Jö ineñ shi nna pai jazhadu ja fë
3
*Se ten sa amea shime,
namsëdji nna miela,
pa namsëdji ja sa basu nna medu namsëdji,
valadji pa,
shi utu ineñ na ja këlë novaf,
pa ineñ ja paadji këlë,
dajantu amea shi namsëdji ja ska fë kuzhu,
2 pa ta ineñ ja bë amea gavu shi ineñ ja fë kuzhu pa ja da Nashian ondolo.
3 *Valadji pa fumözhö namsëdji na ja sa dji benda dölöluia mosof,
pa ja sa ja fëntë fëntë shimafan fë jabelu lanlan,
ku jonto oro ku bitidu ngola ngola.
4 Shina pa ja sa ja gavu mashi pa na ja sa dji ja ku poto potof,
i shi ja së fo jöndjidu dantu kusan,
ku ja fo uan spitu levu ku ja sa mole mole.
Ineñ sai se ja shivi mashi deenchi Nashiolo.
5 Pakë se ten sa amea shime,
ku fo tompu tompu,
ja fëntë fëntë nna mooso santu ineñ shiki,
ineñ bi ska gada Nashiolo se ineñ ten bi sa basu medu dëneñ.
6 Se sa amea shi Sara bi sa,
ku ëli bi ja tëndë Abraam se ëli sama ëli «shiölö amu».
Se namsëdji sa nna mina miela dëli,
shi namsëdji ja fë ja gavu ineñ sai namsëdji na ja mendu zhugan jaf.
7 *Se namsëdji,
nna medu,
amea shime pa namsëdji ja bibe ku ineñ ku shizhu,
ja da miela ondolo shimafan nguë levu,
ku a shime nna nguë ja të gagavu galasa vida.
Se amea sai pa lezha namsëdji na ja të topuf.
Fidu ja nna kitan
8 Pa jabamentu,
pa namsëdji tudu ja bibe ku padji ku liguilia,
zhuntadu ku sinchidu shime ku ja ngongo ku nna namain namsëdji.
Pa ja sa nna nguë ku ja të mindjikodji ku nna nguë shipë.
9 Na ja da nguë pagu ja fëiufa ku ja fëiuf,
ñi pa bo na ja suta nguë shi ja suta bof.
Shina,
sa gavu mashi,
pa tan ja ska vlame da nguë besa,
pakë Nashian sama namsëdji pa bi ma besa.
10 Pakë:
«Nguë shi ja ngongo ku vida ku ëli ten ja ngongo bë djia ku liguilia,
pa ëli ja fë lazhan lunga dëli ku faa ja fëfëiu
ku pa olaböjö dëli na ja da fanchilaf,
11 ja jölë fo ja fëfëiu ku pa bo ja fë ja gagavu
ja jua padji ku pa bo ja lë ëli.
12 Pakë Shiölö ja fë lazhan nna nguë dëtu
se oleia dëli ja sa betu da lezha dëneñ,
mandji se Shiölö ja chila fesan dëli fo nna nguë fë ja fëfëiu».
13 ¿Kë nguë ske paadji fë namsëdji ja fëiu,
shi namsëdji ja ska fë foshi pa ja sa ku dishamentu ngangandji pa fë ja gagavu?
14 *Mandji se benga zha pa namsëdji ja fë ja dëtu,
namsëdji ten ske padësë,
¡besa ngandji da namsëdji!
Na ja mendu zhugan nguëfa,
ñi na ja mendu zhugan jaf,
15 shina ja da Kilitu ondolo shimafan Shiölö dantu kusan namsëdji.
Ja sa plesteñi olatuvëdji shi,
valadji pa ja kundji nna nguë ineñ shi ja ska pindji namsëdji dëtu tëjantu ku alagada shi sa ku namsëdji.
16 Mandji pa namsëdji ja fë ku ondolo amea shi levu.
Ja ska fë kuzhu amea shi pa namsëdji ja sa ku kusan legadu,
valadji pa nna nguë ineñ shi ja ska da fëiu namsëdji dajantu kutumu gavu namsëdji shimafan nna nguë ku ja sa dji Kilitu,
pa ineñ ja ska të govan da jö ineñ shi ineñ ja ska fala.
17 Sa gavu mashi pa ja padësë dajantu ku a ja ska fë ja gavu,
shi se ja sa amea shi Nashian ja ngongo,
ku pa na sa dajantu a ja fë ja fëfëiuf.
18 Pakë Kilitu se padësë se mölë dajantu pekadu no tudu,
uan ope soso pa sempele.
Ëli bi sa nasenchi,
mandji se ëli padësë da nna nguë fëfëiu,
valadji pa ëli ma ineñ ba da Nashiolo.
Se jañi döguë dëli mölë;
mandji se Spitu Nashian tan lanta ëli bi vida.
19 Se amea sai se ëli ba pegua ngana dëli da nna spitu ineñ shi bi sa djili.
20 Ineñ ku fo tompu tompu na bi tëndë ëlif,
fo tempu Noe,
ta Nashian bi ska gada ineñ ku pashiensa öshi a bi ska fë alka,
ku zhugan pöjödölö;
ineñ tudu bi sa ötu,
se a bi sava ineñ amea daua.
21 Se aua sai bi ska msa aua bachizha,
ku amea dëli se no sa savadu öseshi.
Bachizha na sa ja pa limpa öguë mosofa,
shina pa pindji Nashiolo uan kusan limpi;
ku se ja sava no amea shi Djisukilitu tan lanta bi vida,
22 nguë shi ku subili ba ösë se ëli ma jamian dëli benda dëtu Nashiolo,
nguë shi ku se nna anzhu anzhu,
nna jasa jasa tudu ku nna pödë pödë sa basu dëli.