Ope shi fë dösu ku Shiölö tan ske vlame bi
3
Nna namain kilidu,
jaata sai se sa i shi fë dösu ku amu ska skëvë da namsëdji.
Dantu ineñ dödösu amu bi ska ngongo fë pa miolo namsëdji sa fesku valadji pa,
namsëdji ja mazhna ja dëtu.
2 Ja lambela jö ineñ shi tempu baezha nna pantafala santu santu bi faa namsëdji;
fo mandamentu Shiölö ku Savadölö,
ku nna apostol bi shina namsëdji iai.
3 *Namsëdji ja sëbë fa jabamentu djia ske bi da nna nguë ineñ shi ku ske ja bibe amea dishamentu fëfëiu dëneñ,
se ineñ ske ja li da jö ineñ shi sa vedadji.
4 Se ineñ ske ja pongota:
«¿Ja fë ku plomesa shi a bi faa Kilitu tan ske vlame bi iai?
Nna paipai no tudu mölë bebezha,
se ontolo ja tudu ja sa amea shime ku a bi mindji fo jomesadu».
5 Nna nguë ineñ shi na ja ngongo sëbëfa fo tompu tompu se bi të ösë bebezhaf,
a shime san tela,
ku Nashian fë ku fala dëli,
se ëli chila san tela fo dantu aua se ëli tan ludjila ku aua.
6 Zha se ëli ma aua pa mundu tompu tompu laga ku aua sëbidu ngandji.
7 Mandji se ösë ku tela ku sa öseshi iai,
sa gadadu da fögö fo mandatu maian Nashiolo.
Se fögö ske kama ineñ ta djia djustishi ske da ku djia pindjidu nna nguë fëfëiu.
8 Mandji nna namain kilidu amu,
na ja kësë fa da Shiölö uan djia sa shimafan uan milidji danuf,
se uan milidji danu sa shimafan uan djiaf.
9 Na sa fa Shiölö ja tada pa ëli kumpli ku plomesa dëlifa,
amea shi utu nguë ja ska mazhnaf,
shina ëli ja të pashiensa ku namsëdji,
pakë ëli na ngongo pa zhugan nguë mölëf,
shina pa nguë tudu tan vla ku ope tashi.
10 *Mandji se djia Shiölö ske bi shimafan ta uan futadölö ja bi nöchi.
Tadashi se ösë ske së folo ku supichi ku uan fala lonja ngandji,
se ja tudu ske sa kamadu ku fögö,
se jö ineñ shi ske mdja san tela tudu ske sa kamadu.
11 Se öshi jö ineñ se tudu ske sa lolodu amea sai,
¡kë amea shi namsëdji na ske paadji bibe uan vida santufa ku adola Nashiolof,
12 pa ja gada pa sa dandjian djia shi djia Nashian ske bi,
ku pa namsëdji ja fë jö shi dagoli!
Djia sai se ösë ske ma fögö,
se ske fea fea,
se ja tudu ske kama kama ja vla aua.
13 *Mandji se no ske ja gada ösë novu ku san tela novu shi Nashian plomëtë no iai,
ku ja tudu ske sa dëtu ku ske sa gavu.
14 Dajantu shi,
nna namain kilidu amu,
öseshi ku namsëdji ja ska gada jö ineñ se tudu iai,
ja ska fë ja tudu valadji pa Nashian ja dajonta ku namsëdji ku padji,
shin noda ñi kupa.
15 Namsëdji ja mazhna fa pashiensa shi Shiölö ja të ku no iai sa valadji pa no të savasan.
Tëjantu ku jö sai a shime namain kilidu no Pelavöl,
ten skëvë da namsëdji,
amea tëndëmentu shi Nashian da ëli.
16 Dantu jaata dëli tudu ëli faa da jö ineñ sai,
benga zha pa të zhugan ponto ku ja kuta pa tëndë ku nna nguë danadu ku nna nguë mbasadu ja të buia,
amea shi ineñ ten ja fë ku utu pachi Fa Nashiolo,
da tuludöguë pëndë dëneñ.
Jabamentu fala Pudul
17 Dajantu shi,
nna namain kilidu amu,
öseshi ku namsëdji sëbë jö ineñ se bebezha,
ja ska pinchidu,
valadji pa na ja sa namsëdji dajantu nna nguë masan ineñ sai ku ja ngaña nguë ñi pa namsëdji na ja safa fo këlë shi sa ku namsëdjif.
18 Mandji pa namsëdji ja jönsë Shiölö ku Savadölö no Djisukilitu ku pa namsëdji ja këësë dantu galasa dëli.
¡Gloria ja sa ku ëli öseshi ku pa sempele!
Amen.