Jaata Sanchagu sa uan shina kuzhu ku ja sa zhuntadu ku uan sapa fidu ja vida nna kitan. Se sa jaata shi dantu Bechi shi Novu ku ja msa amea shi gavu mashi tëndëmentu shina kuzhu nna sëbëdölö Bechi shi Antigu, se fë ku a ja sama ëli «lavulu nna sëbëdölö» (1:5; 3:13-18).

Jaata sai ja msa nguë Djisukilitu (1:1; 2:1; 5:7), mandji se na ja msa utu shina ja dantu pegua nna kitan antiguf, shimafan dji mölë ku ta Djisu tan ja lanta bi vidaf. Mandji se a ja shina nguë ja tëjantu ku dishamentu pa ja ma nova (1:22-25; 3:13-18), ja msa jonfa ku fidu kuzhu (2:14-26), pa ja sëbë gaga jalga spitu (1:2-4, 12-15; 5:7-11), ku pa ja sëbë domina lunga (1:26; 3:2-12). Zhugan jamian dantu lavulu sai tan ja kë ja fala ska së fo shina kuzhu Djisu dantu evanjelio, ta ja tëjantu ku lezha (1:5-6), palavulu tëjantu ku nna liku ku nna puvili (1:9-11; 2:1-7; 5:1-6), tëjantu ku pa na ja juzhga nguëf (2:12-13; 4:11-12; 5:9), shina kuzhu tëjantu ku julamentu (5:12).

A shime ëli ten ja lambela ineñ fa guela guela ja sa dajantu këlëdöguë dji nguë ku pashian, se fë ku ëli ja da nguë añimu pa ja sa nguë shipë ku pa ja ngongo ku Nashiolo (4:1-10). Se jabamentu, se ëli ja da nna kitan añimu pa ja jonfesa pekadu dëneñ uan nguë ku utu nguë, ku pa ineñ ja chama fë pekadu, pa ineñ tan ja vla ku ope tashi ba toja Nashiolo valadji pa ëli ja sava ineñ.