Pinchidu lunga
3
Nna namain amu iai,
pinchidu pa namsëdji na ja vla fë nna meeth,
pakë namsëdji sëbë gavu fa nna nguë ineñ shi ja ska shina kuzhu,
se a ten ske juzhga ineñ ödu mashi.
2 No tudu ja ska tuva nguë uan sapa ope.
Mandji se shi uan nguë na ja ska tuva nguë ku falaf,
ëli sa uan pöjödölö dëtu,
ku a shime ëli ten ja paadji fë lazhan öguë dëli tudu.
3 Ta no ja pë javalu uan mina jodo böjö ja sa valadji pa ëli ja tëndë no,
se no paadji fë lazhan öguë dëli tudu.
4 Namsëdji ten ja pia navian:
ku benga zha pa ineñ sa taba navian ku oventu ineñ shi ödu se ja ska föfö pë ineñ,
mandji se mina olalöba se ja ska ma ineñ ba jamian shi ineñ ngongo.
5 Se sa jö shime ten ja fë ku lunga;
ku sa uan pachi ineñ shi kichi mashi dantu öguë pöjödölö,
mandji se ëli ja paadji fë ja ödu ödu.
¡Uan öpa fögö kichi se fo kama uan mematu ngandji!
6 Se lunga sa uan fögö.
Sa uan mundu ja fëfëiu ku sa pidu dantu öguë no,
ku ja fë pa öguë pöjödölö tudu ja ma danchi.
Se ëli ja fo fë pa no pëndë vida no tudu ku pa ëli fë pa no tudu kama dantu onfenu.
7 Nna pöjödölö paadji domina klase limaia fëfëiu,
ku paatu,
ku ineñ shi ja sea öguë san tudu ku limaia domali tudu,
se ëli domina tudu bebezha;
8 mandji se zhugan nguë na sa paadji domina lungaf.
Sa uan ja fëiu ku na ja lega pa domina ëlif se ëli sa shia beneno ku ja chila nguë vida folo.
9 Ku lunga no,
se sa ëli shime se no ja da Shiölö no ku Pai no besa,
se ku lunga se me,
se no ja ta napai ineñ shi Nashian mindji shimafan tuludöguë dëli iai masan.
10 Se fo böjö se me,
se ja sëbë da besa ku ta masan.
Nna namain amu,
jö se na ta pa sa shif.
11 Fo uan lubela soso na ja paadji së aua menemene ku aua manga öshi öshimef.
12 Se ten sa amea shime ku uan öpa abada na paadji pali aseitunaf,
ñi uan öpa uva na paadji pali abadaf,
se fë nna namain amu iai,
uan lubela na paadji ten da aua menemene ku asagaf.
Tëndëmentu shishizhu
13 Shi dantu namsëdji ja të uan nguë ku sa sëbëdölö ku ja të tëndëmentu,
sa gavu pa ëli ja msa kutumu gavu dëli,
ku amea shi levu ku ja da ëli tëndëmentu.
14 Mandji se shi namsëdji ja ska të dishamentu ngandji fëfëiu manga mangadu ku namsëdji,
ja ska të pashian da ja tudu dantu kusan,
na ja ska fëntë fëntëf,
pa namsëdji na ja da fanchila tëjantu ku vedadjif.
15 Pakë tëndëmentu sai na sa i shi ja bi fo Nashianf,
shina sa dji mundu sai,
fo tëndëmentu mundu ku dji tuludöguë damono.
16 Pakë ja sa jamian shi ja sa ku dishamentu ngandji fëfëiu da ja dji nguë ku a ja të pashian da ja tudu,
se ten ja të ja buia buiadu ku klase fidu ja masan masan tudu.
17 Mandji se nna nguë ineñ shi ja të tëndëmentu ku ja sa ja fo Nashiolo,
pimëlu,
ineñ ja të uan vida limpi,
se ineñ ten ja sa nna nguë da padji,
nguë gavu ku nguë mole mole.
Se ineñ ja sa shia mindjikodji dji nguë,
ku fidu ja gagavu,
ku dëtu ja fë ja shishizhu,
shinke ineñ ja fë sochi.
18 Se nna nguë ineñ shi ja ska jua padji,
ineñ ja ska shimian padji valadji pa ineñ ten ja totolo shimafan fuluta djustishi.