Bibe ku vintadji Nashiolo
4
Dajantu shi,
amea shi Kilitu padësë ku öguë dëli,
pa namsëdji ten ja sa ku mazhnamentu shime.
Pakë nguë shi padësë ku öguë dëli se jaba ku pekadu,
2 valadji pa na ja bibe tempu shi a ja sa san tela iai ja da öguë dishamentu fëfëiuf,
shina pa ja kumpli vintadji Nashiolo.
3 Fo tempu löngö baezha se namsëdji bi ska fë jö ineñ shime ku nna nguë na ja këlë Nashianf ja ska fë,
pakë ineñ bi ska bibe dantu visio,
ku dishamentu fëfëiu,
liguilia fëfëiu ku ja ska beda beda,
ja ska bëbë monchi,
ku ja ska adola nna nashian balu ineñ shi fëfëiu mashi.
4 Se öseshi,
ku namsëdji na tan ska lë ineñ ku vida fëiu dëneñf,
se ineñ ja bë namsëdji shimafan uan ja patadu,
se ineñ ja ska da fëiu namsëdji.
5 Mandji se ineñ ske ta pa ineñ da lazhan deenchi Nashiolo,
ku se ske juzhga nna nguë vivu ku nna nguë mölidu.
6 Pakë nna nguë mölidu a ten pegua nova gavu da ineñ,
valadji pa ineñ paadji bibe ku Nashiolo amea spitu dëli,
benga zha pa dantu mundu sai a bi juzhga öguë dëneñ bebezha,
amea dishamentu nna nguë tudu.
Sulvisu da utu nna nguë
7 Goleme jabamentu ja tudu ske da.
Dajantu shi,
pa namsëdji ja sa jodadu ku domina tuludöguë dishamentu pa namsëdji ja ska lezha.
8 Pa ja të uan sapa ngongo dantu namsëdji ku namsëdji me,
pakë ngongo ja pada uan sapa pekadu.
9 Ja ska ma nna nguë ku utu nguë dantu jadji namsëdji,
shinke a ja ska da fëiu dji nguë.
10 Pa nguë tudu ja pë ja tudu a sulvisu utu nguë amea ja gavu dödji shi a ja të,
pa ja pachi amea jonfadu galasa Nashiolo ku se ja fë pa ja tudu ja sa pata patadu.
11 Ta uan nguë ja ska faa fala,
pa fala dëli ja sa shimafan fala Nashiolo.
Ta uan nguë ja ska fë uan sulvisu,
pa ëli ja ska fë ku foshi shi Nashian ja da ëli.
Jö ineñ shi namsëdji ja fë tudu,
ja fë da Nashiolo valadji pa ja da ëli ilö amea Djisukilitu.
¡Ilö ku gloria ku pödë pa sempele ku pa sempele!
Amen.
Liguilia dantu mavida
12 Nna namain kilidu,
namsëdji na ja ska gua ku böjö betu ta namsëdji ja pasa puva ku fögöf,
shimafan ja sa utu ja pataduf.
13 Ja sa patadu,
pa namsëdji ja të liguilia pakë namsëdji të pachi padësë ineñ shi Kilitu ma,
valadji pa namsëdji ten sa shia liguilia ta a ske msa mundu gloria dëli.
14 Pa namsëdji ja sa ku besa,
ta uan nguë ja suta namsëdji dajantu Kilitu,
pakë gloria Spitu Nashiolo se ja kubili liba namsëdji.
15 Shi uan namsëdji ja ska ma mavida,
pa na sa fa ëli ja chila nguë vida folofa,
futadölöfa ö nguë fë ja fëfëiufa,
ñi pa na ja sa dajantu a ja lanta dantu djisgalasa dji nguëf.
16 Mandji se shi a ja padësë dajantu ku bo sa kitan,
na ja të govanf,
shina ja da Nashian ilö dajantu ku bo sa ku namu sai.
17 Pakë tempu da zha pa juisio jomesa fo tuludöguë jadji nna nguë Nashiolo.
Se shi djustishi ja jomesa pë fo no;
¿kë i shi ske sa jabamentu dji nna nguë ineñ shi na ja tëndë evanjelio Nashianf?
18 «Se shi uan nguë dëtu ja sava ku djiskatudjia,
¿kë ja ske pasa ku nna nguë fë ja fëfëiu ku nna pekadölö?».
19 Se sa amea shi nna nguë ineñ shi ja ska padësë amea vintadji Nashiolo,
ske ta pa ineñ ja ska bai ja fë ja gagavu ku pa ineñ ja ska pë alma dëneñ öma Nashian jonfadu shi se Mindji ineñ.