PIMËLU EPISTOLA KU
SAN ZHUAN
SKËVË
Palavulu vida
1
*Jö ineñ shi bi sa fo jomesadu,
ku sa jö ineñ shi no tëndë,
ku se ten sa jö ineñ shi no bë ku öiö no,
jö ineñ shi no pia,
ku no fala ku öma no tëjantu ku Palavulu vida.
2 *Pakë a msa no vida sai,
se no bë,
se no da lazhan,
se no ska da namsëdji nova vida chindadji,
ku se bi sa ku Pai,
se ëli msa no ëli.
3 No ska da namsëdji lazhan jö ineñ shi no bë ku no tëndë,
valadji pa namsëdji sa zhuntadu ku no,
amea shi no sa zhuntadu ku Pai,
a shime ku Mina dëli Djisukilitu.
4 No ska skëvë jö ineñ sai valadji pa no sa shia ku liguilia ntëlelele.
No ja nda ku fögö djidjidu
5 Monova sai se no tëndë fo Djisu ku sa ja ëli se shina no,
se no ska da namsëdji lazhan:
Nashian se sa fögö djidjidu,
se ëli na të zhugan fi jamian kulu shi ku ëlif.
6 Shi no ja faa no sa zhuntadu ku ëli,
mandji se no ska bibe jamian kulu,
no ja da fanchila se vedadji na ja sa ku nof.
7 Mandji se shi no ja ska nda dantu jamian ku fögö djidjidu,
amea shi Nashian sa jamian fögö djidjidu,
se no tudu ja fo zhuntadu ku no no me,
se sangui Mina dëli Djisu ja limpa pekadu no tudu folo.
8 Se shi no ja faa no na të pekaduf,
no ska da öguë no fanchila se vedadji na ja sa ku nof.
9 Mandji shi no ja jonfesa pekadu no tudu,
no ja paadji jonfa Nashiolo,
ku ëli se sa dëtu,
se ëli ske pada pekadu no tudu,
se ëli ten ske limpa no da ja fëfëiu ineñ shi no fë tudu.
10 Shi no ja faa fa no na fë zhugan pekaduf,
no ska faa ëli ska da fanchila,
se fala dëli na ja sa ku nof.