Jö ineñ shi pa nna liku ja pinchidu
5
¡Öseshi,
namsëdji nna liku,
tëndë!
¡Namsëdji ja ske sula ku kidëlë böjö dajantu mavida ineñ shi namsëdji ske bi liba namsëdji!
2 *Gagavu namsëdji tudu sa fende,
se bitidu namsëdji tudu sa kumidu da jö ineñ shi ja papa panu.
3 Se oro ku plata namsëdji tudu ja ska ma mbölözhu,
se mbölözhu sai se ja msa jö ineñ shi ske të öguë namsëdji tudu të fea fea shimafan fögö.
Namsëdji gada gada gavu namsëdji da djia sai,
ku se sa jabamentu djia.
4 Namsëdji tëndë tomenta amea pagu shi namsëdji na da nna tabaiadölö ineñ shi taba matu namsëdjif ai.
Se tomenta tabaiadölö ineñ sai se ba da deenchi Shiölö shi sa Pödë Tudu.
5 Namsëdji bibe mundu sai ku klase ja gagavu tudu ku liguilia,
se namsëdji tudu vla gödö gödö dantu kusan namsëdji ja gada djia shi djia chila nguë vida folo ske da.
6 Namsëdji kondena se namsëdji chila nna nasenchi vida folo shinke ineñ paadji pezha da öguë dëneñ.
Gada ja ku pashiensa
7 Namsëdji nna namain,
të pashiensa ba toja ta Shiölö tan ske bi.
Shimadölö matu shi ja gada pë totolo fuluta gagavu san dalea matu,
ske ta pa ëli ten gada ku pashiensa ta ten ske da tendaua.
8 Namsëdji ten ja të pashiensa pa namsëdji sa suguladu dantu kusan namsëdji,
pakë goleme Shiölö tan ske vlame bi.
9 Nna namain,
na ja sa të tave uan nguë tëjantu ku utu nguëf,
valadji pa na ja juzhga namsëdjif,
pakë Jues sa deenchi böjö poto bebezha.
10 Nna namain amu iai,
namsëdji ja ma zhampulu padësë ku pashiensa nna pantafala ineñ shi faa fala da namu Shiölö.
11 Pakë ku besa se no ja pia nna nguë ineñ shi ja padësë ku foshi.
Namsëdji tëndë amea shi Job padësë dëli,
se namsëdji bë amea shi Shiölö fë lazhan dëli,
pakë Shiölö ten ja të dölö monchi ku mindjikodji.
12 *Mandji se,
nna namain amu iai,
dajantu jö ineñ se tudu,
namsëdji na ja ska julaf,
ñi na dajantu ösëfa,
ñi da telafa,
ñi da zhugan utu julamentuf;
shina pa «aen» namsëdji ja sa «aen»,
pa «na» namsëdji ja sa «na»,
valadji pa namsëdji na ja pono da dantu kondenaf.
Pödë lezha
13 Shi uan namsëdji ja sa ku djisgalasa,
pa ëli ja lezha.
Shi uan nguë ja sa ku liguilia,
pa ëli ja janta janta da Nashiolo.
14 *Shi uan nguë ja ska danchi,
pa ëli sama nna jasa jasa guëzha,
valadji pa lezha da ëli ku namu Shiölö pa ja bolo ëli ku zhëitë.
15 Se lezha ku jonfa ske ja kula nguë shi ska danchi,
se Shiölö ske lanta ëli.
Se shi ëli ja fë pekadu,
pekadu dëli ske sa padadu.
16 Dajantu shi,
ja jonfesa pekadu namsëdji da namsëdji me,
pa namsëdji ten ja lezha da namsëdji namsëdji me valadji pa danchi namsëdji ja kula.
Lezha uan nguë dëtu ja sa ku foshi,
se ja të pödë monchi.
17 Pantafala Elias bi sa uan masebu ku dishamentu shimafan pöjödölö tudu,
se ta ëli lezha ku pödë ku foshi ja pindji pa aua na daf,
se aua ten chama da liba san dalea ba toja dantu tëishi anu ku sëshi mëdji ku mëiu.
18 Zha se ëli tan vlame lezha,
se aua tan jomesa ja pono fo ösë,
se san dalea ten da manchimentu dëli.
Pekadölö tan vla jamangandji gavu
19 Nna namain amu iai,
shi uan namsëdji ja së fo jamangandji vedadji se uan namsëdji tan ja fë ëli pa ëli tan vlame bi,
20 *namsëdji ja sëbë fa ja sa nguë shi tan ja fë pa uan pekadölö tan së fo jamangandji fëiu dëli,
ëli ska sava uan alma fo mölë,
se ëli ten ska fë pa ten pada uan sapa pekadu dëli.