2 Pa galasa ku padji ja këësë monchi mashi amea tëndëmentu da Nashiolo ku dji Shiölö no Djisu.

3 Ta ja tudu ja sa ja vida sai ku adola Nashiolo ku se a ja da no fo pödë Nashiolo,

amea tëndëmentu fo nguë shi ku sama no ba gloria dëli ku fidu ja gavu mashi.

4 Se fo amea jö ineñ sai se ëli da no plomesa dëli tudu,

ku tudu sa ja ngangandji ku fumözhö fumözhö,

valadji pa amea dëneñ namsëdji ja paadji të pachi dantu döguë Nashiolo ku pa namsëdji ja jölë fo dishamentu fëfëiu ineñ shi a ma bi mundu sai.

5 Se dajantu jö sai,

ta pa ja sa cheche liba jonfa,

kutumu gavu;

se liba kutumu gavu,

tëndëmentu gavu;

6 se liba tëndëmentu gavu,

domina tuludöguë dishamentu;

se liba domina tuludöguë dishamentu,

gaga mavida;

se liba gaga mavida,

adola Nashiolo;

7 se liba adola Nashiolo,

ngongo ku nna namain;

se liba ngongo ku nna namain,

ngongo ku nguë tudu.

8 Shi namsëdji ja të jö ineñ sai se ja sa monchi mashi dantu tëndëmentu Shiölö no Djisukilitu,

ske fë pa namsëdji na sa fölifa ñi pa namsëdji na ja da fulutaf.

9 Mandji se nguë shi na të jö ineñ sefa ëli sa shimafan uan nguë sebu ö ku vita kutu,

se ëli ja kësë fa pekadu tudjia dëli tudu sa limpadu.

10 Dajantu shi,

nna namain,

ma foshi valadji pa namsëdji ja sugula fa namsëdji sa dantu pachi nna nguë ineñ shi Nashian se sama ku se ma,

pakë shi namsëdji ja ska fë jö ineñ sai namsëdji na ske pono fo jonfa zhugan djiaf.

11 Se amea sai se poto gövöndölö pa sempele Shiölö ku Savadölö no Djisukilitu ske sa betu ngandji da namsëdji.

12 Dajantu shi amu ske ja lambela namsëdji jö ineñ se tudu olatuvëdji shi,

benga zha pa namsëdji sëbë bebezha ku pa namsëdji ja sa suguladu dantu vedadji shi ku amu shina namsëdji iai.

13 Amu të dëtu pa amu ja ska joda namsëdji ku shizhu ineñ sai öseshi ku ontolo amu sa dantu limada sai ku se sa öguë amu.

14 Pakë Djisukilitu Shiölö no fë amu sëbë fa goleme ske ta pa amu lega limada sai;

15 mandji se amu ske fë jö shi ku amu paadji fë valadji pa namsëdji ja ska lambela jö ineñ sai ta amu ja lega mundu sai.

16 Jö ineñ shi no shina namsëdji tëjantu ku pödë ku ta Djisukilitu Shiölö no tan ske vlame bi,

na sa soia ku a chila fo san ku vintadji nof,

pakë ku tuludöguë öiö no se no bë Shiölö no dantu ngandji dëli.

17 ^*No bë ta Nashian shi sa Pai da ëli ondolo ku gloria,

se ta fo dantu gloria ngandji sai,

se uan falagochi ku ska faa:

«Nguë sai se sa Mina kilidu amu,

se ëli se ja fë amu të liguilia».

18 Tuludöguë no se tëndë falagochi sai ku bi ska së fo ösë,

pakë no ku Shiölö se bi sa van iki santu.

19 Se dajantu jö sai,

se no tan ja jonfa nova shi nna pantafala da lazhan iai mashi,

ku se tan sa ku dëtu mashi pa namsëdji folapë.

Pakë nova se sa shimafan uan lapanta ku ja dëdë pë dantu uan jamian kulu tudu,

ba toja djia shi pamasedu ske bla ku ntëla pamasedu ske së pa dëdë pë dantu kusan namsëdji tudu.

20 Mandji se anta pa jö ineñ se sa,

ta pa ja tëndë fa zhugan fala nna pantafala dantu Fa Nashiolo na sa ja pa uan nguë ja da öiö tëndë amea vintadji dji nguëf.

21 Pakë zhugan djia fala nna pantafala a na ja bi tëjantu ku vintadji nna pöjödölöf;

shina,

nna pöjödölö ineñ bi ska faa fala fo pachi Nashiolo ku jö shi Spitu Santu bi ska faa ineñ.