4 Nashian na pada nna anzhu ineñ shi fë pekaduf,

shina ëli zhuga ineñ ba onfenu se ëli lega ineñ pë jamian kulu kulu,

gadadu da djia djustishi.

5 Ñi ëli na ten pada mundu tompu tompuf,

shina ëli manda uan fadaua ngandji ba liba nna nguë fë ja fëfëiu,

se ëli sava Noe moso,

ku se pegua uan vida dëtu,

ku utu pöjödölö seta.

6 A shime Nashian ten kondena tela Sodoma ku Gomora pa të ineñ të fea fea,

se ëli ten të ineñ të kama kama ba toja ku tudu vla fë shinzha,

valadji pa vla zhampulu jö shi ske shiga nna nguë fë ja masan masan.

7 Mandji se,

Nashian ten sava Lot,

uan masebu dëtu ku bi ska sufli dajantu vida fëiu shi bi sa ku nna nguë ineñ shi bi ska fë ja masan masan.

8 Se masebu dëtu sai bi ska ta dantu ineñ;

ja padësë dantu kusan gavu dëli dajantu ja fëfëiu ineñ shi djia djia tudu ëli bi ska bë ku ëli bi ska tëndë.

9 Shiölö se fë pa nna nguë ja bibe ja tëndë Nashiolo;

ja sa legadu fo tentasan,

se ëli se gada nna nguë fëfëiu pë basu jatigu da djia djustishi.

10 Se jö sai se ska gada ineñ nna nguë ineñ shi ja ska lë dishamentu nozhodu nna pöjödölö mundu sai,

se ineñ ja nozho nna pödë dösë.

Ineñ ja sa nna nguë ja këlëdöguë dëneñ se ineñ ten ja sa tividu,

se ineñ na ja mendu nna pödë dösëfa se ineñ ja faa ja fëiu tëjantu ku ineñ.

11 Mandji se,

nna anzhu,

benga zha pa ineñ se sa ku foshi ku pödë ngandji mashi,

ineñ na ja tividu pa ineñ kondena ku suta nna pödë ineñ se deenchi Shiölöf.

12 Mandji se ineñ se ja faa fala zhogoveadu ku jö ineñ shi ineñ na ja të tëndëf,

ineñ ja sa shimafan nna limaia shin shizhu,

ku a ja pali ineñ pa ja jaasa ineñ ku pa ten ja të ineñ të fea fea se ineñ ske mölë dantu tuludöguë pëndë dëneñ.

13 Ineñ ja ska ma pagu da ja fëfëiu ineñ shi ineñ ja ska fë,

öshi ineñ ja ska djogo ku liguilia da ja gagavu djia tudu.

Se ineñ ja sa ja sunzhu sunzhu ku ja noda noda dantu namsëdji,

se öshi ineñ ja ska kumu ku namsëdji,

se ineñ ja fë fesa dantu ja fëfëiu dëneñ.

14 Öiö dëneñ ja sa shia kabajölöiö,

se ineñ na ja jansa ku fë pekaduf.

Se ineñ ja ngaña nna alma levu levu;

se ineñ ja sa supetu dishia ja utu dji nguë;

ineñ ja sa nna mina masan.

15 Ineñ ja ska nda pindjidu pakë ineñ së fo jamian shi dëtu.

Se ineñ ja ska lë zhampulu pantafala Balam,

ku sa mina Beor,

ku se bi ngongo ngana djiëlu ja fë ja fëfëiu.

16 Se a faa ëli kuzhu dajantu pekadu dëli:

uan javalu kutu se faa ku ëli ku fala pöjödölö se na lega ëli fë ja uan pantafala ku ska danaf.

17 Nna nguë ineñ sai ja sa shimafan lubela sojadu shin aua,

shimafan növu ku oventu ja ska ma bai,

a ja gada ineñ pë dantu donfenu ku se sa gövöndölö ja fëfëiu.

18 Ineñ ja ska faa fala ngangandji ku fala dana danadu,

se ku visio ku dishamentu pöjödölö se ineñ ja ska ma nna nguë ineñ shi jölë fo uan vida ngaña nguë.

19 Ineñ ja ska plomëtë ineñ fa ineñ ske sa legadu,

mandji se ineñ me se ja sa sëlëva poto potodu,

pakë nna napai tudu sa sëlëva jö ineñ shi ja domina ëli iai.

20 Pakë nna nguë ineñ shi bi jönsë Shiölö ku Savadölö no Djisukilitu,

se ineñ bi jölë fo ja nozhodu mundu sai,

se shi ineñ tan ja vlame buia pë jö ineñ sai,

se jö ineñ sai domina ineñ amea sai,

se dajantu ineñ,

se ineñ ja vla fëiu mashi ku tudjia.

21 Bi ske sa gavu mashi da ineñ pa na jönsë jamangandji djustishif,

ku pa ta ineñ ja jönsë,

pa ineñ tan ja vlame bai ku tashi fo mandamentu santu shi a bi da ineñ iai.

22 Mandji se fo ineñ se ja kumpli vedadji shi a ja faa:

«Jösölö tan vlame ba kumu luzha dëli»,

se a shime a ten ja faa:

«Pöjö shi a ja jaba shi laba se tan ja vlame ba fagata dantu lama».