Jaata shi pimëlu ku San Pudul skëvë, sa ja ëli bi ska da ba da nna kitan palea Ponto, nna nguë palea Galasia, Kapadosia, Asia ku nna nguë palea Bitinia, ku loso loso ineñ shi bi sa dji nna nguë roma tudu ku bi ja ta pachi Asia shi Kichi (Turkia dödjai).

Uan sapa jamian dantu jaata sai se ja msa fa nna kitan ineñ sai bi ska së fo kutumu adola nna nashian balu (1:14, 18; 2:9-10; 4:3). Amea sai se ineñ tuka tadu shi ineñ bi ska bibe iai, se fë ku ineñ ku utu nna nguë palea sai bi sa mali (2:12; 4:4). Zha se nna jasa jasa tela ten jomesa ja pëtëpë ineñ dajantu jonfa shi sa ku ineñ (1:6; 3:17; 4:1, 12-16).

Jaata sai sa ja pa nna kitan ja ma të añimu valadji pa ineñ ja sa dëtu ku alagada dëneñ, benga zha pa ineñ ja ska ma mavida. Dajantu shi se ëli ja lambela ineñ fa ineñ sa ku uan sama ku sa ja fo Nashiolo (1:3-12). A shime ten ja da nguë pa ja lambela zhampulu Djisu (2:21-25; 3:17-18); se ineñ ten ja ska ma pachi ku padësë Djisu valadji pa ineñ ten ja ma gloria dëli (4:13).

Dantu jaata sai nna nguë guëzha tudu ten ja paadji ma shizhu: nna shividölö (2:18-25), nna medu (3:1-7), nna pai veiu (5:1-4), nna mashivin (5:5), se a ten ja limian nna jasa jasa tela (2:13-17). A ten ja ska lambela mashi pa ja të ngongo shi ja të dantu nna namain (1:22-23; 3:8-9; 4:8-10).

Jaata sai sa ja San Pudul skëvë (1:1). Mandji se ta ja ska da jabamentu (5:12), se a ja msa fa jaata sai sa ja Pudul paadji skëvë palea Roma «amea Silvano». Ku se ja paadji sa nguë shime ku a ten ja sama Silas, ku bi sa jamada Pelavöl, ku a ja limian dantu lavulu Fidu ja nna Apostol (Fidk 15:22–18:5).