Nashian puva jonfa nna nguë antigu
11
Të jonfa sa ta a ja sa suguladu ntëlelele fa no ske të jö ineñ shi no ska gada;
se sa jö shi ja da fala shishizhu da jö ineñ shi no na ja bëf.
2 Dajantu jonfa dëneñ,
se nna nguë antigu a bi ja da lazhan gavu tëjantu ku ineñ.
3 *Se dajantu jonfa se no ja tëndë fa mundu nguintëlu nguintëlu sa ja a fë fo odji Nashiolo,
se fë ku jö ineñ shi no ja bë öseshi tudu sa fidu fo jö ineñ shi a na bi ja bëf.
4 Se bi sa dajantu jonfa se Abel da Nashiolo uan saklifisu gavu mashi ku dji Kain.
Se dajantu shi se saklifisu Abel ja ma lazhan gavu fa ëli bi sa uan masebu dëtu;
se Nashian fa aen da ja dëli.
Se dajantu jonfa Abel,
benga zha pa ëli mölë bebezha,
ontolo ëli ja faa fala.
5 Bi sa dajantu jonfa se a chila Enok fo mundu sai ba liba shinke ëli mölë,
se a na bë ëlif,
pakë Nashian ma ëli bai.
Mandji anta pa ma ëli bai,
bi sa ku lazhan gavu fa ëli sa uan nguë gavu da Nashiolo.
6 Mandji se,
shin jonfa a na paadji fë ja pa fë gavu da Nashianf.
Nguë shi ja ngongo iaba lome Nashiolo ta pa ëli ja këlë fa Nashian sa,
se ëli ske da nna nguë ineñ shi ja ska jua ëli shishizhu iai ja gagavu.
7 Se dajantu jonfa,
se Noe ku Nashian bi da ëli lazhan amea jö ineñ shi ontolo a na bi sa bëf,
se ëli ku mendu fë uan alka ngandji valadji pa ëli sava nna nguë jadji dëli.
Se dajantu jonfa sai,
se ëli kondena mundu,
se fë pa ëli se sa nguë shi ja ma gagavu djustishi ku se ja bi amea jonfa.
8 Se dajantu jonfa,
se Abraam tëndë ta Nashian bi sama ëli pa ëli lega tela dëli pë pa ëli ba utu tela ku ëli bi ske da ëli shimafan gagavu.
Se ëli tëndë se ëli bai shinke ëli bi së jamian shi ëli bi ska bai.
9 Se bi toja ta ëli bi ba da tela shi Nashian bi plomëtë ëli iai,
se ëli bibe ala ku jonfa,
pakë ëli bi sa shimafan uan nguë patadu ku bi ja bibe dantu jadji panu panu.
Se jö shime se Isaak ku Jakob fë,
nna nguë ineñ shi ku të gagavu plomesa shime.
10 Abraam bi ska gada ku jonfa uan palea ku fundamentu pa sempele,
uan palea ku nguë shi matea ku ja fë ja sa Nashiolo.
11 Se a shime dajantu jonfa,
se ba toja Sara bi paadji të uan mina,
benga zha pa ëli na bi ja palif se ëli bi sa main veiu bebezha.
Se ëli këlë fa Nashian bi ske kumpli plomesa dëli.
12 Se fë ku uan tela ntëlelele se së fo uan ponodu masebu moso,
ku bi sa mölidu bebezha tëjantu ku pa ëli pali mina;
uan tela ku uan sapa dji nguë ku,
shimafan ntëla dösë ku alea fo bodo domali,
ku a na ja paadji jontaf.
13 Nna pöjödölö ineñ se tudu mölë ja këlë jö ineñ shi Nashian bi plomëtë ineñ.
Se benga zha pa ineñ na të jö ineñ shi a bi plomëtë ineñf,
ineñ fo löndji löndji se ineñ faa aen ku vintadji.
Se ineñ tudu bi jonfesa fa ineñ sa nna nguë utu tela patadu ku nna nguë ska pasa mundu sai ja bai.
14 Sa vedadji fa nna nguë ineñ shi ja faa ja amea sai ineñ ja ska gada pa ineñ të tuludöguë tela dëneñ.
15 Se shi ineñ bi ja pë jasa tela shi ineñ së folo,
sa vedadji fa ineñ tan bi paadji vla ba ala.
16 Mandji se,
ineñ ja ska jua uan jamian gavu mashi,
uan tela dösë.
Dajantu shi,
se Nashian na ja të govan pa ëli sama ineñ Nashian dëneñf,
pakë ëli fë vadu uan palea da ineñ.
17 Se dajantu jonfa,
se Abraam da Isaak saklifisu ta Nashian bi puva ëli.
Abraam,
ku se bi bi ma plomesa fo Nashiolo,
se ëli bi sa plesteñi pa ëli da saklifisu ponodu mina dëli,
Isaak,
18 benga zha pa sa fa Nashian bi faa ëli:
«Nna minadjimina bo tudu ske bi amea Isaak».
19 Abraam bi sëbë fa shi Isaak ja mölë,
Nashian sa ku pödë shi pa tan vlame da ëli vida;
se ja msa amea se fa,
Abraam tan vlame ma mina dëli fo dantu nna nguë mölë bebezha.
20 Se a shime dajantu jonfa,
se Isaak bi plomëtë nna mina dëli,
Jakob ku Esau,
besa da tempu shi tan ske bi bi.
21 Se dajantu jonfa,
se Jakob,
ta ëli bi sa pepe pa ëli mölë,
se ëli da unian unian nna mina Sandzhe besa zha se ëli adola mbadu pë ponto budan dëli.
22 Se dajantu jonfa,
se Sandzhe,
ta ëli bi ske mölë,
se ëli da lazhan ku jonfiansa fa pövu Israel bi ske së fo Ejipto.
Ba toja ku ëli manda pa ineñ ma oso oso dëli ta ineñ ja ska së fo ala.
23 Se dajantu jonfa,
se ta a pali Moises,
se nna pai dëli jöndë ëli ba toja tëishi mëdji.
Ineñ bi bë fa Nashian da ineñ uan mina fumözhö,
se ineñ na bi mendu pa ineñ na tëndë odji fo alëf.
24 Se dajantu jonfa,
se Moises,
ta ëli bi ngandji bebezha,
se ëli naga pa na tan sama ëli mina mina miela faraonf.
25 Ëli ngongo pa fë ëli mali ku pövu Nashiolo mashi ku pa ëli djogo ja fëntë fëntë uan fi tempu dantu pekadu.
26 Ëli bë fa sa gavu pa ma mavida dajantu Kilitu mashi ku pa të gagavu Ejipto,
pakë ëli bi pë öiö liba jö ineñ shi sa ja gagavu ku ëli ske të fo Nashiolo.
27 Se dajantu jonfa,
se Moises së fo tela Ejipto shinke ëli mendu pashian dalë.
Se ëli be dëtu deenchi jamangandji pakë ëli bi pë öiö dëli ja pia Nashian shi a na ja bëf.
28 Se dajantu jonfa,
se Moises da pövu Israel odji pa fë fesa Paskua ku a ja bolo sangui pë poto tudu valadji pa anzhu mölë na chila zhugan nna mina pimëlu napai Israel vida folof.
29 Se dajantu jonfa,
se fë ku pövu Israel pasa Omali Böbö shimafan ja ineñ ska pope san tela seku,
mandji se ta nna nguë ejipto ba puva pa lë ineñ,
se ineñ tudu mölë ja nguli aua.
30 Bi sa dajantu jonfa,
se fë ku pövu Israel nda ja ludjila palea Jeriko seta djia,
se ögö budu Jeriko lolo.
31 Se dajantu jonfa,
se Raab,
namain dölöluia sai,
na mölë zhuntadu ku nna nguë palea sef ta ineñ bi naga pa ineñ tëndë Nashianf.
Pakë ëli bi ma nna supetadölö ku padji.
32 ¿A kë ja mashi ku no tan fo faa mashi?
Ske fë fata uan sapa tempu pa amu jonta namsëdji ja tëjantu ku jonfa Jedeon,
Barak,
Sanson,
Jefte,
David,
Samuel ku nna pantafala.
33 Se dajantu jonfa se nna pöjödölö ineñ se ngana utu tela tela,
se ineñ bi sa gövöndölö ku djustishi se ineñ ma jö ineñ shi Nashian bi bi plomëtë ineñ iai.
Se ineñ sua böjö nna lian,
34 se ineñ paka bazha fögö djidjidu,
se ineñ jölë da mölë fo ponto jatana.
Se ineñ vla fë ödu fo levu dëneñ.
Se ineñ bi vla fë nna nguë ödu dantu pezha se ineñ fë pa nna nguë pezha utu tela jölë.
35 Se bi të nna naamain ku tan vlame ma nna nguë dëneñ ineñ shi bi bi mölë bebezha iai.
Mandji se,
utu bi ma mavida,
pakë ineñ ba naga Nashiolo dajantu pa ineñ sa legadu.
Ineñ bi pë alagada dëneñ ku uan vida gavu mashi ku tan ske bi ta nna nguë mölë bebezha tan ske lanta bi vida.
36 A bi ska li zhugan ineñ se a bi da ineñ ku valasöchi,
zhugan utu ineñ bi sa maladu ku guian dantu djili.
37 Zhugan ineñ mölë dadu ku budu,
se utu ineñ a pota ineñ metadji ku sela,
se utu a chila ineñ vida folo ku jatana.
Se utu ineñ bi ska nda bishidu ku peli jabala ku dji jabala kutu,
ja pasa dishamentu,
ja padësë ku pajada.
38 Se mundu se na bi mësë ineñf.
Ineñ bi ska nda dantu jamian sölö sölö ku van iki,
se ineñ bi ska jöndë pë basu iöjö lapa ku iöjö san tela.