Pövu novu Nashiolo
2
Dajantu shi,
ja chila klase ja fëfëiu tudu fo namsëdji,
ku ngaña nguë,
ku sochi,
pashian dji nguë ku klase lo nguë mali tudu.
2 Shimafan nna mina mongo mongo,
ja jua ku dishamentu ngandji aua mama döböiö fo spitu shi limpi,
valadji pa amea dëli pa ja këësë ku pa ja të savasan,
3 pakë öseshi se ineñ ba puva amea shi Shiölö gavu.
4 Öseshi namsëdji iaba toja Kilitu,
nguë shi se sa budu vivu ku nna nguë fë jadji bi naga iai,
mandji se Nashian se ma pa sa budu fumözhö.
5 Se namsëdji sa budu vivu ku se Nashian ma fë jadji spitu dëli.
Vlame,
namsëdji sa padjil santu.
Ku amea shi Djisukilitu se ja sa metadji,
namsëdji ja da saklifisu ku se ja fë gavu da Nashiolo.
6 Dajantu shi se Fa Nashian ja faa:
«Ja pia,
amu ja pë uan budu Sion,
ku se sa budu shi se ja mashi,
ku se a ma pa se shivi mashi;
nguë shi ja jonfa ëli na ske mdja ku govanf».
7 Da namsëdji,
ku ja këlë,
budu sai sa fumözhö;
mandji se da nna nguë ineñ shi na ja këlëf sa,
«Budu shi nna nguë fë jadji zhuga ta iai,
se ba vla fë jasa budu».
8 Se a shime:
«Budu shi ja fë nguë da topu,
ku uan lapa ku ja fë nguë pono».
Ineñ ja pono pakë ineñ na ja tëndë jö shi nova ja faaf:
se sa jö shi ineñ ja mësë.
9 *Mandji se namsëdji sa uan zhenchi ku a ma,
uan padjil dantu sulvisu dalë,
uan tela santu,
uan pövu ku Nashian se ma.
Se jö sai sa shi valadji pa ja pegua fidu ja ngangandji Nashiolo,
ku se sama ineñ fo jamian kulu pa ineñ lantela jamian fögö djidjidu fumözhö.
10 Namsëdji tudjia na bi sa ñi pövuf,
mandji se öseshi se namsëdji sa pövu Nashiolo.
Tudjia Nashian na bi të mindjikodji ku namsëdjif,
se öseshi se Nashiolo të mindjikodji namsëdji.
11 Nna namain kilidu,
amu luga namsëdji,
shimafan nna nguë utu tela ku ska pasa mundu sai ja bai ku pa na ja sa ku dishamentu pekadu ku se ja ska pezha ku almaf.
12 Ja ska bibe uan vida ku zhampulu dantu nna nguë ku na ja këlë Nashianf.
Se amea sai,
benga zha pa ineñ ja ska da fëiu namsëdji shimafan nna nguë fë ja fëfëiu,
ineñ ske ja bë ja gavu ineñ shi namsëdji ja ska fë se ineñ ske ja da Nashian ilö djia shi ëli ske juzhga nguë tudu iai.
Ja sa basu nna jasa jasa tela
13 Dajantu ngongo ku Shiölö,
pa ja da nna jasa jasa gövöndölö tudu ondolo:
ja sa alë ö nguë shi ja sa jasa tela.
14 Shimafan nna gövöndölö ku ëli se ja da bi valadji pa ja fë djustishi ku nna nguë fë ja fëfëiu ku pa ja da nna nguë ineñ shi ja fë ja gagavu ondolo.
15 Pakë Nashian ngongo pa namsëdji ja ska fë ja gagavu,
valadji pa nna nguë danadu ku nna nguë buiadu na ja të zhugan ja pa ineñ ja faa tëjantu ku namsëdjif.
16 Jö sai ja sa fidu ja shimafan nna pöjödölö legadu,
na ja ma legadu namsëdji valadji pa ja fë ja fëfëiu sumuladuf,
shina pa ska ta shimafan nna shividölö Nashiolo.
17 Ja da nguë tudu ondolo ineñ a ja mësë.
Ja ngongo ku nna namain,
ja mendu Nashiolo,
ja ska da alë ondolo.
Sulvisu nna sëlëva
18 Nna sëlëva,
ja sa basu nna shiölö namsëdji ku ondolo tudu,
na sa nna nguë ineñ shi gavu ku nna nguë kusan legadu mosofa,
shina a shime nna nguë ineñ shi ten ja sa nna nguë kutumu ödu.
19 Pakë sa uan ja ku ja fë gavu deenchi Nashiolo ta a ja fonta uan nguë ja padësë shinke ëli fë zhugan ja fëiu,
ja gaga jatigu,
dajantu dëtu dëli.
20 Pakë shi a ja jatiga namsëdji dajantu ja fëiu shi namsëdji bi fë,
¿kë ja gavu shi a paadji da namsëdji öshi namsëdji padësë ku pashiensa?
Mandji se shi a ja ska padësë dajantu gavu shi a ja fë,
se a ja ma mavida sai ku pashiensa,
jö sai ja fë gavu da Nashiolo.
21 Pakë dajantu jö sai se Nashian sama namsëdji,
da öshi Kilitu ma mavida da namsëdji bebezha,
ja da no zhampulu valadji pa no lë san dope dëli.
22 Kilitu na fë zhugan pekadufa ñi ëli na ngaña zhugan nguëf.
23 Ta a ja suta ëli,
ëli na ja kundji nguë ku sutaf,
ta a ja fë ëli padësë,
ëli na ja jua amea shi pa ëli ten fë nguë fëiuf,
shina ëli ja lega ja tudu pë öma Nashiolo,
ku se ja juzhga ku djustishi.
24 Tuludöguë Kilitu se gaga pekadu no tudu pë öguë dëli pë liba taaba,
valadji pa no mölë ku pekadu ku pa no bibe uan vida da djustishi.
Ku pa fida dëli se namsëdji tudu sa kuladu.
25 Pakë namsëdji bi ska ndanda shimafan jabala ku bi sa pindjidu,
mandji se öseshi se namsëdji tan vla Ludjadölö ku Obispu,
ku ja fë lazhan namsëdji shimafan uan Padjil ku ja gada alma namsëdji.