dëli,
sa fa ontolo ëli sa jamian kulu.
10 Nguë shi ja ngongo ku namain dëli ëli ja ska ta jamian limpi,
se ku ëli na të zhugan topuf.
11 Mandji se ja sa nguë shi ja ska të pashian namain dëli ontolo ëli sa dantu jamian kulu,
se ëli na sëbë jamian shi ëli ska bef,
pakë ëli sa sebu.
12 Amu ska skëvë da namsëdji,
nna mina kilidu amu,
pakë pekadu namsëdji tudu sa padadu,
dajantu namu Djisukilitu.
13 Amu ska skëvë da namsëdji,
nna paipai ineñ sai,
pakë namsëdji bi jönsë nguë shi bi sa fo jomesadu.
Se amu skëvë da namsëdji nna mashivin,
pakë namsëdji se ngana nguë shi fëiu.
14 Amu ska skëvë da namsëdji,
nna mina amu,
pakë namsëdji jönsë Pai,
amu sa skëvë da namsëdji nna paipai ineñ sai,
pakë namsëdji jönsë nguë shi se bi sa fo jomesadu.
Se amu ska skëvë da namsëdji,
nna mashivin,
pakë namsëdji sa nguë ödu,
se Fa Nashiolo sa ku namsëdji,
se sa dantu namsëdji pakë namsëdji se ngana nguë shi fëiu.
15 Namsëdji na ja ngongo ku munduf,
ñi jö ineñ shi sa ja munduf.
Shi uan nguë ja ngongo ku mundu,
ëli na ja ngongo ku Paif.
16 Pakë jö ineñ shi sa mundu se tudu,
dishamentu döguë,
dishamentu döiö,
ja fëntë fëntë vida sai,
na ja sa ja fo Paif,
shina fo mundu.
17 Se mundu se ja pasa,
ku dishamentu dëli tudu,
mandji se nguë shi ja fë vintadji Nashiolo ja bibe pa sempele.
Nna namigu Kilitu
18 Nna mina kilidu amu,
öseshi se no sa jabamentu tempu,
se amea shi namsëdji tëndë fa namigu Kilitu ska bi iai,
mandji se öseshi se bi uan sapa nna namigu Kilitu.
Dajantu shi se no sëbë fa jabamentu tempu ska da bebezha.
19 Ineñ tudu sa nna nguë bi sa ku no,
mandji se ineñ na sa nguë no shishizhuf,
pakë ja pa sa ja ineñ sa nguë no,
ineñ bi ske mdja dantu no.
Mandji se ineñ së fo no dajantu pa bë gavu fa ineñ na sa nguë nof.
20 Mandji se namsëdji se ma Spitu Santu,
dajantu shi se namsëdji ja jönsë ja tudu.
21 Amu ska skëvë da namsëdji,
na sa dajantu ku namsëdji na sëbë vedadjif,
shina dajantu ku namsëdji sëbë;
pakë zhugan fanchila na ja fo së fo vedadjif.
22 ¿Kë nguë ja da fanchila?
Shina nguë shi ja naga faa Djisu na se sa Kilituf.
Nguë sai se sa namigu Kilitu,
nguë shi ja naga Pai ku Mina.
23 Se ja sa nguë shi ja naga Mina,
na ten ja sa ku Paif.
Se nguë shi ja jonfesa Mina,
se ten ja sa ku Pai.
24 Dajantu shi,
jö ineñ shi namsëdji tëndë fo jomesadu iai,
ja mdja ku namsëdji.
Se shi jö ineñ shi ku namsëdji tëndë fo jomesadu iai ja mdja ku namsëdji,
a shime namsëdji ten ske ja mdja ku Mina ku a shime Pai.
25 Se jö sai se sa jö shi ëli plomëtë no,
vida chindadji.
26 Amu ska skëvë jö ineñ sai da namsëdji tëjantu ku nna nguë ineñ shi ja ska ngaña namsëdji.
27 Se Spitu Santu shi namsëdji ma fo ëli,
se ja mdja ku namsëdji.
Dajantu shi se na ja fë fata pa zhugan nguë shina namsëdji jaf,
amea Spitu Santu shi namsëdji ma ja shina namsëdji ja tudu.
Se Spitu Santu se namsëdji ma iai sa vedadji,
ku na ja sa fanchilaf.
Ja mdja ku ëli amea shi ku ëli ten bi shina namsëdji iai.
Nna mina Nashiolo
28 Se öseshi,
nna mina kilidu amu,
namsëdji ja mdja ku Kilitu,
valadji pa ta ëli tan ja msa tuludöguë dëli,
pa no ja paadji sa deenchi dëli ja jonfa ëli,
suguladu fa no na ske të govan ta ëli tan ske vlame bif.
29 Se shi namsëdji ja sëbë fa Djisukilitu sa nguë dëtu,
ta pa namsëdji ten ja sëbë fa ja sa nguë shi tudu ku ja fë djustishi,
se a ja pali ëli fo ëli.