Sulvisu shi antigu
9
Pimëlu bechi Nashiolo ku Israel bi sa ku mandatu amea sulvisu shi dantu limada liba san tela iai.
2 Se limada sai bi sa pachidu fë uachi dösu.
Jamian shi pimëlu bi sa ku öpa jandjia,
uan mezha ku ampan ineñ shi sa ja Nashiolo liba dëli.
Jamian sai a ja sama Jamian shi Santu.
3 Zha se tan bi sa ku uan panu tashi dëli ku se bi sa jamian shi fë dösu,
dantu limada ku a ja sama Jamian shi se tan sa Santu mashi.
4 Se jamian sai bi sa ku uan datali oro pa ja kama insienso ku uan alka bechi,
ku bi sa kubidu ntëlelele ku oro.
Dantu alka bi sa ku uan galafan oro ku dantu dëli se bi sa ku mana,
budan Aaron ku ja ndësë fadöpa mongo mongo ku budu lele shi bi sa ku bechi.
5 Se liba alka sai se bi sa ku nna anzhu ku ja msa gloria Nashiolo,
se azha dëneñ ja tezha pë liba töpödölö alka,
ku ja da ötëndë fa,
jamian shi ja të mindjikodji,
mandji se öseshi no na paadji faa jö ineñ se tudu ntëlelelef.
6 Ta jö ineñ se tudu ja sa jamian dëneñ,
nna padjil bi ja lantela olatuvëdji jamian shi pimëlu dantu limada valadji pa ja ska kumpli dantu sulvisu.
7 Mandji se jasa jasa padjil moso se bi paadji lantela dantu Jamian shi Santu mashi se ëli bi ska fë uan ope soso dantu uan anu;
se olatuvëdji se ëli ja ma sangui limaia pa ja da da tuludöguë pekadu dëli ku pekadu shi pövu bi ja fë shinke ja da ineñ ötëndë.
8 Se amea odji ineñ sai,
se Spitu Santu bi ja da nguë ötëndë fa jamian shi a ja lantela dantu Jamian shi Santu mashi na ja sa betu da nguë tuduf öshi ontolo limada se sa mdjadu ku amea jö shi ëli ja ska msa nguë.
9 Se jö sai se sa simbolo da tempu dödjai.
Amea jö ineñ shi a ja ma ba da ku saklifisu ineñ shi ku a ja fë,
na ja paadji limpa kusan nna pöjödölö ineñ shi ja ma bi adolaf.
10 Pakë amea fë ja antigu sai ja sa fidu ku manchimentu,
bëbë ku utu fidu ja limpa nguë öguë,
ku ja da ötëndë fa,
mandatu döguë döluia ineñ shi bi shivi ba toja ta Nashiolo ja tuka ja tudu gavu mashi.
Kilitu se sa saklifisu shi dëtu
11 Tadashi se Kilitu öseshi se ba vla fë jasa jasa padjil shi sa liba ja gagavu ineñ shi bi ske bi tudu.
Se ëli lantela dantu limada shi sa supiölö ku dëtu mashi ku sa ösë,
ku a na ja fë ku öma nna pöjödölöfa ñi na sa pachi mundu se sa mindjidu ief.
12 Se ku tuludöguë sangui dëli,
na sa ku sangui jabala kutufa ñi dji mina kauf,
se ëli lantela dantu Jamian Santu mashi uan ope soso ku pa sempele,
se ëli sugula pa no sa savasan chindadji.
13 Basu bechi shi antigu,
sangui jabala kutu ku dji kau napai ku shinzha uan kau miela se a bi paadji limpa pachi döguë öluia ku pa nna pöjödölö ineñ se bi sa santu iai ku ineñ bi sa ja nozhodu.
14 Shi jö sai ja sa shi,
jantu mashi sangui Kilitu,
ku amea Spitu chindadji,
se ëli ja da tuludöguë dëli saklifisu shin noda da Nashiolo.
Ku ske limpa kusan no fo fidu ja ku ja ma nguë ba mölë,
valadji pa no ja shivi Nashian shi sa vivu.
15 Dajantu shi se Kilitu se sa nguë shi ja sa metadji bechi shi novu,
valadji pa nna nguë ineñ shi a ja sama tudu ja të gagavu chindadji shi ku ëli bi bi plomëtë iai.
Se öseshi ku ëli mölë valadji pa ëli fë pa no sa legadu fo pekadu ineñ shi no bi fë iai basu bechi shi pimëlu.
16 Pakë ta uan nguë ja lega uan jaata ja gagavu skividu,
ja fë fata pa toja pöjödölö shi fë iai mölë bebezha.
17 Se jaata ja gagavu skividu sai ske shivi moso ta nguë shi ja mölë.
Öshi nguë shi fë iai ontolo ëli sa vivu,
jaata ja gagavu skividu sai na ske shivi da zhugan jaf.
18 Dajantu shi,
ba toja pimëlu bechi bi sa pidu ku sangui uan limaia.
19 Pakë ta Moises bi lë unian unian mandamentu Nashiolo da pövu tudu,
se ëli ma sangui mina kau ku dji jabala se ëli zhunta ku aua,
se ëli ja ta pë nguë liba lavulu alë Nashiolo a shime ku nna pövu tudu ku manga döpa isopo ku öjözhë kololi böbö.
20 Tadashi se ëli faa:
«Sangui sai se ja sugula bechi shi Nashian da bi pa namsëdji ja kumpli».
21 Se amea se me se ëli ten ja ta sangui pë limada ku jö ineñ shi a usa dantu sulvisu pa adola Nashiolo tudu.
22 Pakë,
amea alë Moises,
ja tudu ta pa ja limpa ku sangui pakë shin sangui a na ja paadji pada pekaduf.
23 Dajantu jö sai,
se bi fë fata pa fesan fesan ja dösë sa limpadu amea sai,
mandji se ja dösë ineñ se me,
ku saklifisu supiölö mashi ku ineñ sai.
24 Pakë Kilitu na lantela uan Jamian shi Santu mashi dantu jadji Nashiolo ku a fë ku öma nna pöjödölöf,
ku sa shimafan fesan tukadu i shi sa shishizhu,
ku sa ösë.
Ëli lantela tuludöguë ösë valadji pa ëli ba msa öguë dëli deenchi Nashiolo öseshi a föböli no;
25 se ëli na lantela ösë valadji pa ëli da öguë dëli pa sa saklifisu uan ponodu ope ku utu ope mef,
amea shi nna jasa jasa padjil ja fë san tela ief,
ku ja lantela dantu Jamian shi Santu mashi uan anu ku utu anu me ku sangui ku na sa dji dëlif.
26 Shi jö sai bi bi fë fata,
Kilitu bi ske ta pa sufli mölë uan ope ku utu ope me,
fo jomesadu mundu,
mandji se öseshi,
ku sa jabamentu tempu tudu,
se Kilitu msa öguë dëli uan ope soso ku pa sempele valadji pa ëli chila pekadu amea tuludöguë mölë ku saklifisu dëli.
27 Se sa amea shi sa pidu valadji pa nna pöjödölö ja mölë uan ope soso,
zha se ske bi juisio,
28 se ten sa amea shi a shime Kilitu ten mölë ku saklifisu uan ope soso ku pa sempele,
valadji pa ëli chila pekadu uan sapa pöjödölö folo.
Se Kilitu tan ske vlame bi,
na sa pa ëli tan vlame fë lazhan pekadu nof,
shina valadji pa ëli bi ku savasan da nna nguë ineñ ska gada ku vintadji ta ëli tan ske vlame bi.