EPISTOLA KU
SAN SANCHAGU
SKËVË
Manten
1
*Sanchagu,
shividölö Nashiolo ku dji Shiölö Djisukilitu,
manten nna «zhenchi deshi ku dösu» ku ineñ tudu sa pachi pachidu dantu mundu nguintëlu nguintëlu.
Foshi liba tentasan
2 Nna namain amu,
ta pa namsëdji tudu sa ku besa ta namsëdji ja ska pasa tempu ödu ödu.
3 Pa namsëdji ja sëbë fa puva jonfa sai se ja pali gaga mavida.
4 Se gaga mavida se ja ma namsëdji ba jaba fidu tabaia gavu mashi,
valadji pa namsëdji ja fë ja gavu ntëlelele,
ku pa namsëdji ja sa nna nguë gavu mashi ku pa zhugan ja na ja fë namsëdji fataf.
5 Se shi uan namsëdji na ja të tëndëmentuf,
pa ëli ja pindji Nashiolo,
se ske da ëli,
pakë Nashian ja da nguë tudu tëndëmentu batanchi shin fa nguë zhugan kuzhu.
6 Mandji pa ëli ja pindji ja jonfa ëli,
pa ëli na ja të butanjaf,
pakë nguë shi ja të butanja sa shimafan uan pukulu domali,
ku oventu ja ma fo uan jamian ba utu jamian iai.
7 Nguë shi ja sa shi,
pa ëli na mazhna fa fo Shiölö ëli ske të zhugan jaf,
8 se ëli na ja sa ku uan ponodu shizhu mosofa ku fidu ja dëlif.
9 Se ja sa namain shi ja sa puvili iai,
pa ëli ja da öguë dëli ondolo da amea shi Nashian ske lanta ëli ba van;
10 mandji se nguë shi ja sa liku,
dantu amea shipë dëli,
pakë ëli ske pasa shimafan uan floli alba mematu.
11 Ta solo ja së ku ëli ja kenta ku foshi,
se alba se ja soja,
se floli dëli ja pono se ëli ten ja pëndë fumözhö dëli.
Se ten sa amea shime ku liku ske pëndë nongosu dëli tudu.
12 Besa se ske sa ku nguë shi ja gaga tentasan ku foshi,
pakë ta ëli ja gaga tentasan jaba,
se ëli ske da ëli jölöiö vida,
ku se sa jölöiö shi Nashian plomëtë fa ëli ske da nna nguë ineñ shi ja ngongo ku ëli.
13 Pa zhugan nguë ta ja sinchi tentasan pa ëli fë ja fëfëiu,
na ja faa:
«Nashian se fë amu tentasanf».
Pakë Nashian na paadji sa tentadu da ja fëiufa,
ñi ëli na ten ja fë nguë pa pono da tentasanf.
14 Shina,
öshi uan nguë ja të tentasan,
ja sa fo mazhnamentu fëfëiu tuludöguë dëli,
ku ja ska të ëli ku ja domina ëli.
15 Se fo mazhnamentu fëfëiu ineñ sai se a ja pali pekadu;
se fo pekadu,
ta ëli ja ödu se ëli ja pali mölë.
16 Nna namain kilidu amu,
na ja ska ngaña namsëdji mef:
17 Jö ineñ shi sa ja gagavu tudu ku ja fumözhö fumözhö ku a da no tudu sa ja ku ja fo van liba,
jamian shi Pai shi ku se mindji fögö djidjidu dösë,
ku na ja tukafa ñi na ja të sombolo pataduf.
18 Ëli,
se sa amea shi ëli ngongo,
se ëli da no vida amea nova vedadji dëli,
valadji pa no se sa pimëlu fuluta jö ineñ shi ku ëli mindji.
Këlë nova Nashiolo
19 Dajantu shi,
nna namain kilidu amu,
namsëdji ja sa sëbë jö sai:
Pa nguë tudu ja sa plesteñi pa ja tëndë,
pa ja ma tave faa fala ku pa ja ma tave ma pashian.
20 Pakë napai shi ja fë ja ku pashian ëli na ja fë djustishi deenchi Nashianf.
21 Dajantu shi,
chila ja sunzhu sunzhu ku ja fëfëiu ineñ se tudu monchi mashi iai fo öguë namsëdji,
pa namsëdji ma ku amea shi levu nova se a shimian pë iai,
pakë nova sai se të pödë pa sava alma namsëdji.
22 Mandji se na ja sa batanchi pa ja tëndë novaf;
shina pa ten ja fë,
pakë se shi na ja sa shifa namsëdji ske ja ngaña namsëdji me.
23 Pakë ja sa nguë shi ja tëndë nova moso iai,
se ëli na ja fë jö shi nova faaf,
ëli ske sa shimafan uan masebu ku ja pia jala dëli deenchi uan supë;
24 se ëli ja bë öguë dëli,
mandji se ta ëli ja da voto se öshi öshi se ëli ja kësë amea shi ëli bi sa.
25 Mandji se nguë shi na ja kësë jö shi ëli tëndëf,
shina ëli ja folapë gavu mashi alë shi ku ja fë pa sa legadu,
se ëli ja mdja dëtu ja kumpli jö shi ku alë ja manda,
nguë sai se ske sa ku besa ngandji da jö shi ku ëli ja ska fë.
26 Shi uan nguë ja ska mazhna fa ëli sa uan nguë këlë,
mandji se ëli na sëbë amea shi pa ëli fojo ku lunga dëlif,
ëli ska ngaña dantu kusan dëli,
se këlë dëli na ja shivi ëli da zhugan jaf.
27 Ja guëzha shi ja sa limpi shin noda deenchi Nashiolo ku se sa Pai no sai:
zhuda nna mina shin pai ku nna mainviva ku ja ska ma mavida,
ku pa ten ja gada vida dji nguë limpi shin noda fo ja fëfëiu mundu sai.