Jabamentu fala
13
Namsëdji ja ska be deenchi ja ngongo uan nguë ku uan nguë shimafan nna namain.
2 Na ja ska kësë pa ja ma nguë dantu jadji namsëdji nna nguë shi ku a na ja jönsëf,
pakë nna nguë ineñ shi bi bi fë iai,
¡ineñ ma nna anzhu jadji dëneñ shinke ineñ bi sëbë!
3 Ja ska lambela nna nguë ineñ shi ja sa dantu djili,
shimafan ja tuludöguë namsëdji se sa ala.
Ja ska lambela a shime nna nguë ku a ja ska fë ineñ ja fëfëiu,
shimafan ja tuludöguë namsëdji se ja ska sinchi öguë namsëdji duadu dëneñ.
4 Pa nguë tudu ja da jazha ondolo ku pa ja gada jölöiö dantu jazha,
ku pa jaama ja sa shin noda.
Pakë sa suguladu fa Nashian ske juzhga nna nguë ineñ shi ja ska fë ja nda ölöluia ku a shime nna nguë ineñ shi ja ska kabajölöiö.
5 Namsëdji na ja ska ngongo ku djiëluf,
ja sa ku liguilia ku jö shi ja sa ku namsëdji,
pakë Nashian faa:
«Zhugan djia amu na ske lega bof.
Jabötu amu na ske abandona bof».
6 Dajantu shi no paadji faa ku jonfiansa tudu:
«Shiölö se sa nguë shi ja zhuda amu,
dajantu shi se amu na ske menduf.
¿Kë ja uan pöjödölö shipë ku ja mölë fo fë amu?».
7 Ja ska lambela nna nguë ineñ ja sa jasa jasa ku ja shina namsëdji Fa Nashiolo.
Ja ska mazhna ja gagavu shi ku jö ineñ se zhuda vida namsëdji pa namsëdji ja ska lë zhampulu jonfa dëneñ.
8 Djisukilitu se sa nguë shime onte,
ödjai ku pa sempele.
9 Namsëdji na ja ska lega pa ja ma namsëdji bai ku shina kuzhu novu ku ja sa patadu pataduf.
Foshi dantu kusan namsëdji sa ja ku ja bi fo galasa Nashiolo se na sa ja ku ja fo dajantu alë amea kumuf,
ku zhugan djia na ja shivi da nna nguë ineñ shi ja ska lë ineñf.
10 No sa ku uan datali ku nna padjil limada antigu ja shivi,
se ineñ na ja sa ku dëtu pa ineñ ja kumuf.
11 Basu amea fë kuzhu shi antigu,
jasa jasa padjil bi ja ma sangui limaia limaia ba Jamian shi Santu dantu limada shimafan saklifisu dajantu pekadu,
se öguë limaia limaia ineñ sai se a ja kama öluia jamian shi pövu ja ta.
12 Se sa amea shime,
ku Djisu padësë se ëli mölë öluia böjö poto palea valadji pa ëli fë santu pövu dëli amea tuludöguë sangui dëli.
13 Tadashi pa no së ba toja Djisu,
öluia fo böjö poto jamian shi pövu ja ta,
pa no ja ma govan dëli.
14 Pakë mundu se na se sa jadji no pa sempelef,
no ska gada uan jamian pa sempele.
15 Dajantu shi,
amea Djisu,
pa no ja fë uan saklifisu olatuvëdji ja alaba Nashiolo,
ku se sa amea shi ku no ja jonfesa namu dëli.
16 Ku pa namsëdji na ja kësë pa ja fë nguë gavu ku pa ja pachi kuzhu ku nna nguë ineñ shi ja sa ku dishamentuf.
Ineñ sai se sa klase saklifisu ineñ shi ja fë gavu da Nashiolo.
17 Ja ska tëndë nna jasa jasa namsëdji ku pa namsëdji ja ska fë jö ineñ shi ineñ ja ska fala.
Tabaia dëneñ sa pa ineñ ja fë lazhan alma namsëdji se ineñ ske da lazhan deenchi Nashiolo.
Ja da ineñ fölöshö valadji pa ineñ ja ska fë ku liguilia pa na ja ska dua ineñf.
Pakë jabamentu jö sai na ske bi ku zhugan ja gavu da namsëdjif.
18 Ja ska lezha da no,
pa no sa suguladu fa no sa ku kusan limpi se no ngongo fë ja tudu gavu ku ondolo.
19 Amu luga namsëdji mashi pa namsëdji ja ska lezha valadji pa amu paadji tan ba ua namsëdji dandjian mashi.
20 Se öseshi,
pa Nashian shi sa ku padji,
ku se lanta Shiölö no Djisu fo dantu nna nguë ineñ shi mölë bebezha,
Padjil shi ngandji nna jabala,
nguë shi fë uan bechi pa sempele ku sangui dëli,
21 se ëli se ja fë vadu nna nguë ineñ shi ja fë fata
valadji pa ja fë vintadji dëli.
Ku pa ëli ja fë ku namsëdji,
amea pödë Djisukilitu,
ja gagavu ineñ shi ja fë gavu da ëli.
¡Ilö ku gloria pa sempele ku pa sempele!
Amen.
22 Amu luga namsëdji,
nna namain ngongodu,
pa namsëdji ja ska tëndë jö ineñ shi amea kutu ku amu skëvë da namsëdji pa ja da namsëdji añimu.
23 Amu ngongo pa namsëdji sëbë fa namain no Timoteo së fo djili bebezha.
Se ta ëli ja bi,
amu ske ma ëli bë ku amu ta amu ja ua namsëdji iai.
24 Da nna jasa jasa manten ku nna namain ineñ shi sa ala.
Nna namain no Italia da manten bi da namsëdji.
25 Pa galasa Nashiolo ja sa ku namsëdji tudu.