Ja iaba ba toja Nashian mashi
4
¿A kë jamian guela guela ku pezha pezha ja së fo dantu namsëdji?
¿Na ja së fo dantu dishamentu fëfëiu ineñ shi ja ska pezha dantu döguë namsëdji ua?
2 Namsëdji ja dishia uan kuzhu,
se namsëdji na ja tëf,
se namsëdji ja chila nguë vida folo,
se namsëdji ja sa shia pashian,
se namsëdji na ja paadji të jö ineñ shi namsëdji ja dishiaf,
se namsëdji ja ska pezha ja fë guela.
Se namsëdji na ja ska të jö shi namsëdji ja dishiaf,
pakë namsëdji na ja ska pindjif.
3 Se ta namsëdji ja ska pindji,
se a na ja da namsëdjif,
pakë namsëdji ja ska pindji ku shizhu fëfëiu,
valadji pa namsëdji ja da öguë namsëdji liguilia fëfëiu.
4 ¡Ö nna nguë kabajölöiö iai!
¿Namsëdji na sëbëfa pa sa jamada mundu sa fa a sa namigu Nashian ua?
Ja sa nguë shi ja ngongo sa jamada mundu,
ëli ja vla fë namigu Nashiolo.
5 ¿Ö namsëdji ja mazhna fa Fa Nashian ja faa shipë shi:
Spitu shi ëli ja fë pa ja bibe dantu ngongo ja fë pa ja dishia monchi?
6 Mandji se Nashian ja ska zhuda ku galasa dëli mashi,
amea shi Fa Nashian faa:
«Nashian ja pë nna subebu topu,
mandji se ëli ja da nna nguë shipë shipë galasa».
7 Ja da masu,
basu Nashiolo,
tanja ku djiabu,
se ëli ske jölë da namsëdji.
8 Namsëdji iaba lome Nashiolo,
se ëli ten ske iabi lome namsëdji.
¡Nna pekadölö limpa öma namsëdji!
¡Limpa kusan namsëdji,
namsëdji ineñ se ku ngongo ku Nashian ku mundu öshime iai!
9 Namsëdji ja të dölö,
ja ska vla modoia pa namsëdji ja sula.
Pa li namsëdji vla fë adöiö ku pa liguilia namsëdji ja vla fë modoia.
10 Namsëdji ja da masu deenchi Shiölö,
se ëli ske lanta namsëdji ba liba.
11 Nna namain amu,
na ja da fëiu uan nguë da utu nguëf.
Nguë shi ja da fëiu namain dëli,
ö ëli ja juzhga ëli,
ëli ja ska faa ja fëiu da alë se ëli ten ja ska juzhga.
Se shi bo ja juzhga alë,
bo na tan kumpli ku alëf,
shina jues dëli.
12 Uan nguë soso se sa nguë shi ja da alë se ëli me,
se sa Jues,
se ëli se sa nguë shi fo sava ö kondena nguë;
mandji se,
¿kë nguë sa bo pa bo ja juzhga pusumu bo?
Na ja fë ja ku subebuf
13 Namsëdji tëndë jö sai,
namsëdji ineñ shi ja faa:
«Ödjai ö amaian no ska palea sai ö palea sala,
se no ske pasa uan anu ala ja fë nongosu pa no ngana djiëlu monchi».
14 Mandji se namsëdji na ja sëbë jö shi ske shiga namsëdji amaianf.
Pakë,
¿kë i shi sa vida namsëdji?
Namsëdji tudu sa fidu uan novu ku ja së uan tempu shime ku supichi se tan ja së folo.
15 Jö shi ta pa ja faa sa:
«Shi Shiölö ja ngongo,
no ske bibe se no ske fë jö sai ö jö sala».
16 Mandji se öseshi se namsëdji ja faa fala ku lisensa amea subebu.
Klase subebu tudu sa ja fëiu.
17 Nguë shi ja sëbë fë ja gavu se ëli na ja ska fëf,
ëli ska fë pekadu.