Saklifisu Kilitu uan ope soso ku pa sempele
10
Ja antigu ineñ shi bi sa basu alë Moises bi sa sombolo moso,
uan sombolo kichi da ja gavu ineñ shi ske bi bi,
na sa tuludöguë ja gavu mosof.
Basu ja antigu sai se a bi ske vlame fë saklifisu uan ope libadë libadë,
uan anu liba liba danu,
mandji se zhugan djia a na bi ske paadji limpa nna nguë ineñ shi bi ske adola ntëlelelef.
2 Se amea patadu se a bi ske chama fë saklifisu,
pakë nna nguë adola,
bi ske sa limpadu uan ope soso ku pa sempele,
se ineñ na tan ske sinchi kupa pekaduf.
3 Mandji se,
saklifisu ineñ se bi ska lambela ineñ pekadu dëneñ uan anu liba utu danu.
4 Pakë na fo fë pa sangui nna kau ku dji nna jabala chila pekadu tudu folof.
5 Dajantu shi,
ta Kilitu bi mundu,
se ëli faa Nashian:
«Bo na bi ngongo ku saklifisufa ñi ja gavu ineñ shi a ja daf.
Mandji se bo fë vadu uan öguë da amu.
6 Bo na ja ngongo ku ja kama kamadufa
ñi saklifisu da pekaduf.
7 Zha se amu faa:
“Amu sa iai,
ö Nashiolo,
amu bi pa amu fë vintadji bo,
amea shi sa skividu tëjantu ku amu dantu lavulu dubadu iai”».
8 Pimëlu,
Kilitu faa:
«Bo na bi ngongo ku saklifisufa ñi jö ineñ shi a ja daf ñi ku ja kamadu kamadufa ñi saklifisu da pekaduf,
na ja sa ja gavu da bof» (benga zha pa alë bi ja manda pa ja fë).
9 Zha se ëli faa:
«Amu sa iai,
amu bi pa amu bi fë vintadji bo».
Ëli chila pimëlu bechi folo valadji pa bechi fë dösu se sa.
10 Pakë vintadji Nashiolo bi sa fa saklifisu öguë Djisukilitu fë pa no sa santu,
uan ope soso ku pa sempele.
11 Basu bechi shi antigu,
padjil bi ja fë sulvisu mdjadu deenchi datali uan djia liba utu djia,
ja da saklifisu shime uan ope ku utu ope me,
se ineñ zhugan djia na ja paadji chila pekaduf.
12 Mandji se jasa jasa padjil no se da tuludöguë öguë dëli a Nashiolo shimafan ponodu saklifisu da pekadu tudu,
se bi shivi pa sempele.
Zha ëli tusan jamian shi dondolo,
benda dëtu Nashiolo.
13 Se ala se ëli ska gada pa pë nna namigu dëli tudu basu san dope dëli.
14 Pakë amea uan ponodu saklifisu soso,
se ëli fë ja tudu dëtu valadji nguë tudu sa santu pa sempele.
15 Se a shime Spitu Santu ten da lazhan dëli ja faa sa vedadji,
pakë ëli faa:
16 «Se Shiölö fala:
Se bechi sai se ske sa bechi novu shi amu ske fë,
ku ineñ dantu djia sala.
Amu ske pë alë amu dantu kusan dëneñ,
se amu ske skëvë pë dantu miolo dëneñ.
17 Se jabötu se amu na tan ske lambela
pekadu dëneñfa ñi ja fëfëiu dëneñf».
18 Se ta pekadu tudu ske sa padadu bebezha,
se na tan ske fë fata pa tan fë saklifisu mashif.
Nna nguë gada jonfa
19 Se fë,
nna namain kilidu,
no paadji lantela ku valëntë dantu Jamian shi Santu mashi liba ösë dajantu sangui Djisu.
20 Se dajantu mölë dëli,
se Djisu bla uan jamangandji novu,
uan jamangandji ku ja da nguë vida,
amea uan panu,
ku se sa,
amea öguë dëli.
21 No të uan taba jasa jasa padjil ku se ja sa gövöndölö dantu jadji Nashiolo,
22 no ja paadji be dëtu deenchi fesan Nashiolo ku kusan limpi ku uan jonfa suguladu ntëlelele.
Pakë kusan no shi bi sa ku kupa ai a ta ku sangui Kilitu pë nguë valadji pa no sa limpadu,
se öguë no sa labadu ku aua limpi.
23 Pa ontolo no ja jonfa ëli shin butanja da alagada shi sa ku no,
pakë a ja paadji jonfa fa Nashian ske kumpli plomesa dëli.
24 Pa no ja ska mazhna amea shi pa no ja pia uan nguë ku utu nguë valadji pa no ja ska ma añimu ku ngongo ku fidu ja gagavu.
25 Ku pa no na ja chama nda guëzhaf,
amea shi utu nguë ja fëf,
shina pa no ja da no no me añimu,
öshi no sëbë öseshi fa djia shi Shiölö tan ske vlame bi sa peetu.
26 Pakë shi no ja be ja fë pekadu ku vintadji ta no bi të tëndëmentu vedadji bebezha,
na tan ske të zhugan saklifisu ku ja paadji kubili pekadu ineñ sef.
27 Jö shi moso a tan ske gada uan juisio ku mendu ja mashi,
ku uan fögö djidjidu ku ske kama nna namigu Nashiolo.
28 Pakë ja sa nguë shi ja naga pa ëli tëndë alë Moises ëli ske mölë shin mindjikodji dajantu lazhan gavu nna nguë dösu ö tëishi.
29 Namsëdji mazhna,
pakë jatigu shi ngandji mashi se ske liba nna nguë ineñ shi ja pope liba Mina Nashiolo se ineñ na pia sangui bechi shif,
ku se fë pa no sa santu,
shimafan uan ja shipë ku nozhodu.
Se ineñ suta ëli se ineñ nozho Spitu galasa.
30 Pakë no jönsë nguë shi faa:
«Amu se ske fë djustishi ku öma amu.
Amu ske da ineñ pagu jö shi ineñ mësë».
A shime ëli ten faa:
«Shiölö se ske juzhga pövu dëli».
31 ¡Sa uan ja ödu pa ja pono da öma Nashian shi sa vivu!
32 Namsëdji ja ska lambela pimëlu pimëlu tempu,
ta namsëdji bi ska jomesa ja shina kuzhu tëjantu ku Kilitu.
Ja lambela amea shi namsëdji bi ska jonfa ëli benga zha pa namsëdji bi ja padësë ödu monchi mashi.
33 Zhugan vëdji a bi ja ma namsëdji pasa govan deenchi pövu ja suta namsëdji ku ja da namsëdji ku kuzhu,
se utu vëdji se namsëdji ja da padji nna nguë ineñ shi ten ja ska të tavadji ineñ shime.
34 Namsëdji bi ja të dölö nna nguë ineñ shi bi sa dantu djili,
se ta a chila namsëdji gagavu ineñ bi sa ku namsëdji tudu,
se namsëdji ja ma ku liguilia.
Namsëdji bi sëbë fa ja gagavu mashi se ske ja gada namsëdji,
ku ske mdja ku namsëdji pa sempele.
35 Dajantu shi,
namsëdji na pëndë jonfa namsëdji sef.
¡Pakë jö sai ske sa gagavu ngandji da namsëdji!
36 Ja gada ja ngangandji tudu ku pashiensa se sa jö shi fë namsëdji öseshi valadji pa namsëdji ja fë vintadji Nashiolo.
Tadashi se namsëdji ske ma jö shi ëli plomëtë tudu.
37 Fa Nashian ja faa:
«Pakë,
dantu uan fi tempu,
se nguë shi ta pa bi iai ske bi shin pëndë tempu.
38 Mandji se nguë shi dëtu ske ja bibe amea jonfa.
Se nguë shi tan ja vla ku ope tashi,
na ske fë gavu da amuf».
39 Mandji se no na sa nna nguë ineñ shi ja safa fo Nashianf ja be ja jua tuludöguë pëndë dëneñf,
shina no sa nna nguë ja të jonfa,
se alma no ske sa savadu.