Nashian ja pë nna mina dëli jamangandji dëtu
12
Dajantu shi,
öseshi ku no sa ludjadu ku uan sapa nna nguë ku ja da lazhan vida jonfa dëneñ,
no ja chila ja pizhadu ineñ shi na ja ska lega pa no jölëf,
dajantu pekadu ineñ se ja fë pa no ja sa levu kelekele iai ja fë pa no ja da topu,
valadji pa no ja jölë ola tudu ja be ku mindji jölë shi ja sa ku no deenchi.
2 No ja pë öiö no ja pia Djisu,
nguë shi ja jomesa ku ja fë ja gavu mashi dantu jonfa no,
nguë shi,
ku dajantu liguilia shi ska gada ëli,
se ëli gaga kusu,
ja zhono govan da jö shi kusu ja sa.
Se öseshi se ëli ska tusan benda dëtu töli Nashiolo.
3 Namsëdji ja mazhna ja ödu ödu ineñ shi namsëdji ja gaga tëjantu ku nna pekadölö iai,
se amea sai se namsëdji na ske jansafa ñi pa namsëdji ja pëndë añimuf.
4 Pakë dajantu jö ineñ se tudu,
namsëdji ontolo na sa da vida namsëdji ku sangui dantu pezha ku pekaduf.
5 ¿Sa fa namsëdji kësë fala ku shizhu ineñ shi a bi bi faa namsëdji shimafan nna mina dëli iai?,
ja faa:
«Mina amu,
na ja zhono ta Shiölö ja pë bo jamangandji dëtuf,
pa bo na ten ja pëndë añimu ta ëli ja pë bo dëtuf.
6 Pakë nna nguë ineñ shi Shiölö ja ngongo ku ineñ,
ëli ja pë ineñ dëtu,
se ëli ja jatiga nguë ëli ja ma shimafan mina».
7 Ta namsëdji ja lë jamangandji shi ja pë namsëdji dëtu,
namsëdji ja ska lambela fa Nashian ska ma namsëdji shimafan tuludöguë nna namina dëli.
¿Sa fa uan nguë tëndë lazhan uan mina ku zhugan djia pai dëli na msa ëli jamangandji dëtu ie zhafa?
8 Se shi Nashian na ja pë namsëdji jamangandji shi dëtu amea shi ëli ja fë ku nna mina dëli tuduf,
ja da ötëndë fa namsëdji na sa nna mina dëli shishizhuf,
shina nna mina dölöluia.
9 Ku amea shi no ja da nna pai no mundu sai ku shina no jamangandji dondolo shi dëtu,
tadashi,
¿jama fë no na ske tëndë amea shi gavu mashi ku Pai nna spitu tudu,
valadji pa no ja bibef?
10 Pakë nna pai no bi ja pë no jamangandji shi dëtu dantu zhugan ponodu anu se ineñ ja fë jö shi gavu mashi ku ineñ ja bi paadji fë,
mandji se jamangandji dëtu shi ja fo Nashiolo olatuvëdji ja sa gavu da no,
valadji pa no sa santu shimafan ëli.
11 Zhugan vëdji ku a ja pë nguë jamangandji shi dëtu no na ja ma ku gavuf,
shina,
pakë ja duia.
Mandji se uan vëdji,
mashi se ja da uan fuluta padji ku ja da pali uan vida dëtu da nna nguë ineñ shi bi sa vadu da ëli.
12 Dajantu shi,
ja fë pa foshi öma jansadu namsëdji ja vla novu ku pa özhöiö fojodu namsëdji tan ja vla ödu.
13 Ja ma jamangandji dëtu da ope namsëdji,
valadji pa nna nguë levu levu ku nna ojogo na ja ponof,
shina pa ineñ ja ska vla ödu.
Uan sama pa ja tëndë Nashiolo
14 Ja ska pan foshi pa ja bibe ku nna nguë tudu ku padji ku pa ten ja bibe uan vida santu,
pakë nna nguë ineñ shi na sa santuf ineñ na ske bë Shiölöf.
15 Ja ska fë lazhan uan nguë ku utu nguë,
valadji pa na lega zhugan nguë ku na ja të galasa Nashianf.
Namsëdji ja ska pinchidu pa na ja labenta zhugan leezha ja mangadu,
ku ja paadji fë namsëdji da topu ku se dajantu dëli se ten ja sunzhu uan sapa dji nguë.
16 Ja sa suguladu pa zhugan nguë ku na ja sa nna nguë fë ja nda ölöluia ñi pa na ja sa ja nozhodu shimafan Esauf,
ku vëndë dëtu dëli shimafan mina pimëlu dajantu uan patu kumu.
17 Namsëdji sëbë gavu fa,
ta ëli bi ngongo ma besa fo pai dëli,
se a naga ëli.
Bi sa tadji bebezha pa ëli tan vla ku ope tashi,
benga zha pa ëli luga ku adöiö öiö.
18 Namsëdji na ja iaba ope uan iki shimafan Sinaif jamian shi nna nguë Israel bi sa,
ö ku uan ja ku a na ja paadji fala ku ömaf,
ö uan jamian ku ja dëdë ku öpa fögöf,
uan jamian kulu kulu ku jamian bonjan ku tavada.
19 Ineñ bi tëndë uan fala pitu ku uan falagochi ku fë ineñ mendu ku ja fë pa ineñ luga Nashiolo pa chama faa ku ineñ.
20 Se ineñ tan ba ku ope tashi ja vega vega basu mandamentu Nashiolo:
«Shi ja sa uan limaia se ja fala iki se ku öma,
ske ta pa ëli mölë dadu ku budu».
21 Ba toja Moises ten sombela da jö shi ëli bë,
ku ëli faa:
«Amu ska timbla da mendu».
22 Mandji se namsëdji ba da iki Sion,
ku se palea Nashian shi sa vivu,
ku se sa Jerusalen shi dösë,
ku uan sapa milidji anzhu ja zhunta pa alaba Nashiolo.
23 Namsëdji ba dantu guëzha nna mina pimëlu pimëlu Nashiolo,
ku namu dëneñ sa skividu van dösë.
Namsëdji iaba lome tuludöguë Nashiolo,
ku se sa jues liba ja tudu.
Namsëdji shiga ba spitu nna nguë ineñ shi sa dëtu ku nna nguë ineñ sa ku dëtu gavu mashi ku sa ösë.
24 Namsëdji iaba toja Djisu,
ku se sa nguë shi ja sa metadji bechi shi novu,
ku a shime ku sangui shi a ja ta pë nguë,
ku se ja da lazhan gavu mashi ku sangui Abel.
25 Namsëdji ja ska ata pa na ja naga nguë shi ja ska faa falaf.
Pakë shi nna nguë ineñ shi bi naga nguë shi se bi ska faa pa ja ata san tela iai,
¡se mashi se ñi no na se ten ske paadji jölëfa shi no ja naga nguë shi ja faa pa no ja ata fo ösëf!
26 Dantu tempu sala,
se uan fala dëli bi timbla tela,
mandji öseshi se ëli bi plomëtë,
ja faa:
«Uan ope me,
se amu tan ske vlame fë pa na sa tela moso se timblafa,
shina a shime ösë».
27 Jö sai ja da ötëndë fa a ske chila jö ineñ shi a mindji tudu folo,
valadji pa jö ineñ shi a na ja paadji chila folof moso se ske mdja ala.