Pinchidu ku pia uan nguë mashi ku utu nguë
2
Namsëdji,
nna namain amu,
namsëdji ineñ shi ja jonfa Shiölö no Djisukilitu ku gloria dëli,
na ta pa namsëdji ja ska pia uan nguë mashi ku utu nguëf.
2-3 Namsëdji ja mazhna fa,
namsëdji sa zhuntadu se ja lantela uan masebu liku ku neli oro ku bitidu lanlan,
se namsëdji ja tëndë ku ëli gavu se namsëdji ja faa ëli:
«Tusan iai,
uan jamian dondolo»,
se öshime se ten ja lantela uan masebu puvili ku veiu veiu bitidu,
se nguë sai se namsëdji ja faa ëli:
«Bo ja sa ala mdjadu»,
ö «Bo ja tusan ope amu,
san döme san»;
4 se sa öshi namsëdji ska pia uan nguë mashi ku utu nguë ja juzhga nguë ku mazhnamentu fëfëiu.
5 Nna namain kilidu amu,
namsëdji tëndë jö sai:
Nashian ma nna nguë mundu se ku sa puvili,
valadji pa ineñ sa liku ja jonfa Nashiolo ku a shime pa ineñ ma gagavu alë shi ëli plomëtë ku nna nguë ineñ shi ja ngongo ku ëli;
6 mandji se namsëdji,
na ja sa tave nna puvilif.
¿Na sa nna liku se ja ia namsëdji pë basu ua,
ku ja ma namsëdji ba deenchi nna jasa jasa djustishi ua?
7 ¿Ineñ na se sa nna nguë ineñ shi ja faa ja zhogoveadu da Djisukilitu,
ku namu fumözhö dëli se a ja ma lezha ku namsëdji ua?
8 Namsëdji ja ske fë ja gagavu shi anta vedadji se namsëdji ske kumpli alë shi ngandji mashi,
amea shi Fa Nashian ja faa:
«Ngongo ku pusumu bo shimafan tuludöguë bo»,
namsëdji ja fë gavu.
9 Se shi namsëdji ja pia uan nguë mashi ku utu nguë,
namsëdji ja ska fë pekadu,
se namsëdji sa ku kupa deenchi alë Nashiolo.
10 Pakë shi uan pöjödölö ja tëndë alë tudu,
mandji se ëli ja tuva ku uan ponto alë soso,
sa fa ëli sa kupa deenchi mandamentu alë tudu.
11 Pakë nguë shi ku faa:
«Na ja kabajölöiöf»,
se ten faa:
«Na chila nguë vida folof».
Se shi,
uan nguë na ja kabajölöiöf,
mandji se ëli ja chila nguë vida folo,
ëli kabela alë bebezha.
12 Namsëdji ta pa ja faa fala,
ku ja fë ja shimafan nna nguë ku a ske juzhga da alë shi ske fë pa no tudu sa legadu.
13 Pakë nna nguë ineñ shi na ja të mindjikodji ku utu nguëf,
a ten ske juzhga ineñ shin mindjikodji,
mandji se nna nguë ineñ shi ske të mindjikodji ske se sa nna nguë ineñ shi ske ngana djia juzhga nguë.
Ja msa jonfa bo ku fidu kuzhu
14 Nna namain amu,
¿kë ja shivi öshi uan nguë ja faa amu ja jonfa Nashiolo,
se ëli na ja fë zhugan ja gavu shi ku ja msa jonfa dëlif?
¿Jonfa se ske paadji sava ëli?
15 Se shi uan namain napai ö namain naamain ku na të bitidu ñi kumu shi ja fë fata uan djiaf,
16 shi uan namsëdji ja faa ëli:
«Ja be ku padji da namsëdji;
ja kubili panu ku ten ja kumu jö shi da namsëdji vintadji»,
mandji se namsëdji na ja da ëli jö shi fë fata öguë dëlif.
¿Kë ja jö se fë fata?
17 Se sa jö shi ja pasa ku no ta ku no ja jonfa Nashiolo,
shi no na ja ska msa fidu ja gagavuf,
jonfa no sa ja mölidu.
18 Mandji se uan nguë ja fo faa bo:
«Bo ja jonfa Nashiolo,
se amu të fidu kuzhu.
Msa amu jonfa bo shin fidu kuzhu;
se amu ske msa bo jonfa amu ku fidu ja amu».
19 Bo këlë fa të uan ponodu Nashiolo,
sa gavu.
A shime nna damono ten ja këlë,
se ineñ ja timbla da mendu.
20 Na ja sa danaduf,
ta pa bo sëbë fa jonfa shin fidu kuzhu,
jonfa sai na ja shivif.
21 Nashian ma paipai no Abraam shimafan nguë gavu,
da jö shi ëli fë ta ëli da mina dëli Isaak saklifisu pë liba datali.
22 Se a ja bë fa,
Abraam msa jonfa shi sa ku ëli ku amea fidu ja dëli,
se dajantu fidu ja dëli se jonfa dëli ba vla fë i shi gavu mashi.
23 Se sa amea shi ja kumpli Fa Nashiolo ku ja faa:
«Abraam këlë Nashiolo,
se dajantu shi se Nashian ma ëli shimafan nguë dëtu».
Se a ja sama ëli,
«jamada Nashiolo».
24 Se namsëdji ja bë fa,
Nashian ten ja ma no da jö ineñ shi no ja fë,
shimafan nna nguë gavu,
na sa da jonfa shi sa ku no mosof.
25 Jö shime se pasa ku Raab,
ku bi sa namain dölöluia;
se Nashian ma ëli shimafan nguë gavu dajantu fidu ja dëli;
pakë ëli da nna nguë monova bai jamian pa ineñ ta,
zha se ëli zhuda ineñ se ineñ valadji pa ineñ be uan jamangandji patadu.
26 Pakë amea shi öguë shin spitu sa mölidu,
se ten amea shime ku jonfa shin fidu kuzhu ten sa mölidu.